ភ្នំពេញៈ អ្នកនាំពាក្យគណបក្សប្រជាជនកម្ពុជា បានព្រមានថា ការតស៊ូមតិតបស់ក្រុមប្រឆាំងនៅក្រៅប្រទេស ពិសេសនោះកូនស្រីលោក កឹម សុខា អាចជាការដាក់បន្ទុក កាត់តែធ្ងន់ចំពោះលោក កឹម សុខា។
ការព្រមានរបស់អ្នកនំាពាក្យបក្សកាន់អំណាចនេះ ខណៈដែលលោក កឹម សុខា បាននឹងកំពុងតែជាប់ឃុំខ្លួននៅក្នុងផ្ទះជំនួសការឃុំខ្លួននៅពន្ធនាគារជាបណ្តោះអាសន្ន ហើយត្រូវនៅក្រោមការត្រួតពិនិត្យតាមផ្លូវតុលាការដដែល។
លោក សុខ ឥសាន បានឲ្យដឹងនៅថ្ងៃទី២០ កញ្ញានេះថា កូនស្រី កឹម សុខា បានប្តេជ្ញាចិត្តថានឹងខិតខំបន្តតស៊ូមតិនៅសហគមន៍អន្តរជាតិថែមទៀត ដើម្បីឲ្យមានការទម្លាក់ចោលទាំងស្រុងបទចោទប្រកាន់ឪពុកនាងជាជនក្បត់ជាតិសន្ទិដ្ឋិភាពជាមួយបរទេស។
លោកបញ្ជាក់ថា «ការខិតខំរបស់នាងជាសិទ្ធិរបស់នាង តែបើការខិតខំនោះធ្វើឲ្យប៉ះពាល់ដល់កិត្តិយស និងកិត្យានុភាពជាតិ វាមិនត្រឹមតែជួយសម្រាលទោសឪពុកនាងទេ តែវាកាន់តែដាក់បន្ទុកទោសទណ្ឌដល់ឪពុកនាងថែមទៀតផង» ។
លោកបន្ថែមថា រាល់ការតស៊ូមតិ ដើម្បីដោះបន្ទុកជនជាប់ចោទ មិនមែនទៅវាយប្រហារ បន្ទោសបង្អាប់បង្ខូចកេរ្តិ៍ឈ្មោះជាតិសាសន៍ឯង និងវាយប្រហាររាជរដ្ឋាភិបាលកម្ពុជា ស្របច្បាប់នៃកម្ពុជានោះទេ។
តាមគោលការណ៍ច្បាប់ គួរគប្បីរកមេធាវីដែលពូកែ និងល្បីឈ្មោះទៅតតាំងនៅតុលាការ ទើបត្រឹមត្រូវតាមគោលការណ៍ច្បាប់ និងនីតិវិធីរបស់តុលាការ។
លោក សុខ ឥសាន បានលើកឡើងទៀតថា បើគ្រាន់តែចង់ដោះបន្ទុកជនជាប់ចោទហើយទៅបរិហារកេរ្តិ៍ជាតិសាសន៍ខ្មែរនៅបរទេសនោះ មិនមានន័យថា ជាការដោះបន្ទុករឿងក្តីនោះទេតែផ្ទុយទៅវិញ វាជាការកាន់តែបន្ថែមទម្ងន់ទោសដល់ជនត្រូវចោទថែមទៀតប៉ុណ្ណោះ៕
