លោកទេសរដ្ឋមន្ដ្រី គន់ គីម បានបន្ដផ្ដល់ប័ណ្ណបេឡាជាតិរបបសន្ដិសុខសង្គម (បសស) ជូនសមាជិកអតីតយុទ្ធជននៅខេត្តសៀមរាប ចំនួន៤ ៥៦៥នាក់ កាលពីថ្ងៃទី២២ ខែកញ្ញា ឆ្នាំ២០១៨ នៅសាលាក្រុងសៀមរាប ខេត្តសៀមរាប ។ ក្នុងពិធីក៏មានការចូលរួមពីថ្នាក់ដឹកនាំ និងអ្នកពាក់ព័ន្ធជាច្រើននាក់ផងដែរ។ នេះបើយោងតាមហ្វេសប៊ុក ភាតរភាពយុទ្ធជន។
ថ្លែងក្នុងពិធីនោះដែរ ឯកឧត្តមទេសរដ្ឋមន្រ្តី គន់ គីម បាននាំមកនូវការផ្តាំផ្ញើសួរសុខទុក្ខពីសម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជាប្រធានសមាគមអតីតយុទ្ធជនកម្ពុជា ជូនដល់សមាជិកទាំងអស់ផងដែរ។
ឯកឧត្តមទេសរដ្ឋមន្រ្តី គន់ គីម បានបញ្ជាក់ថា៖ ដោយការយកចិត្តទុកដាក់ និងគិតគូរខ្ពស់របស់សម្តេចតេជោ ចំពោះសមាជិក ទើបថ្ងៃនេះ សមាជិកនៅក្នុងខេត្តសៀមរាបទទួលបានប័ណ្ណបេឡាជាតិរបបសន្តិសុខសង្គម សម្រាប់ការព្យាបាលជំងឺដោយមិនអស់លុយនៅតាមមន្ទីរពេទ្យ។
ជាចុងក្រោយ លោកទេសរដ្ឋមន្ដ្រី បានផ្តាំផ្ញើឱ្យថ្នាក់ដឹកនាំសមាគមអតីតយុទ្ធជន គ្រប់ថ្នាក់ត្រូវវខិតខំបន្តទ្វេដងមើលថែ និងជួយដោះស្រាយការលំបាករបស់សមាជិកសមាគមអតីតយុទ្ធជន ឱ្យបានទាន់ពេលវេលា។
សូមរំលឹកថា កាលពីថ្ងៃទី២១ ខែកញ្ញា ឆ្នាំ២០១៨ ឯកឧត្តមទេសរដ្ឋមន្ត្រី គន់ គីម បន្តចុះផ្តល់ប័ណ្ណ បេឡាជាតិរបបសន្តិសុខសង្គម (ប.ស.ស.) ជូនដល់អតីតយុទ្ធជនកម្ពុជាខេត្តតាកែវចំនួន២ ៥២៨នាក់។