Sunday, September 9, 2018

បើកល្បឿនលឿន ជែងចូលផ្លូវអាទិភាព បុករថយន្ត រួចផ្លោង បោកក្បាល បាក់កស្លាប់

អាម៉ាប៉ាប៉ាញ៉ូស

តាកែវៈ បុរសម្នាក់បានបោកផ្ទប់នឹងកញ្ចក់រថយន្ត រួចធ្លាក់បោកនឹងថ្នល់ បាក់កស្លាប់ គួរឲ្យ​អាណោចអាធ័ម​ បន្ទាប់ពីបើក ម៉ូតូឌ្រីមសង់ក្នុងល្បឿន ជែង​ ខ្វះការប្រុងប្រយ័ត្ន​ ចូលផ្លូវម្ខាងទៀត ជ្រុលទៅបុករថយន្តកាមរីបាឡែន ពេញទំហឹងតែម្ដង​ បង្កការភ្ញាក់ផ្អើលយ៉ាងខ្លាំង។

ហេតុការណ៍គ្រោះថ្នាក់ចរាចរណ៍ដ៏រន្ធត់នេះ កើតឡើងនៅវេលាម៉ោង៣និង២០នាទីរសៀល​ ថ្ងៃទី៩ ខែកញ្ញា​ ឆ្នាំ២០១៨ នៅលើកំណាត់ផ្លូវជាតិលេខ២ ស្ថិតក្នុងភូមិក្រាំងលាវ​ ឃុំរវៀង​ ស្រុកបាទី​ ខេត្តតាកែវ​ ។

ជនរងគ្រោះ(សព) ឈ្មោះ ធឿន​ កុសល ភេទប្រុស អាយុប្រហែល២៥ឆ្នាំ មុខកម្មកររោងចក្រ រស់នៅម្ដុំទន្លេបាទី​ មានប្រពន្ធ នៅស្រុកកណ្ដាលស្ទឹង​ ខេត្តកណ្តាល ​។

បើតាមសម្ដីមិត្តភក្តិដែលធ្វើដំណើរទៅជាមួយគ្នា តែជិះម៉ូតូផ្សេងគ្នា បានរៀបរាប់​ប្រាប់ឲ្យភ្នាក់ងារអង្គភាពព័ត៌មាន Cam Post (ខេមប៉ុស្តិ៍) ដឹងថា នៅមុនពេលកើតហេតុ​ រូបគេ និងមិត្តភក្តិម្នាក់ទៀត ជិះម៉ូតូ១គ្រឿង ឌុបគ្នា និងជនរងគ្រោះ ជិះម៉ូតូមួយគ្រឿងតែម្នាក់ឯង ម៉ាកហុងដា ឌ្រីម ពណ៌ខ្មៅ ពាក់ស្លាកលេខ ភ្នំពេញ 1AS-9837 បើកបរទិសដៅ ពីត្បូងទៅជើង ក្នុងល្បឿនលឿន ធ្វើដំណើរត្រឡប់មកពីជូនមិត្តភក្តិ ទៅយកខោអាវ​ បំណងទៅធ្វើការវិញ ខណៈមកដល់កន្លែងកើត ជនរងគ្រោះ​បានជែងចូលផ្លូវម្ខាងទៀត ស្រាប់តែមានរថយន្តមួយគ្រឿងទៀត ម៉ាក កាម៉ារីបាឡែន ពណ៌ទឹកមាស ពាក់ស្លាកលេខ ភ្នំពេញ 2S-3779 ដែលកំពុងបើកទិសដៅបញ្ច្រាសទិសចរាចរណ៍គ្នាជាមួយម៉ូតូ ពីជើងទៅត្បូង ក៏បុកចំពេញទំហឹងតែម្ដង បណ្តាលឲ្យជនរងគ្រោះ ហោះផ្លោងបោកផ្ទប់នឹងកញ្ចក់រថយន្ត រួចធ្លាក់បោកនឹងថ្នល់បាក់កស្លាប់ គួរឲ្យ​អាណោចអាធ័ម នៅកន្លែងកើតហេតុតែម្ដង​ ។ ភ្លាមនោះ ក៏មានជនបរទេសដែលធ្វើដំណើរឆ្លងកាត់ឃើញ ក៏ចុះមកជួយសង្គ្រោះបឋមដែរ​ តែអកុសលជនរងគ្រោះបានស្លាប់បាត់ទៅហើយ ។

ក្រោយពេលកើតហេតុ សម្ថកិច្ចមូលដ្ឋាន បានចុះមកជួយសម្រួលចរាចរណ៍ ដើម្បីកាត់បន្ថយការកកស្ទះចរាចរណ៍ និងរាយការណ៍ទៅកាន់សមត្ថកិច្ចជំនាញស្រុកបាទី ចុះមកវាស់វែង​ និងស្ទូចយករថយន្ត និងម៉ូតូទៅរក្សាទុកនៅអធិការដ្ឋាននគរបាលស្រុកបាទី ដើម្បីរង់ចាំដោះស្រាយទៅតាមនីតិវិធី ។ ចំណែកសពជនរងគ្រោះ​ ត្រូវបានសមត្ថកិច្ចទាក់ទងក្រុមគ្រួសារមកយកទៅធ្វើបុណ្យតាមប្រពៃណី ៕

@Amapapa.News

Feature Ads