Friday, September 21, 2018

អាជ្ញាធរសម្រេចបិទក្រុមហ៊ុនចិនចំនួន២ ដែលប្រតិបត្តិការលើសេវាកម្មផ្ទេរ វេរ និងប្តូរប្រាក់ ដោយពុំមានច្បាប់អនុញ្ញាត

For Thumbnail
រិទ្ធី

កាលពីពេលថ្មីៗនេះ អាជ្ញាធរជំនាញ និងសមត្ថកិច្ច​ចម្រុះ​ រួម​មាន៖ ​ក្រុម​ការងារ​ធនាគារ​ជាតិ​នៃ​កម្ពុជា​ ដឹកនាំដោយលោក​ ម៉ែន​ ភក្តី​ ប្រធាន​នាយកដ្ឋាន​អាជ្ញាប័ណ្ណ​ គណៈកម្មការ​មូលបត្រ​កម្ពុជា​ ដឹកនាំដោយលោក ​សៀង​ ធីរិទ្ធ​ អគ្គនាយក​រង និង​កម្លាំង​នគរបាលជាតិ ​នៃ​នាយកដ្ឋាន​កណ្ដាល​សន្តិសុខ​ នៃក្រសួង​មហាផ្ទៃ​ ដឹកនាំដោយ លោក​ឧត្ដមសេនីយ៍​ទោ​ មៀច​ ដេវីត និង​មន្ត្រីពាក់ព័ន្ធ​មួយ​ចំនួន​ទៀតបានចុះត្រួតពិនិត្យ​ ទីតាំង​ក្រុមហ៊ុន​មួយ​ឈ្មោះ​ BIQUAN TECHNOLOGY ស្ថិត​នៅ​ផ្ទះ​លេខ​ S-58 ផ្លូវ​កោះពេជ្រ​ សង្កាត់​ទន្លេ​បាសាក់​ ខណ្ឌ​ចំការមន​ រាជធានី​ភ្នំពេញ​

និងក្រុមហ៊ុនមួយទៀត​ឈ្មោះ​ Hui Shang International Remittances ​ស្ថិត​នៅ​ផ្ទះលេខ​ S-59 ផ្លូវ​កោះពេជ្រ​ សង្កាត់​ទន្លេ​បាសាក់​ ខណ្ឌ​ចំការមន​ រាជធានី​ភ្នំពេញ។

ក្រោយ​បញ្ចប់​ការ​ត្រួតពិនិត្យ​ អាជ្ញាធរ​ចម្រុះ​សម្រេច​ផ្អាក​សកម្មភាព​ក្រុមហ៊ុន​ចិន​ទាំង២ខាងលើ ដែលពុំមានច្បាប់​អនុញ្ញតនៃកិច្ចប្រតិបត្តិការ​អាជីវកម្ម​លើ​សេវាកម្ម​ផ្ញើ វេរប្រាក់ ប្តូរ​ប្រាក់​ ជាពិសេសប្រមែប្រមូល ប្រាក់ពីអតិថិជនក្នុងការជួញដូរកាសអេឡិចត្រូនិក (digital asset/cryptocurrency)។

អាជ្ញាធរចម្រុះបានបញ្ជាឱ្យ ​បញ្ឈប់​សកម្មភាព​ផ្សព្វផ្សាយ​ ចរាចរ​ ទិញ​ លក់​ ទូទាត់​ កាស​អេឡិចត្រូនិក​ ប្រហាក់ប្រហែល​ និង​ប្រមូល​ប្រាក់​ពី​អតិថិជន​​ ត្រូវ​រុះរើ​ផ្លាក​អាជីវកម្ម​ចេញ​ Logo Coinups និង​ហាម​រុះរើ​សម្ភារ​ទាំងអស់​នៅ​ក្នុង​អគារ​ចេញ​ពី​ទីតាំង​ដើម​។

លោក​ឧត្ដមសេនីយ៍​ទោ​ មៀច​ ដាវីត បានបញ្ជាក់ឱ្យដឹងថា សមត្ថកិច្ច និងស្ថាប័នជំនាញបានចុះទៅណែនាំឱ្យក្រុមហ៊ុន ស្នើសុំច្បាប់អនុញ្ញាតពីធនាគារជាតិ នៃកម្ពុជា គឺក្នុងគោលបំណងទប់ស្កាត់ ការចរាចរណ៍ និងលាងលុយកខ្វក់ឆ្លងដែនចូលកម្ពុជាយើង ដែលបានមកពីការប្រព្រឹត្តបទល្មើសផ្សេងៗ។

ក្រុមហ៊ុនទាំង២បានធ្វើកិច្ចសន្យាជាមួយអាជ្ញាធរចម្រុះដោយទទួលស្គាល់កំហុសដែលធ្វើអាជីវកម្មដោយគ្មានការអនុញ្ញាត ហើយយល់ព្រមផ្អាកសកម្មភាពអាជីវកម្មទាំងស្រុង។

គួរបញ្ជាក់ថា​ ធនាគារ​ជាតិ​នៃ​កម្ពុជា​ គណៈកម្មការ​មូលបត្រ​កម្ពុជា​ និង​អគ្គស្នងការ​នគរបាល​ជាតិ​ បានចេញ​សេចក្តី​ថ្លែង​ការណ៍​រួម ​ ចុះ​ថ្ងៃ​ទី​១១​ ខែ​ឧសភា​ ឆ្នាំ​២០១៨​ ស្តីពីការទប់ស្កាត់បទល្មើសហិរញវត្ថុ និងការចរាចរខុសច្បាប់កាស់អេឡិចត្រូនិក។

@Amapapa.News

Feature Ads