Sunday, September 9, 2018

ថាម៉េច នាង​ហ្គិច​ ដែលល្បីជើងខ្លាំង និងធ្លាប់​មាន​រឿង​អាស្រូវ​ជាច្រើននោះ ជាប់គុកហើយ នៅវៃ​គ្នា​ផ្អើល​ពន្ធនាគារ​ខេត្ត​កណ្ដាលទៀត​ ?

អាម៉ាប៉ាប៉ាញ៉ូស

កណ្ដាល​៖ នៅថ្ងៃទី ០៩ ខែ កញ្ញានេះ ស្ត្រី​ឈ្មោះ​ កែវ​ រតនៈ​ ហៅ​ ហ្គិច​ ដែល​ធ្លាប់​មាន​រឿង​អាស្រូវ​ជាច្រើន ​និង​ កំពុង​ជាប់​ពន្ធនាគារ​​ ,​ ឥឡូវ​នេះ​មានការភ្ញាក់ផ្អើលជាថ្មី ទាក់ទងនឹងការ​បង្ក​ហិង្សា​ នៅពន្ធនាគារខេត្តកណ្ដាល​នេះផ្ទាល់តែម្ដង​។

បើតាមប្រភព​ព័ត៌មាន​ច្បាស់ការណ៍​មួយ​ចេញ​ពី​ពន្ធនាគារ​ខេត្ត​កណ្ដាល​ បង្ហើបប្រាប់សារព័ត៌មានថា ​នៅ​ថ្ងៃទី​៩​ ខែ​កញ្ញា​ នេះ​ ថា​ នាង​ហ្គិច​ ដែល​កំពុងជាប់ពន្ធធនាគារ ពីបទ ប្រើប្រាស់ឯកសារសាធារណៈក្លែង គំរាមកំហែងថា នឹងសម្លាប់ ធ្វើឲ្យខូចខាតដោយចេតនា មានស្ថានទម្ងន់ទោស ដោយដុត​រោងចក្រ​ នោះ​ បាន​វៃ​តប់​គ្នា​ជាមួយ​អ្នក​​ទោស​ដូចគ្នា​ ។

ក្រោយ​ពីមានការបង្កហិង្សាខាងលើមក​ អនុប្រធាន​ពន្ធនាគារ​ទទួល​ផែន​សន្តិសុខ​ ឈ្មោះ​ ហឿន​ វណ្ណារិទ្ធ​ បាន​ចូល​ទៅ​ឃាត់​ ដើម្បីកុំ​ឱ្យ​មាន​ការ​វៃតប់​គ្នា ប៉ុន្តែ​ក្រោយ​មក​បែរជាត្រូវបាន នាង​ហ្គិច​ បាន​ចោទប្រកាន់​ ឈ្មោះ​ ណារិទ្ធ​ ថា​ បាន​ប្រើ​ហិង្សា​លើ​នាងទៅវិញ​ ហើយ​នាងក៍បាន​ប្តឹង​ទៅ​តុលាការ​រាជធានី​ភ្នំពេញ​ ទៀតផង​ ។

ទោះបី​យ៉ាងណា​ នៅ​ដដែលនេះ​ សារព័ត៌មាននៅ​ពុំ​ទាន់​អាច​ទំនាក់ទំនង ​លោក​ ចាត​ ស៊ីនាង​ ប្រធាន​ពន្ធនាគារ​ខេត្ត​កណ្ដាល​ បានទេ​ ដោយសារ​ទូរស័ព្ទ​មិន​អាច​ទំនាក់ទំនង​បាន​ ។

សូមជម្រាបជូនថា លោក អីុ សុវណ្ណ ចៅក្រមសើុបសួរសាលាដំបូងខេត្តកណ្តាល បានសម្រេចចេញដីការឃុំខ្លួនស្ត្រីម្នាក់ ឈ្មោះ កែវ រតនៈ ហៅហ្កេច ដែលធ្លាប់មានរឿងអាស្រូវជាច្រើន និងធ្លាប់ជាប់ ពន្ធនាគារផងនោះ ដាក់ពន្ធនាគារបណ្តោះអាសន្នបីបទល្មើស” ប្រើប្រាស់ឯកសារសាធារណៈក្លែង គំរាមកំហែងថា នឹងសម្លាប់ ធ្វើឲ្យខូចខាតដោយចេតនា មានស្ថានទម្ងន់ទោស ដោយសារការប្រើប្រាស់វិធីគ្រោះថ្នាក់ដល់បុគ្គល ប្រព្រឹត្តនៅចំណុចរោងចក្រផលិតគ្រឿងសង្ហារឹម និងក្តាកុងផ្លាកេប្រាយវ៉េ ហ្វើនីឈ័រ ភូមិទឹកជា ឃុំពើក ស្រុកអង្គស្នូល ខេត្តកណ្តាល នៅព្រឹកថ្ងៃទី១៨ ខែមេសា ឆ្នាំ២០១៨ តាមមាត្រា៧៨ ច្បាប់ស្ដីពីចរាចរណ៍ផ្លូវគោក និងមាត្រា៦៣០, ២៣៣, ៤១៣ នៃ ក្រមព្រហ្មទណ្ឌ ។

ជនត្រូវចោទមានឈ្មោះ កែវ រតនៈ ហៅហ្គេច ភេទស្រី អាយុ៣៨ឆ្នាំ ជនជាតិខ្មែរ មានទីលំនៅបច្ចុប្បន្នសង្កាត់ទឹកល្អក់៣ ខណ្ឌទួលគោក រាជធានីភ្នំពេញ ។

គួរបញ្ជាក់ថា នៅមុនពេលកើតហេតុ គឺសមត្ថកិច្ចទទួលព័ត៌មានថា មានករណីអគ្គិភ័យឆាបឆេះបានកើតឡើង ទើបសមត្ថកិច្ច និងប្រជាពលរដ្ឋបានជួយពន្លត់ដោយប្រើរថយន្តពន្លត់អគ្គិភ័យ របស់ទ័ពឆត្រយោង៩១១ អស់ពីរគ្រឿង ប្រើប្រាស់ឡានទឹកអស់៦គ្រឿង ទើបរលត់ជាស្ថាពរ ។

តាមសាក្សីបំភ្លឺឈ្មោះ ឃឿន ធឿន ភេទប្រុស អាយុ៣៨ឆ្នាំ ជាកម្មករ បានឃើញរថយន្តមួយគ្រឿង មានគ្នា៤ទៅ៥នាក់ ចូលទៅដុតឈើ ហើយបានគំរាមមិនឲ្យចូលពន្លត់ភ្លើងកំពុងឆេះនោះទេ ដោយប្រពន្ធម្ចាស់រោងចក្រ ឈ្មោះ កែវ រតនៈ ហៅហ្គិច បើកបររថយន្តម៉ាកឡិចស៊ីស ៥៧០ ស៊េរីឆ្នាំ២០១៧ ពាក់ស្លាកលេខ ខម-៦៧៦២ បន្ទាប់ពីបង្កហេតុរួច នាងហ្គិច បើកឡានរត់គេចខ្លួន តែត្រូវសមត្ថកិច្ចចាប់បានមកវិញ ។

នេះពុំមែនជាលើកទី១ទេ ដែលស្ត្រីឈ្មោះ កែវ រតនៈ ហៅ ហ្គិច បានបង្កការអុកឡុកធ្វើឲ្យភ្ញាក់ផ្អើលដល់សង្គមនោះ។ កាលពីដប់ឆ្នាំមុនស្ត្រីរូបនេះ ធ្លាប់បានដកកាំភ្លើងបាញ់គំរាមពលរដ្ឋ នៅជិតវត្តសន្សំកុសល ហើយត្រូវបានតុលាការផ្តន្ទាទោស ពីបទបាញ់បោះសេរី និងប្រើប្រាស់អាវុធខុសច្បាប់។ ក្រោយមកចុងឆ្នាំ២០១៦កន្លងទៅស្ត្រីរូបនេះ បានបើកបរក្រោមឥទ្ធិពលគ្រឿងស្រវឹងបង្កគ្រោះថ្នាក់ធ្ងន់ធ្ងរដល់យុវជនពីររូប ត្រូវបានតុលាការសម្រេចឃុំខ្លួនដាក់ពន្ធនាគារផងដែរ៕

@Amapapa.News

Feature Ads