header ads

Sponsor

អាម៉ាប៉ាប៉ាញ៉ូស

​ភ្នំពេញៈ ក្មេង​ៗកម្មករ​ប្រុស​ស្រី​ទាំង​១៥​នាក់ បាន​នាំ​គ្នា​មក​ដាក់​ពាក្យបណ្តឹង​នៅ​ប៉ុស្តិ៍​នគរបាល​ស្ទឹង​មាន​ជ័យ​១ ប្តឹង​លោក​ថៅកែ​ប្រុស​ឈ្មោះ ធួ​ក គួ​ង ភេទ​ប្រុស អាយុ​៥៥​ឆ្នាំ ពី​បទ​ប្រើ​អំពើ​ហិង្សា ក្រោយ​ពេល​ដាក់​ពាក្យបណ្តឹង​ចប់​សព្វគ្រប់​ហើយ លោកស្រី​ ហ៊ុន ចាន់​ថុ​ល បាន​ផ្តល់​រថយន្ត​ដឹក​ជញ្ជូន​ក្មេង​ប្រុស​ស្រី​ទាំង​១៥​នាក់ និង​ផ្តល់​ថវិកា​ក្នុង​ម្នាក់​ៗ១០​ម៉ឺន​រៀល និង​ឲ្យ​ក្រុមការងារសហការជាមួយក្រុមអ្នកសារព័ត៌មានជួយ​​នាំ​ក្មេង​ៗ​ទាំងនោះ​ត្រឡប់​ទៅ​ស្រុក​កំណើត​វិញ​ផង​ដែរ។

សូមបញ្ជាក់ថា ​បុគ្គលិក​សិប្បកម្ម​ធ្វើ​នំ​ពង​ទា​ចំនួន​១៤​នាក់ ក្នុង​ចំណោម​បុគ្គលិក​ជាង​៣០​នាក់ ត្រូវ​បាន​ថៅកែ​ប្រដេញ​ចេញពី​កន្លែង​ទាំង​យប់ ថែម​ទាំង​មិន​ព្រម​បើក​ប្រាក់ខែ​ឲ្យ និង​បាន​ប្រើប្រាស់​អំពើ​ហិង្សា​ទៅ​លើ​បុគ្គលិក​ទាំងនោះ​ថែម​ទៀត​ផង។ ហេតុការណ៍​នេះ​កើតឡើង​កាលពី​វេលា​ម៉ោង​១០​យប់​ថ្ងៃ​ទី​៣១ ខែសីហា ឆ្នាំ​២០១៨ ត្រង់​ចំណុច​សិប្បកម្ម​ធ្វើ​នំ​ពង​ទាយី​ហោ ឡាយ គាង​ហួរ ស្ថិត​តាម​បណ្តោយ​ផ្លូវលំ ក្រុម​ទី​១ ភូមិ​មាន​ជ័យ សង្កាត់​ស្ទឹង​មាន​ជ័យ​ទី​១ ខណ្ឌមានជ័យ ។

ក្មេង​ប្រុស​ស្រី​ទាំង​១៤​នាក់​ខាងលើ ​បាន​រៀបរាប់​ឲ្យ​ដឹង​ថា ពួក​គេ​ទាំងអស់​គ្នា ​គឺ​មានស្រុក​កំណើត​នៅ​ស្រុក​ត្រាំកក់ ខេត្តតាកែវ ហើយ​ពួក​គាត់​មក​ធ្វើការ​នៅ​សិប្បកម្ម​ធ្វើ​នំ​ខាងលើ​នេះ ទើបតែ​បាន​បួន​ថ្ងៃ​នោះ​ទេ។

ពួកគេបន្តថា មុន​ពេល​កើតហេតុ ​យុវតី​ម្នាក់ឈ្មោះ ហៃ នី​តា អាយុ​១៦​ឆ្នាំ ជា​អ្នកធ្វើការ​ជាមួយ​គ្នា​ និង​បងស្រី​នាង​ម្នាក់​ទៀត​​បាន​យក​ខោអាវ ​ដែល​បោក​រួច​ទៅ​ហាល​នៅ​ខាងលើ​ដំបូលផ្ទះ ក្នុង​សិប្បកម្ម​ខាងលើ ។ បន្ទាប់​មក​ក៏​មាន​យុវជន​ម្នាក់​ទៀត ឈ្មោះ សឹង រត្ន​ណា​ក់ អាយុ​១៨​ឆ្នាំ  ជា​បុគ្គលិក​ធ្វើ​នំ​នៅ​កន្លែង​កើតហេតុ​ ក៏​បាន​ទៅ​ឈរ​និយាយ​គ្នា​លេង និង​ជួយ​ហាល​ខោអាវ​យុវតី​ខាងលើ ក្នុង​នាម​ជា​អ្នក​ភូមិ​ផង​របង​ជាមួយ​និង​ធ្វើការ​ជាមួយ​គ្នា ។ លុះដល់​វេលា​កើតហេតុ​ ថៅកែ និងជា​​ម្ចាស់​សិប្បកម្ម​ធ្វើ​នំ​ពង​ទា​ខាងលើ​បាន​ឡើង​មក​ខាងលើ​ដំបូលផ្ទះ​ឃើញ​យុវជន និង​យុវតី​ទាំង​ពីរ​នាក់​នោះ​កំពុង​ឈរ​និយាយ​គ្នា​លេង ស្រាប់តែ​បុរស​ជា​ថៅកែ​ខាងលើ​បាន​ស្ទុះ​មក​វាយ​យុវតី​ខាងលើ​មួយ​កំភ្លៀង​ចំ​ថ្ពាល់​ខាងឆ្វេង​បណ្តាល​ឲ្យ​ហើម ដោយ​ចោទ​ពួក​គេ​ទាំង​ពីរ​នាក់​ថា មាន​លួចលាក់​ស្នេហា​នៅ​ក្នុង​សិប្បកម្ម​របស់​ខ្លួន។ រួច​ក៏​បាន​ប្រដេញ​យុវជន​ខាងលើ​ចេញពី​រោង​សិប្បកម្ម​ទាំង​យប់ ​ដោយ​ថែម​ទាំង​ស្រែក​ចោទ​យុវជន​ខាងលើ​ថា ជា​ចោរ​ទៀត​ផង។ បង្ក​ឲ្យ​មានការ​ភ្ញាក់ផ្អើល​ដល់​បុគ្គលិក​ដែល​ធ្វើការ​នៅ​កន្លែង​កើតហេតុ​នាំ​គ្នា​ចេញ​មក​មើល។

បន្ទាប់​មក​ថៅកែ​រូប​នោះ​បាន​ដេញ​បុគ្គលិក​ផ្សេង​ទៀត​ឲ្យ​ចូល​ទៅ​ក្នុង​សិប្បកម្ម​នោះ​វិញ​រួច​ក៏​ទាញ​ទ្វាររបង​បិទ។ ហើយ​បុរស​ដែល​ជា​ថៅកែ​រូប​នោះ​បាន​ស្រែក​ដាក់​ទៅ​បុគ្គលិក​ទាំងអស់​ថា ​«​បើ​អាណា​ចង់​ចេញ​ទៅ​វិញ​ចេញ​ទៅ យប់​នេះ​ឲ្យ​ហើយ តែ​ត្រូវ​បង់លុយ​ឲ្យ​រូបគេ ​ដែល​ជា​ថៅកែ​ក្នុង​ម្នាក់​ចំនួន​២០​ដុល្លារ ទើប​អាច​ចេញ​បាន ហើយ​បើ​អាណា​ហ៊ាន​ផ្លោះ​របង​អញ និង​ប្រាប់​ប៉ូលិស​ឲ្យ​ចាប់​ដាក់គុក។

ការ​ឈ្លោះប្រកែក​គ្នា​រវាង​បុគ្គលិក​ ដែល​ទើប​ចូល​មក​ធ្វើការ និង​បុរស​ជា​ថៅកែ​ក៏​បាន​ប្រដេញ​បុគ្គលិក ​ដែល​ទើប​ចូល​មក​ធ្វើការ​ខាងលើ​ ឲ្យ​ចេញ​ទៅ​ខាងក្រៅ​ រួច​បិទទ្វារ​របង​ចាក់សោ​ជិត ដោយ​មិន​យក​អ្វី​ចេញ​ទៅ​ទាំងអស់ សូ​ម្បី​តែ​ខោអាវ​របស់​ពួក​គេ។ ដោយឡែក​បុគ្គលិក​ផ្សេង​ទៀត​ ដែល​ត្រូវ​មិន​បាន​ថៅកែ​ខាងលើ​ប្រដេញ​ចេញ គឺ​បាន​នាំ​គ្នា​ទៅ​ស​ង្ងំ​ដេក​នៅ​ខាងក្នុង​បាត់​អស់​ទៅ ។ បន្ទាប់​មក​ពួក​គាត់​ជា​បុគ្គលិក ​ដែល​ត្រូវ​បាន​ថៅកែ​ដេញ​ចេញ​ខាងលើ ​បាន​រាយការណ៍​ជូន​ទៅ​សមត្ថកិច្ច​មូលដ្ឋាន​ឲ្យ​ចុះ​មក​ជួយ​អន្តរាគមន៍ ​ខណៈ​ពេល​ដែល​សមត្ថកិច្ច​មូលដ្ឋាន​ បាន​ចុះ​មក​ដល់​ចំណុច​កើតហេតុ​ ទើប​បុរស​ដែល​ជា​ថៅកែ​ព្រម​ប្រគល់​របស់របរ​មក​ឲ្យ​បុគ្គលិក​ទាំង​១៤​នាក់​ខាងលើ​វិញ ប៉ុន្តែ​មិន​ព្រម​បើក​ប្រាក់ខែ ​ដែល​បុគ្គលិក​ទាំង​អស់នោះ​ធ្វើ​បាន​ចំនួន​៤​ថ្ងៃ​មក​ឲ្យ​ពួក​គេ​ទាំង​១៤​នាក់​នោះ​ទេ។

ក្រោយ​ពេល​កើតហេតុ​ដោយ​ក្តី​អាណិតអាសូរ​ ក៏​មាន​ប្រជាពលរដ្ឋ​ខ្លះ​បាន​ជួយ​ជា​លុយ​បន្តិចបន្តួច និង​ខ្លះ​ទៀត​ជួយ​ជា​គ្រឿង​បរិភោគ​ទៅ​បុគ្គលិក ​ដែល​ត្រូវ​ថៅកែ​ដេញ​ចេញ​ដូច​ជា​សត្វ​ធាតុ​ខាងលើ សម្រាប់​ជា​សា​ហ៊ុយ​ទៅ​ស្រុក​វិញ។ បន្ទាប់​មក​បុគ្គលិក​ប្រុស​ស្រី​ទាំង​១៤​នាក់​នោះ​បាន​នាំ​គ្នា​ចេក​ចេញពី​សិប្បកម្ម​កើតហេតុ​ខាងលើ ទៅ​រក​កន្លែង​សម្រាក​មួយ​យប់​សិន​រង់ចាំ​ព្រឹកស្អែក​ទៅ​ធ្វើការ​ដាក់​ពាក្យបណ្ដឹង ហើយ​ត្រឡប់​ទៅ​ស្រុក​កំណើត​វិញ។

គួរ​បញ្ជាក់​ថា សិប្បកម្ម​កើតហេតុ​ខាងលើ គឺ​សង្កេត​ឃើញ​មាន​កុមារ​អាយុ​ក្រោម​១៨​ឆ្នាំ ដែល​មិន​ទាន់​គ្រប់​អាយុ​បំពេញការងារ​បាន​មក​បម្រើ​ការងារ​នៅ​ក្នុង​សិប្បកម្ម​ខាងលើ​ជា​ច្រើននាក់  ដូច្នេះ​យើង ​សង្ឃឹមថា សមត្ថកិច្ច​ក៏​ដូច​ជា អាជ្ញាធរ​ពាក់ព័ន្ធ និង​មាន​ចំណាត់ការ​ទៅ​លើ​សិប្បកម្ម​ខាងលើ ។

ក្រោយ​ពេល​ថៅកែ​ប្រុស​បាន​ទះកំផ្លៀង​លើ​ក្មេង​ស្រី និង​ស្តីបន្ទោស​កម្មករ​ទាំង​កណ្តាល​យប់​ផ្អើល​​ដល់​ក្រុម​អ្នក​សារ​ព័​ត៌មានយើងជាច្រើនស្ថាប័ន​ចុះ​ទៅ​ផ្តិតរូប និង​ធ្វើការ ​Live​ ផ្ទាល់ ​ផ្អើល​ដល់​លោក​ស្រី ​ហ៊ុន ចាន់​ថុ​ល ក្មួយស្រី​បង្កើត​សម្ដេចតេជោ​ បាន​ឲ្យ​ក្រុមការងារ​ចុះ​ទៅកន្លែងកើតហេតុ​ភ្លាមៗ​ ដើម្បី​​រំដោះ​យក​កម្មករ​ប្រុស​ស្រី​ចំនួន​១៥​នាក់​យក​មក​ស្នាក់​នៅផ្ទះ​សំណាក់​បណ្តោះអាសន្ន​មួយ​យប់សិន នៅ​ឯ​ខណ្ឌចំការមន។ ​លុះ​ស្អែកឡើងវេលា​ម៉ោង​២​រសៀល​ថ្ងៃ​ទី​១ ខែកញ្ញា ឆ្នាំ​២០១៨ ក្មេង​កម្មករ​ប្រុស​ស្រី​ទាំង​១៥​នាក់ បាន​នាំ​គ្នា​មក​ដាក់​ពាក្យបណ្តឹង​នៅ​ប៉ុស្តិ៍​នគរបាល​ស្ទឹង​មាន​ជ័យ​១ ប្តឹង​លោក​ថៅកែ​ប្រុស​ឈ្មោះ ធួ​ក គួ​ង ភេទ​ប្រុស អាយុ​៥៥​ឆ្នាំ ពី​បទ​ប្រើ​អំពើ​ហិង្សា ។

ក្រោយ​ពេល​ដាក់​ពាក្យបណ្តឹង​ចប់​សព្វគ្រប់​ហើយ លោកស្រី​ ហ៊ុន ចាន់​ថុ​ល បាន​ផ្តល់​រថយន្ត​ដឹក​ជញ្ជូន​ក្មេង​ប្រុស​ស្រី​ទាំង​១៥​នាក់ និង​ផ្តល់​ថវិកា​ក្នុង​ម្នាក់​ៗ១០​ម៉ឺន​រៀល និង​ឲ្យ​ក្រុមការងារសហការជាមួយក្រុមអ្នកសារព័ត៌មានយើង ជួយ​​នាំ​ក្មេង​ៗ​ទាំងនោះ​ត្រឡប់​ទៅ​ស្រុក​កំណើត​វិញ​ផង​ដែរ ។

បច្ចុប្បន្ន​នេះក្រុមអ្នកសារព័ត៌មាន រួមជាមួយនិងក្រុមការងាររបស់លោកស្រី​​ ហ៊ុន​ ចាន់ថុល បានជូនក្មេងប្រុសស្រីទាំង១៥នាក់នោះ ទៅដល់ស្រុកកំណើតវិញ​ ដោយសុវត្ថិភាពហើយ​ នៅវេលាម៉ោង​ជិត៨យប់ ថ្ងៃដដែល ហើយជាចុងក្រោយ​ក្មេងៗបាននាំគ្នាសម្ដែងការអរគុណទាំងអារម្មណ៍រំភើប​ និង​ក្ដុកក្ដួល​ចង់ស្រក់ទឹកភ្នែក ចំពោះទឹកចិត្តសប្បុរសធម៌ដ៏ជ្រាលជ្រៅបំផុត របស់លោកស្រី​​ ហ៊ុន​ ចាន់ថុល ក្មួយស្រី​បង្កើត​សម្ដេចតេជោ​ ដែលបាន​ជួយ​ឧបត្ថម្ភ​ជ្រោមជ្រែង​ផ្ដល់​ថវិកា​ តាមរយៈ​ក្រុមការងារ​របស់លោកស្រី​ ចុះមកសហការជាមួយក្រុមអ្នកសារព័ត៌មាន រហូតបានជួយ​​ជូនពួកគេ​​ត្រឡប់​ទៅ​ស្រុក​កំណើត​វិញ​ ប្រកបដោយ​សុវត្ថិភាព៕

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post