បន្ទាយមានជ័យៈ ព្រះរាជអាជ្ញាអមសាលាដំបូងខេត្តបន្ទាយមនជ័យ លោក មាស ចន្ទ័ពិសិដ្ឋ បានប្រតិកម្មយ៉ាងខ្លាំង ចំពោះអ្នកដែលយកឈ្មោះរបស់លោកទៅប្រើប្រាស់ ដើម្បីរកស៊ីខុសច្បាប់ និងកាងរថយន្តអត់ពន្ធ។ លោកប្រតិកម្មបែបនេះ នៅចំពោះមុខអ្នកសារព័ត៌មាន ខណៈចុះសម្របសម្រួលដឹកនាំមន្ត្រីគយឆែកឆេរឃ្លាំងស្តុកប្រេងម៉ាស៊ីនមួយកន្លែង នៅក្បែរក្លោងទ្វារវត្តតាហី កាលពីព្រឹកថ្ងៃទី៥ ខែកញ្ញា ឆ្នាំ២០១៨ កន្លងទៅ។
លោក មាស ចន្ទ័ពិសិដ្ឋ បាននិយាយថា សព្វថ្ងៃនេះ មានអ្នកស៊ីមួយចំនួន បានប្រើប្រាស់ឈ្មោះរបស់លោកទៅរកស៊ី និងកាងមុខរបរខុសច្បាប់។ លោកទទួលបានព័ត៌មាននេះ តែលោកនៅមិនទាន់ច្បាស់ថា មានអ្នកណាខ្លះដែលគេងចំណេញពីការប្រើឈ្មោះរបស់លោកនោះទេ តែទោះជាយ៉ាងណា លោកនឹងរកឲ្យឃើញហើយនឹងហៅមកព្រមាន ឬក៏អាចដាក់ការចោទប្រកាន់ទៅតាមផ្លូវច្បាប់។
សូមបញ្ជាក់ថា បច្ចុប្បន្ននេះ នៅខេត្តបន្ទាយមានជ័យ មានបទល្មើសរត់ពន្ធកើតមានពេញបន្ទុក ច្រករបៀងក៏មានច្រើន។ ម៉ូតូគេចពន្ធ និងរថយន្តចង្កូតស្តាំបន្តហូរចូលដូចហែរកឋិន ពីតាមបណ្តាច្រករបៀងដែលគ្រប់គ្រងដោយទាហានព្រំដែន និងនគរបាលការពារព្រំដែន។ ការហូរចូលយ៉ាងគំហុកនូវម៉ូតូ និងរថយន្តចង្កូតស្តាំទាំងនេះ ក៏អាចជាមានការឃុបឃិតជាប្រព័ន្ធពីមន្ត្រីជំនាញផងដែរ ព្រោះអ្នករកស៊ីមួយចំនួនធំ ប្រភពបញ្ជាក់ថា ក៏ជាសមត្ថកិច្ចដែរ៕