កំពង់ស្ពឺៈ ប្រជាពលរដ្ឋ រស់នៅក្នុងក្រុងច្បារមន ជាពិសេសក្នុងខេត្តកំពង់ស្ពឺ ទាំងមូល បានអំពាវនាវ ឲ្យលោក វ៉ី សំណាង អភិបាលខេត្តកំពង់ស្ពឺ ចាត់វិធានការបង្ក្រាបល្បែងកន្ទុយលេខ (ឆ្នោតយួន) ខ្មែរ ដែលមានមន្ត្រីអាវុធហត្ថ ពាក់ស័ក្ដិ៤កន្លះ ឈ្មោះ អ៊ុង រិទ្ធី ជាមេធំ នៅក្នុងខេត្តកំពង់ស្ពឺ ជាបន្ទាន់ផង ដើម្បីពង្រឹងសន្តិសុខសង្គម ឲ្យស្របតាមគោលនយោបាយភូមិ-ឃុំ មានសុវត្ថិភាពទាំង៩ចំណុច ដែលថ្នាក់លើបានកំណត់នោះ ប៉ុន្តរហូតមកដល់ពេលនេះ បើទោះបីជាសារព័ត៌មាននៅក្នុងស្រុកជាច្រើន អង្គភាពបានចុះផ្សព្វផ្សាយយ៉ាងណាក៏ដោយ ក៏សមត្ថកិច្ចនៅក្នុងខេត្តកំពង់ស្ពឺទាំងមូល ហាក់បីដូចជាមិនចាប់អារម្មណ៍ និងគ្មានឆន្ទៈក្នុងការបង្ក្រាបល្បែងកន្ទុយលេខមួយនេះឡើយ ដោយគេចាត់ទុកថា ជារឿងល្បែងធម្មតាតែប៉ុណ្ណោះ មិនមែនជាល្បែងខុសច្បាប់ឡើយ ទើបអស់លោកសមត្ថកិច្ច និងអាជ្ញាធរខេត្តកំពង់ស្ពឺ មិនយកចិត្តទុកដាក់បង្ក្រាបនោះ ឬក៏អស់លោកទទួលលាភសក្ការគ្រប់គ្នាអស់ហើយទេដឹង? ។
បើតាម ប្រភពពីមន្ត្រីអាជ្ញាធរ និងសមត្ថកិច្ចក្នុងក្រុងច្បារមន មួយចំនួនបានបង្ហើបឲ្យដឹងស្រដៀងគ្នា ថា មានមន្ត្រីនគរបាលជាន់ខ្ពស់ម្នាក់ នៅក្នុងខេត្តកំពង់ស្ពឺនេះ នៅចាំទទួលផលប្រយោជន៍(លុយ) ពីមេឆ្នោតឈ្មោះ អ៊ុង រិទ្ធីនេះ ផងដែរ ទើបគ្មានសមត្ថកិច្ចនគរបាល ឬអាវុធហត្ថណាចាត់វិធានការបង្ក្រាបល្បែងឆ្នោត ឬកន្ទុយលេខ នៅក្នុងខេត្តកំពង់ស្ពឺនេះនោះ ។
ជាក់ស្ដែងលោកឧត្តមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ បានរក្សាភាពស្ងៀមស្ងាត់ទៅហើយ ទុកឲ្យមេឆ្នោត ឈ្មោះ អ៊ុង រិទ្ធី ផង និងជាមន្ត្រីអាវុធហត្ថខេត្តកំពង់ស្ពឺ បើកល្បែងកន្ទុយលេខតាមអំពើចិត្តរបស់ខ្លួន មិនខ្លាចញញើតច្បាប់ សូម្បីតែបន្តិចសោះ ។
ប្រភពពីមន្ត្រីនគរបាលក្នុងស្នងការដ្ឋាននគរបាលខេត្តកំពង់ស្ពឺ មួយចំនួនបានបង្ហើបឲ្យដឹងថា មានមន្ត្រីនគរបាលជាន់ខ្ពស់ម្នាក់ ទទួលបានផលប្រយោជន៍យ៉ាងច្រើនពីមេកន្ទុយលេខ (មេឆ្នោតយួន) ក្នុងខេត្តកំពង់ស្ពឺ រហូតមានលុយសង់វីឡា យ៉ាងស្ដុកស្ដម្ភថែមទៀតផង ។ ដូច្នេះហើយ ទើបមេឆ្នោតយួន នៅក្នុងខេត្តកំពង់ស្ពឺ មានសិទ្ធិអំណាចយ៉ាងធំធេង ក្នុងការបើកល្បែងស៊ីសងខុសច្បាប់ ហើយមានលុយទិញបុណ្យស័ក្ដិយ៉ាងក្រអឺតក្រទម មិនខ្វល់ពីការរិះគន់អ្វីទាំងអស់ ។
អ្នកកត់កន្ទុយលេខនៅក្នុងផ្សារកំពង់ស្ពឺ ក៏ដូចជានៅក្រុងច្បារមន និងតាមបណ្ដាស្រុកនានាក្នុងខេត្តកំពង់ស្ពឺ ត្រូវគេដឹងថា ជាកូនកញ្ច្រែងរបស់មេឆ្នោតឈ្មោះ អ៊ុង រិទ្ធី ដែលជាមន្ត្រីអាវុធហត្ថពាក់ស័ក្ដិ៤កន្លះ ហើយជាមនុស្សស្និទ្ធជាមួយលោក ជូ សារុន មេបញ្ជាការអាវុធហត្ថខេត្តកំពង់ស្ពឺថែមទៀតផងនោះ ទៅណា ក៏ទៅជាមួយគ្នាដែរ។
ក្រោយពីក្រុមអ្នកយកព័ត៌មានបានផ្សព្វផ្សាយពីទង្វើរបស់លោកសក្តិ៤កន្លះ មេកន្ទុយលេខធំនេះ លេចឮថា លោក ជូ សារុន មេបញ្ជាការកងរាជអាវុធហត្ថខេត្តបានប្រាប់ទៅលោក មេកន្ទុយលេខធំនោះថា កុំទៅខ្វល់ជាមួយពួកកាសែត វាចុះផ្សាយជារឿងរបស់វា ហើយបើមានលេខទូរសព្ទ័ប្លែកខលចូល ដាច់ខាតកុំលើក មេគេជាអ្នកកាងហើយ(Sic) ។
កន្លងមក លោក អ៊ុង រិទ្ធី ធ្លាប់រត់រកការអន្តរាគមន៍ជួបអ្នកកាសែតមួយចំនួន នៅក្នុងរាជធានីភ្នំពេញ ដើម្បីឲ្យបញ្ឈប់ការចេញផ្សាយរឿងលោករកស៊ីជាមេកន្ទុយលេខធំនេះតទៅទៀត ដោយគេដឹងថា ជាកាសែតរបស់មន្ត្រី ប៉េអឹម មួយដែលអស់លុយរាប់ពាន់ដុល្លារ ក្នុងការបញ្ឈប់ការផ្សាយបន្តនោះ ។
ប្រជាពលរដ្ឋ និងអាជីវករនៅផ្សារកំពង់ស្ពឺ បានឲ្យដឹងថា បច្ចុប្បន្នល្បែងកន្ទុយលេខ (ឆ្នោតយួន) រាលដាលកាន់តែខ្លាំងឡើងៗ ហើយមិនទាន់ឃើញលោក សម សាមួន ស្នងការនគរបាលខេត្តកំពង់ស្ពឺ ចាត់វិធានការបង្ក្រាបនោះទេ ។ ដូច្នេះ ទើបប្រជាពលរដ្ឋអំពាវនាវឲ្យលោក វ៉ី សំណាង អភិបាលខេត្តកំពង់ស្ពឺ ចាត់វិធានការបង្ក្រាបល្បែងស៊ីសង ជាពិសេសល្បែងកន្ទុយលេខក្នុងខេត្តកំពង់ស្ពឺ ជាបន្ទាន់ ដើម្បីកុំឲ្យរាលដាលកាន់តែខ្លាំងជាងមុនទៅទៀត ។
ប្រជាពលរដ្ឋបានលើកឡើងថា ដោយសារមេនគរបាលជាន់ខ្ពស់ ក្នុងខេត្តកំពង់ស្ពឺ គឺជាបង្អែករឹងមាំរបស់មេឆ្នោតយួនក្នុងខេត្តកំពង់ស្ពឺ ទើបល្បែងឆ្នោតយួនរាលដាលកាន់តែខ្លាំង ហើយមន្ត្រីអាវុធហត្ថឈ្មោះ អ៊ុង ប្ញទ្ធី គឺជាមេឆ្នោតធំជាងគេ នាពេលបច្ចុប្បន្ននេះ ។
មជ្ឈដ្ឋាននានាបានរិះគន់ថា ស្នងការនគរបាលខេត្តកំពង់ស្ពឺ លោក សម សាមួន និងមេបញ្ជាការអាវុធហត្ថខេត្តកំពង់ស្ពឺ លោក ជូ សារុន មិនយកចិត្តទុកដាក់បង្ក្រាបល្បែងស៊ីសងខុសច្បាប់ ប្រកបដោយប្រសិទ្ធភាពដើម្បីពង្រឹងសន្តិសុខសង្គមនោះទេ ហើយកំពុងតែបណ្ដោយឲ្យល្បែងស៊ីសងរាលដាលយ៉ាងពេញបន្ទុកតែម្តងហើយ ។
ប្រជាពលរដ្ឋសង្ឃឹមថា សមត្ថកិច្ចថ្នាក់លើ នឹងមានឆន្ទៈក្នុងការបញ្ជាមកថ្នាក់ក្រោម ក្នុងខេត្តកំពង់ស្ពឺ ដែលក្រុមសមត្ថកិច្ចឈ្លក់វង្វេងក្នុងការទទួលបានលាភសក្ការអស់ហើយនោះ៕
