Monday, September 3, 2018

អាយុទើប៣ឆ្នាំ ត្រូវឪពុកបង្កើត ប្រើហិង្សារហូតឈាមកកក្នុងកែវភ្នែក និងជាំក្រោមភ្នែក ទើបបែកធ្លាយសមត្ថកិច្ចជួយរំដោះ

អាម៉ាប៉ាប៉ាញ៉ូស

ភ្នំពេញៈ ពិតជាសាហាវមែន! ក្មេង​ស្រី​អាយុ៣ឆ្នាំជាង​ ត្រូវឪពុកបង្កើតប្រើហិង្សា រហូតមានឈាមកកខ្មៅ ក្នុងភ្នែក​ និងជ្រាំក្រោមភ្នែក​ នៅបន្ទប់ជួល លេខA8 ភូមិដំណាក់ធំ សង្កាត់ស្ទឹងមានជ័យ​១ ខណ្ឌមានជ័យ​ រាជធានីភ្នំពេញ ហើយត្រូវបានអ្នកជិតខាងដែលឃើញក្មេងរងរបួសភ្នែកខ្លាំងពេក ទើបរាយការណ៍ប្រាប់វិទ្យុ ABC នូវទង្វើដ៏កាចសាហាវនេះ ដែលបានកើតឡើងច្រើនដងមកហើយនោះ ។

នៅវេលាម៉ោង៥ល្ងាច ថ្ងៃទី២ ខែកញ្ញា ឆ្នាំ២០១៨ ក្រុមការងារវិទ្យុABC ​សហការគ្នា​ជាមួយកម្លាំងកងរាជអាវុធហត្ថរាជធានីភ្នំពេញ បានចុះទៅអន្តរាគមន៍ ជួយរំដោះក្មេងស្រី ចេញពីផ្ទះជួលកើតហេតុ និងនាំទៅស្នាក់នៅវិទ្យុ ABC បណ្ដោះអាសន្ន​សិន ចំណែកឯបុរសជាឪពុក ត្រូវបានកម្លាំងកងរាជអាវុធហត្ថរាជធានីភ្នំពេញ ចុះមកឃាត់ខ្លួនយកទៅបញ្ជការដ្ឋានអាវុធហត្ថរាជធានី ដើម្បីសាកសួរ ។

ក្មេងស្រីរងគ្រោះឈ្មោះ ចាន់ ណា​ អាយុ៣ឆ្នាំ និងមានបងប្រុសបង្កើតម្នាក់ទៀត អាយុ៨ឆ្នាំ ស្នាក់នៅបន្ទប់ផ្ទះជួលកើតហេតុខាងលើជាមួយគ្នា ចំណែកឪពុកចិត្តសាហាវខាងលើឈ្មោះ អ៊ុក​ ផាន់ណា អាយុ៣០ឆ្នាំ​ ស្នាក់នៅផ្ទះជួលកើតហេតុ​ និងមានស្រុកកំណើតនៅឯខេត្តកំពង់ស្ពឺ ។

តាមការរៀបរាប់របស់ក្មេងប្រុសដែលជាបងបង្កើតក្មេងស្រីរងគ្រោះទាំងអួលដើមក ចំពោះមុខសមត្ថកិច្ច និងក្រុមការងារវិទ្យុ ABC ថា​ កន្លងមក​ រូបគេក៏ធ្លាប់ត្រូវបានឪពុកវាយដែរ លុះនៅយប់កើតហេតុ មូលហេតុ​ដែលគាត់វាយនោះ គឺដោយសារតែ នៅមុនពេលកើតហេតុ​ ​ប៉ាមកពីធ្វើការវិញ​ ហើយផឹកស្រា​ស្រវឹង​ លុះវេលាយប់បន្តិច មិនដឹងថា ប្អូនស្រីឈឺអីទេ ស្រាប់តែក្អក​ខ្លាំងៗ និងធ្វើទុក្ខ​បម្រុង​ក្អួតចង្អោរ​ទៀត ទើបធ្វើឲ្យប៉ា ដេកមិនបាន ហើយភ្ញាក់មកវាយយក៍ៗម៉ង ដោយភ័យខ្លាច ប៉ាផង ប្អូនស្រីរបស់ខ្លួនក៏សង្ងំយំរហូតគេងលក់បាត់តែម្តង​ ។

លុះស្អែកឡើង ទើបបានប្រជាពលរដ្ឋជិតខាងឃើញមានស្នាមជាំភ្នែកទាំងសងខាងបែបនេះ ទើបនាំគ្នាសួរនាំ​ហើយក្មេងស្រីរងគ្រោះឆ្លើយថា​ ប៉ាវាយ​ ហើយបានថតរូបទុក ហើយក្មេងស្រីរងគ្រោះ ក៏ចេញទៅរត់លេង​ក្បែរៗនោះ ជាមួយក្មេងដទៃទៀត ទើបពួកគាត់ដែលជាអ្នកជិតខាង បានរាយការណ៍ប្រាប់វិទ្យុ ABC អំពីទង្វើដ៏កាចសាហាវនេះ បានកើតឡើងច្រើនដងមកហើយ​ ។

ក្រោយពីទទួលបានព័ត៌មានហើយ ក្រុមការងារវិទ្យុ ABC បាន​សហការជាមួយកម្លាំងកងរាជអាវុធហត្ថរាជធានីភ្នំពេញ ដើម្បីស៊ើបសួររកផ្ទះកើតហេតុសិន លុះស្អែកឡើង បានដឹងដំណឹងថា​ បុរសជាឪពុកមកផ្ទះវិញ ក៏ចុះទៅបន្ទប់ជួលកើតហេតុនោះ ដោយកម្លាំងអាវុធហត្ថរាជធានីភ្នំពេញ បានឃាត់ខ្លួន​បុរសជាឪពុក រួចនាំយកទៅសាកសួរ​នៅ​បញ្ជាការ​អាវុធហត្ថ​រាជធានី​ ចំណែកក្មេងស្រីរងគ្រោះ ត្រូវបានរំដោះចេញមក រួមទាំងក្មេងប្រុសអាយុ៨ឆ្នាំម្នាក់ទៀត ដែលជាបងបង្កើតរបស់ក្មេងស្រីរងគ្រោះនោះ រួចនាំឡើងរថយន្ត​អន្តរាគមន៍​វិទ្យុ ABC ដែលជាអំណោយសម្ដេច​ ធ្វើដំណើរទៅវិទ្យុ ABC ដើម្បីឲ្យក្មេងទាំង២នេះគេងមួយយប់សិន​​ ។

បច្ចុប្បន្ន​បុរសជាឪពុកកំពុងត្រូវនាំយកទៅសាកសួរបំភ្លឺ​ នៅអាវុធហត្ថរាជធានីភ្នំពេញ ដោយមិនទាន់​ទទួលបាន​ កំណត់ហេតុដែលបុរសជាឪពុកនោះឆ្លើយបំភ្លឺយ៉ាងណានោះទេ ខណៈដែលផ្នែកជំនាញអាវុធហត្ថ​ កំពុងបន្តសាកសួរនៅឡើយ ៕

@Amapapa.News

Feature Ads