ថ្ងៃទី២៦ ខែកញ្ញា ឆ្នាំ២០១៨ ឯកឧត្ដម បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បាន អនុញ្ញាតឱ្យលោក Jiang Hao អគ្គនាយកក្រុមហ៊ុន Join Capital Investment & Management Co., Ltd. ជួបសំដែងការគួសម និងសុំគោលការបង្កើតវិទ្យាស្ថាន បណ្ដុះបណ្ដាលបច្ចេកទេសវិជ្ជាជីវៈ អាស៊ាន អនឡាញ នៅកម្ពុជា។
ឯកឧត្ដមបណ្ឌិត អ៊ិត សំហេង បានគាំទ្រគម្រោងនេះ ដែលអាចផ្ដល់ភាពងាយស្រួលដល់ សិស្ស និស្សិត ក្នុងការសិក្សាបន្ថែម ឈានយកជំនាញ កម្រិតខ្ពស់ ឆ្លើយតបទៅនឹងតម្រូវការ ទីផ្សារការងារបច្ចុប្បន្ន។
លោក ឡៅ ហ៊ឹម ប្រតិភូរាជរដ្ឋាភិបាលទទួលបន្ទុកជាអគ្គនាយកអប់រំ បណ្តុះបណ្តាលបច្ចេកទេស និងវិជ្ជាជីវៈ បាននិយាយថា៖ បច្ចុប្បន្ន ទំនាក់ទំនងកម្ពុជា-ចិនឈានដល់កិច្ចសហប្រតិបត្តិការភាពជាដៃគូគ្រប់ជ្រុងជ្រោយហើយការវិនិយោគរបស់ក្រុមហ៊ុនឯកជនរបស់ចិន ក្នុងការបង្កើតសាលារៀនតាមប្រព័ន្ធអនឡាញនៅកម្ពុជា ដើម្បីឱ្យសិស្ស-និស្សិតនៅកម្ពុជាកាន់តែមានភាពងាយស្រួលក្នុងការសិក្សា ក្នុងយុគសម័យបច្ចេកវិទ្យាទំនើបនេះ។
បើតាមគម្រោងរបស់ក្រុមហ៊ុនចិន វិទ្យាស្ថានអនឡាញនេះនឹងបង្កើតនៅអំឡុងឆ្នាំ២០១៨ នេះ ប៉ុន្តែទោះយ៉ាងណាភាគីពាក់ព័ន្ធក៏ត្រូវជជែកពិភាក្សាគ្នា និងសុំអនុញ្ញាតច្បាប់ បំពេញបែបបទនានាជាបន្តបន្ទាប់ទៀត ដើម្បីជំរុញឱ្យសាលាអនឡាញនេះចេញជារូបរាងឱ្យបានឆាប់ ខណៈក្រុមការងារមួយចំនួនដែលជាដៃគូរបស់ក្រុមហ៊ុនខាងលើ ក៏កំពុងបើកការបង្រៀនសិស្សតាមអនឡាញជាបណ្ដើរៗហើយដែរ។ នេះបើយោងតាមការបញ្ជាក់របស់ លោក ឡៅ ហ៊ឹម។
សូមបញ្ជាក់ថាវិទ្យាស្ថានរបស់ក្រុមហ៊ុនចិននេះគឺបណ្ដុះបណ្ដាលខាងជំនាញបច្ចេកវិទ្យាព័ត៌មានរិទ្យា IT ទេសចរណ៍ ពាណិជ្ជកម្ម គណនេយ្យ និងជំនាញផ្សេងៗទៀត។
ក្រុមហ៊ុនចិននេះជាក្រុមហ៊ុនដែលធ្លាប់វិនិយោគច្រើននៅប្រទេសចិន ដែលមានថវិកាវិនិយោគរហូតដល់រាប់ពាន់លានដុល្លារ។