header ads

Sponsor

អាម៉ាប៉ាប៉ាញ៉ូស

ភ្នំពេញៈ ផ្អើលទាំងយប់ អ្នកកាសែត​ម្នាក់ត្រូវជនបង្កគ្រោះថ្នាក់ចរាចរណ៍ ទះមួយ​កំផ្លៀង​ពេញទំហឹង ខណៈដែល​អ្នកកាសែត ធ្វើដំណើរឆ្លងកាត់ ក៏ឈប់ម៉ូតូចុះមកសួរនាំ ហើយមិនទាន់បានថតផង ស្រាប់តែនារីម្នាក់នៅក្នុងរថយន្ត ចុះមក​ចង្អុល​មុខ ហើយស្ទុះទៅចាប់ទូរស័ព្ទរបស់អ្នកកាសែត កំពុងកាន់នៅជាប់ដៃ​ បម្រុងយកទៅបោកចោលទៀត បណ្ដាលឲ្យទូរស័ព្ទខូចបើកលែងចេញ កាលពីម៉ោងជាង៩ យប់​ ថ្ងៃទី៨​ ខែកញ្ញា​ ឆ្នាំ២០១៨នេះ នៅត្រង់ចំណុចផ្លូវជាប់របងវត្តទួលសង្កែ សង្កាត់ទួលសង្កែ​ ខណ្ឌឬស្សីកែវ​។

អ្នកកាសែត​រងគ្រោះ​ឈ្មោះ​ ប៉ូច​ គឹមសុខ អាយុជាង៤០ឆ្នាំ ជាអ្នកយកព័ត៌មាន​ អង្គភាពសារព័ត៌មាន BBN TV-Online។

សាក្សីបានឲ្យដឹងថា នៅមុនកើតហេតុបន្តិច​ គេឃើញរថយន្តមួយគ្រឿង ម៉ាក Lexus RX330 ពណ៌ស ស្លាកលេខភ្នំពេញ 2AQ-4248 បើកបរដោយជនបង្កមានសភាពស្រវឹងជោគ រួមដំណើរជាមួយនារីម្នាក់ទៀត មកដល់ចំណុចកើតហេតុ បានជ្រុល ទៅបុកប៉ះម៉ូតូ ណៃហតមួយគ្រឿង បណ្ដាលឲ្យរងការខូចខាតបន្តិចបន្តួចប៉ុណ្ណោះ ហើយដោះស្រាយគ្នា​មិនចេញ ចៃដន្យ​​អ្នកកាសែតម្នាក់ បានធ្វើដំណើរឆ្លងកាត់ ក៏ប្រទះឃើញ ទើបឈប់ម៉ូតូចុះមកធ្វើការសាកសួរថា​ ​មានរឿងអ្វីបង​ ប៉ះគ្នាមែន? គ្រាន់តែសួរហើយភ្លាម មិនទាន់ទាំងបានផ្តិតយករូបភាពផង ស្រាប់តែនារីម្នាក់រួមដំណើរលើរថយន្តបង្កហេតុ បានចុះពីលើរថយន្ត​ មក​ចង្អុល​មុខអ្នកកាសែតម្នាក់រូបនោះ ស្រែកខ្លាំងៗថា "លោកឯងមកពីណា​ ម៉េចចង់ថតរូបយកទៅផ្សាយមែន?" រួចក៏ស្ទុះទៅចាប់ទូរស័ព្ទរបស់អ្នកកាសែតជាប់ បម្រុងយកទៅបោកចោលទៀត តែសំណាងល្អ​អ្នកកាសែត​រូបនោះកាន់ទូរស័ព្ទជាប់ ហើយប្រាប់វិញថាបងកុំចាប់ទូរស័ព្ទខ្ញុំ ប្រយ័ត្ន​ខូច តែនារីម្នាក់នោះនៅតែព្យាយាម ប្រទាញ​យកទូរស័ព្ទចុះឡើងៗ បណ្ដាលឲ្យទូរស័ព្ទកោង និងរលត់បើកលែងចេញ​ ភ្លាមនោះទើបអ្នកកាសែតរូបនោះ​បានទាក់ទងហៅសមត្ថកិច្ចនិងអ្នកកាសែតដទៃទៀតមកចុះមកកន្លែងកើតហេតុផង​ ព្រោះមានអ្នកបើករថយន្តមួយគ្រឿងស្រវឹងស្រា​ បង្កគ្រោះថ្នាក់ចរាចរណ៍ហើយ​ បម្រុងមកយកទូរស័ព្ទខ្ញុំទៅបោកចោល​ទៀត​។

ចំណែកអ្នកបើករថយន្តបង្កហេតុបានទូរស័ព្ទហៅបុរសម្នាក់ អោយបើករថយន្តមួយគ្រឿង​ទៀត មិនចាំម៉ាក​ ពាក់ស្លាកលេខ ​2AU-1198 មកចំណុចកើតហេតុ​ ហើយក៏ក្រឡេកទៅឃើញ អ្នកកាសែតរូបនោះ ​កំពុងនិយាយជាមួយម្ចាស់ម៉ូតូរងគ្រោះ​ ស្រាប់តែអ្នកបើករថយន្តបង្កបានដើរទៅ​ជិត រួចលើកដៃទៅ​ទះ​កំផ្លៀង​អ្នកកាសែតនោះមួយដៃពេញទំហឹង រួចបោះពាក្យសម្ដីមកថា គ្រោះថ្នាក់ចរាចរណ៍​ប៉ុណ្ណឹង​ អស់ប៉ុន្មាន? ហើយប្រញ៉ាប់ឡើងរថយន្តដែលពាក់ស្លាកលេខ ​2AU-1198 បើកគេចខ្លួនចេញពីកន្លែងកើតហេតុបាត់ស្រមោល​ បន្សល់​ទុកបុរសម្នាក់ដែលបើករថយន្តនោះមក​ជួយដោះស្រាយ។

បន្តិចក្រោយមក មានអ្នកសារព័ត៌មានជាច្រើន បានចុះទៅដល់កន្លែងកើតហេតុបន្តបន្ទាប់គ្នា ដើម្បីផ្ដិតយកទិដ្ឋភាពផ្សាយផ្ទាល់ភ្លាមៗផងដែរ​ រួមទាំងសមត្ថកិច្ចមូលដ្ឋានផងដែរ តែជនបង្កបានគេចចេញពីកន្លែងកើតហេតុបាត់ហើយ ដោយបន្សល់​ទុកបុរសម្នាក់ដែលបើករថយន្តមក​ជំលៀស​ជនបង្កជាអ្នកមក​ជួយដោះស្រាយ។

ក្រោយពេលកើតហេតុ​ ដោយសារតែមិនចង់វែងឆ្ងាយ​ បុរសម្នាក់ដែលជាតំណាង​អ្នកប្រើហិង្សាទៅលើអ្នកកាសែត បានសម្តែងការសុំទោស​ និងសុំសម្របសម្រួល ដោយសង​ជម្ងឺចិត្ត​ទៅអ្នកកាសែតរងគ្រោះ​ចំនួន​ ៣០០ដុល្លារ​ ដើម្បីបញ្ចប់រឿង​ នៅកន្លែងកើតហេតុផងដែរ៕

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post