ប៉ុន្មានថ្ងៃនេះ លោកគ្រូ អ្នកគ្រូ និងសិស្សមួយចំនួននៅវិទ្យាល័យព្រះស៊ីសុវត្ថិ បានផ្ទុះការតវ៉ារឿងផ្ទេរលោក មូល ស៊ុយហេង ពីនាយកសាលាទៅធ្វើការនៅមធ្យមសិក្សាចំណេះទូទៅ និងបច្ចេកទេស។ ការតវ៉ានេះមានប្រសិទ្ធភាព ដោយនៅថ្ងៃទី២០ ខែកញ្ញា ឆ្នាំ២០១៨នេះ កិច្ចប្រជុំមួយដែលដឹកនាំដោយឯកឧត្តម ហង់ ជួន ណារ៉ុន រដ្ឋមន្ត្រីអប់រំ យុវជន និងកីឡា ហើយបានសម្រេចឱ្យលោក មូល ស៊ុយហេង បន្តតួនាទីជានាយកសាលាដដែល។
មុននឹងឈានដល់ការសម្រេចនេះ ឯកឧត្តមរដ្ឋមន្ត្រី សម្រេចឱ្យមានការបោះឆ្នោតពីលោកគ្រូ-អ្នកគ្រូបង្រៀននៅវិទ្យាល័យព្រះស៊ីសុវត្ថិនេះ ដោយទទួលបានសំឡេងគាំទ្រ៩៧សំឡេង លើសំឡេង១៥១។ តាមរយៈសំឡេងគាំទ្រច្រើននេះ ទើបឯកឧត្តមហង់ ជួន ណារ៉ុន សម្រេចឱ្យលោក មូល ស៊ុយហេង បន្តធ្វើនាយកវិទ្យាល័យវិញ។
ក្រោយចំណាយពេលមួយព្រឹក រដ្ឋមន្ត្រីក្រសួងអប់រំ បានដោះស្រាយការទាមទាររបស់គ្រូបង្រៀននៅវិទ្យាល័យព្រះស៊ីសុវត្ថិនេះ បានមួយករណីប៉ុណ្ណោះ។ ចំណែកករណីដែលគ្រូបង្រៀន និងសិស្ស ទាមទារឲ្យដកសាលាជំនាន់ថ្មី ចេញពីវិទ្យាល័យស៊ីសុវត្ថិនេះ មិនទាន់មានដំណោះស្រាយនៅឡើយទេ ដោយឯកឧត្តម ហង់ ជួន ណារ៉ុន សម្រេចលើកយកទៅដោះស្រាយនៅពេលក្រោយ។
អ្នកនាំពាក្យក្រសួងអប់រំលោក ឌី ខាំបូលី បានបញ្ជាក់ថាក្រសួងមិនមានការដកតំណែងនាយកសាលានោះទេ តាមពិត ជាការផ្ទេរភារកិច្ចរបស់នាយកសាលា គឺផ្ទេរភារកិច្ចពីវិទ្យាល័យព្រះស៊ីសុវត្ថិ មកនាយកដ្ឋានមធ្យមសិក្សាចំណេះទូទៅ និងបច្ចេកទេស។ ការផ្ទេរនេះ ដោយសារតែលោក មូល ស៊ុយហេង ធ្វើនៅទីនោះយូរហើយ ហើយមានបទពិសោធន៍ចាស់ទុំ អាចមកជួយការងារនៅនាយកដ្ឋានបាន។