ភ្នំពេញៈ អ្នកភូមិជាច្រើនមានការភ្ញាក់ផ្អើលជាខ្លាំង ក៏ដូចជាសមត្ថកិច្ចមូលដ្ឋាន បានចុះទៅឃាត់ខ្លួនបុរសម្នាក់យកទៅប៉ុស្ដិ៍ ដែលមានគេសង្ស័យថា បានសម្លាប់ម្ដាយបង្កើតរបស់ខ្លួន កាលពីវេលាម៉ោង៦៖៥០នាទីព្រលប់ ថ្ងៃទី២០ កញ្ញា ឆ្នាំ២០១៨ ស្ថិតក្នុងភូមិព្រៃកី(ខ) សង្កាត់ពងទឹក ខណ្ឌដង្កោ រាជធានីភ្នំពេញ។
សពជនរងគ្រោះឈ្មោះ ម៉ៃ នួន ភេទស្រី អាយុ៦៣ឆ្នាំ មុខរបរនៅផ្ទះ ស្នាក់នៅផ្ទះគ្មានលេខ ភូមិព្រៃកី(ខ) សង្កាត់ពងទឹក ខណ្ឌដង្កោ រាជធានីភ្នំពេញ ។ ចំណែកជនសង្ស័យជាកូន ដែលសង្ស័យសម្លាប់ម្ដាយខ្លួន ឈ្មោះ ពិន ខន ភេទប្រុស អាយុ៣៥ឆ្នាំ មុខរបបនៅផ្ទះ ស្នាក់នៅទីតាំងកើតហេតុខាងលើ។
យោងតាមការឲ្យដឹងពីកូនស្រីរបស់ជនរងគ្រោះឈ្មោះ ឡុង សុខមាន អាយុ២១ឆ្នាំ មុខរបរ កម្មកររោងចក្រ ស្នាក់នៅផ្ទះកើតហេតុខាងលើ បានប្រាប់ឲ្យដឹងថា នៅវេលាម៉ោង៦៖៣០នាទីថ្ងៃកើតហេតុ ពេលនាងខ្ញុំមកពីធ្វើការវិញ មកដល់ឃើញផ្ទះបិទភ្លើងងងិតឈឹង ចំណែកទ្វារបើកចំហរ ឃើញដូច្នោះនាងក៏ដើរបើកភ្លើងនៅមុខផ្ទះ និងខាងក្នុងផ្ទះ រួចនាងក៏ហៅម្តាយ តែម្តាយមិនឆ្លើយតប រួចនាងក៏យកដៃទាញម្តាយ ស្រាប់តែឃើញម្តាយនាងស្លាប់រឹងខ្លួនបាត់ទៅហើយ ដោយមានឈាមនៅតាមភ្នែក ត្រចៀក និងក ដោយមានស្រមោចរោមខាំត្រង់របួស ចំណែកបងប្រុសរបស់នាង(ជនសង្ស័យ )បានដេកលក់នៅលើគ្រែក្នុងផ្ទះជាប់ទ្វារ រួចនាងបានរត់ចេញក្រៅហៅអ្នកជិតខាងឲ្យមកជួយ និងរាយការណ៍ជូនសមត្ថកិច្ចមូលដ្ឋានតែម្តង។
ក្រោយការធ្វើកោសលវិច័យរបស់វេជ្ជបណ្ឌិត នង សុវណ្ណរ័ត្ន គ្រូពេទ្យកោសលវិច័យ បាន បញ្ជាក់ថា ជនរងគ្រោះ គឺស្លាប់ដោយសារ គាំងបេះដូង ( អាចបណ្តាលមកពីជំងឺលើសឈាម និងជំងឺថ្លើម ) មិនមែនជាករណីឃាតកម្ម ដែលកូនសម្លាប់ម្ដាយនោះទេ។ ចំណែកស្លាកស្នាមនៅលើដងខ្លួន គឺត្រូវស្រមោចខាំ ពេលគាត់ដេកស្លាប់។
យោងតាមការបំភ្លឺរបស់កូនស្រីឈ្មោះ ឡុង សុខមាន ថា កន្លងមកម្តាយរបស់គាត់មានជំងឺលើសឈាម និងជំងឺថ្លើម រយៈពេល៤ឆ្នាំហើយ។ ពិនិត្យរួច សមត្ថកិច្ចបានធ្វើឯកសារប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕
