ក្រសួងព័ត៌មាន ណែនាំឱ្យម្ចាស់ប្រព័ន្ធផ្សព្វផ្សាយទាំងអស់បញ្ឈប់ការចាក់ផ្សាយបទចម្រៀងមានចំណងជើងថា”សល់តែចិត្ដស្មោះ” ច្រៀងដោយលោកស្រី កែវ ច័ន្ទសម្ជស្ស របស់ផលិតកម្មខ្មែរអមតៈ កាលពីប្រមាណ១០ឆ្នាំ មុន។ នេះយោងតាមលិខិតលេខ ១២៣៣ ព.ម របស់ក្រសួងព័ត៌មាន ចុះថ្ងៃទី១៧ ខែកញ្ញា ឆ្នាំ២០១៨។
លិខិតរបស់ក្រសួងព័ត៌មាន ដែលចុះហត្ថលេខាដោយ ឯកឧត្តម ខៀវ កាញារីទ្ធ ធ្វើឡើងក្រោយមានការស្នើសុំពី ឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។
ឯកឧត្តម អ៊ិត សំហេង បានពន្យល់ប្រាប់ រដ្ឋមន្ត្រីក្រសួងព័ត៌មាន និងលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ថាបទចម្រៀង «សល់តែចិត្តស្មោះ» នេះ មានអត្ថន័យធ្វើឲ្យប៉ះពាល់ដល់តម្លៃការងាររបស់អ្នកបម្រើនៅតាមផ្ទះដែលច្បាប់ស្តីពីគាំពាជាពិសេសប្រមុខរាជរដ្ឋាភិបាលកម្ពុជា បាននិងកំពុងផ្តោការយកចិត្តទុកដាក់ និងផ្តល់កិច្ចគាំពាដល់ពួកគាត់ដែលបម្រើការងារតាមផ្ទះ។
ក្រសួងថាដើម្បីជៀសវាងប៉ះពាល់អារម្មណ៍ និងតម្លៃរបស់បងប្អូនអ្នកបម្រើការងារតាមផ្ទះប្រមុខរាជរដ្ឋាភិបាលកម្ពុជា បាននិងកំពុងផ្តោការយកចិត្តទុកដាក់ និងផ្តល់កិច្ចគាំពាដល់ពួកគាត់ព្រមទាំងបានគាំពារដោយច្បាប់រដ្ឋ ក្រសួងព័ត៌មានស្នើសុំបញ្ឈប់ការចាក់ផ្សាយបទចម្រៀងនេះចាប់ពីថ្ងៃជូនដំណឹងនេះតទៅ។
យោងតាមតំណភ្ជាប់ Youtube ដែលបង្ហាញនៅក្នុងលិខិតរបស់រដ្ឋមន្ត្រីព័ត៌មាន និងរដ្ឋមន្ត្រីការងារ បទ «សល់តែចិត្តស្មោះ» ត្រូវបានបង្ហោះនៅលើ Youtube តាំងពីឆ្នាំ២០០៩ មកម្ល៉េះ ដោយបទនេះយកតាមលំនាំបទ «ទឹកភ្នែកស្វាមី ស្រីឡង់សេ»។ បទនេះរៀបរាប់ពីនារីម្នាក់ចាញ់បោកគេ ដែលត្រូវបានកុហកថា ទៅធ្វើការងារតាមផ្ទះ តែបែរក្លាយជាស្ត្រីរងគ្រោះ នៃជួញដូរផ្លូវភេទទៅវិញ។