កាលពីថ្ងៃទី២៦ ខែកញ្ញា ឆ្នាំ២០១៨ ម្សិលមិញ ក្រុមការងារចម្រុះដឹកនាំដោយលោកអភិបាលស្រុកវាលវែង ដោយមានការចូលរួមពីអាជ្ញាធរឃុំ រដ្ឋបាលជលផល មេបញ្ជាការវរសេនាតូចនគរបាលការពារព្រំដែនគោកលេខ៨២៥ មន្ត្រីមន្ទីរបរិស្ថានខេត្ត និងអង្គការ Wildlife Alliance បានសម្រេចយកក្រពើដែលជាប់មងប្រជានេសាទ ទៅព្រលែងនៅស្ទឹងឆាយតាម៉េត ក្នុងភូមិកណ្តាល ឃុំថ្មដា ស្រុកវាលវែង ខេត្តពោធិ៍សាត់។
អង្គការ Wildlife Alliance បានអះអាងថាអង្គការធ្លាប់បានព្រលែងសត្វក្រពើភ្នំនេះម្តងរួចមកហើយ ដោយធ្លាប់បានកាត់កន្ទុយចំណាំ ហើយច្ចុប្បន្នក្រពើនេះមានបណ្តោយ ២.៩៣ម៉ែត្រ និងមានទម្ងន់ ១៧០គីឡូក្រាម។
ក្រុមការងារចម្រុះក៏បានផ្តល់ជាថវិកាលើកទឹកចិត្តដល់ពលរដ្ឋដែលចាប់បាន នូវទឹកប្រាក់ចំនួន៦០០ដុល្លារ ក្នុងនោះថវិការបស់ខណ្ឌរដ្ឋបាលជលផលពោធិ៍សាត់ ២០ម៉ឺនរៀល ថវិការបស់លោកអភិបាលស្រុកវាលវែង ១០ម៉ឺនរៀលថវិការបស់វរៈសេនាតូចនគរការពារព្រំដែនគោកលេខ៨២៥ ចំនួន១០ម៉ឺនរៀល និងក្រុមហ៊ុនចិន៥០០ដុល្លារ។
សូមរំលឹកថា កាលពីព្រឹកថ្ងៃទី២៥ ខែកញ្ញា ឆ្នាំ២០១៨ លោក មឿន មីន ប្រជានេសាទបានប្រទះឃើញសត្វក្រពើដ៏ធំមួយក្បាល ជាប់មងដែលខ្លួនបានដាក់រកត្រី ក្នុងស្ទឹងមេទឹក ដែនជម្រកសត្វព្រៃភ្នំសំកុស ក្នុងភូមិកណ្តាល ឃុំថ្មដា ស្រុកវាលវែង ខេត្តពោធិ៍សាត់ រួចក៏បានរាយការណ៍ទៅសមត្ថកិច្ចឱ្យជួយអន្តរាគមន៍ លើកក្រពើមួយក្បាលនោះ មករក្សាទុកនៅទីបញ្ជាការវរការពារព្រំដែនគោកលេខ៨២៥។