នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានចាត់តាំងក្រុមការងារ ដើម្បីចុះជួយដឹកនាំពង្រឹងការងារសន្តិសុខ សណ្ដាប់ធ្នាប់ និងរបៀបរៀបរយសង្គម នៅខេត្តព្រះសីហនុ ដែលមាន នាយឧត្តមសេនីយ៍ ថោង លីម អគ្គស្នងការរង នៃអគ្គស្នងការនគរបាលជាតិជាប្រធាន ក្រុមការងារនេះអមដោយមន្រ្តីជាន់ខ្ពស់១០រូបផ្សេងទៀត ។ នេះបើយោងតាមលិខិតបង្គាប់ការ របស់អគ្គស្នងការនគរបាលជាតិចុះថ្ងៃទី៣១ ខែសីហា ឆ្នាំ ២០១៨ ។
ការចាត់តាំងក្រុមការងារនេះដើម្បីឆ្លើយតបទៅនឹងរឿងអវិជ្ជមានដែលបានកើនមានគួរឱ្យបារម្ភ។ ជាញឹកញ៉ប់ មានសេចក្តីរាយការពីការបង្កភាពអសន្តិសុខ សំណាក់ជនជាតិចិន ដូចជាការបើកបរបង្កមានគ្រោះថ្នាក់ចរាចរណ៍ ការបង្កហិង្សា អំពើចោរកម្មជាដើម។
នៅខេត្តព្រះសីហនុ របាយការណ៍ខ្លះបានប៉ាន់ស្មានថា ជនជាតិចិន មានប្រមាណជាង ២០ភាគរយនៃប្រជាជន សរុប កើនឡើងប្រហែល ១២៦ភាគរយ ធៀបនឹងឆ្នាំ២០១៧។ ការវិនិយោគចិនយ៉ាងច្រើន ជាពិសេស ក្នុងវិស័យអចលនទ្រព្យបានកំពុងរីកដូចផ្សិត។ ទោះជាយ៉ាងណា ការសាងសង់ទីក្រុងទំនើប និងមានតម្លៃថ្លៃ ទាំងនោះ ត្រូវបានអ្នកជំនាញវាយតម្លៃថា មិនស័ក្តិសមនឹងកម្រិតជីវភាពរបស់ពលរដ្ឋកម្ពុជាជាទូទៅនោះទេ តែវាសម្រាប់ជនបរទេសដែលមានលុយច្រើន។
ការវិនិយោគជារួមបានកើនឡើងពីប្រមាណ ២០០លានដុល្លារអាមេរិក ដល់ ៤,៨ពាន់លានដុល្លារអាមេរិក ត្រឹមចន្លោះឆ្នាំ២០១៥ និង២០១៦។
ភ្ញៀវទេសចរចិនច្រើនជាង ១,២លាននាក់ បានមកទស្សនាប្រទេសកម្ពុជា កាលពីឆ្នាំមុន ហើយអាចកើនឡើងដល់ ២លាននាក់នៅឆ្នាំ២០២០។ ធៀបនឹងបណ្តាប្រទេសផ្សេងទៀត ទម្ងន់នៃការវិនិយោគរបស់ចិនមានទំហំធំធេងណាស់។
តែទោះជាយ៉ាងណា នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ បានបញ្ជាក់ថា វត្តមានជនជាតិចិននៅខេត្តព្រះសីហនុ ផ្តល់ផលល្អ ច្រើនជាងផលអាក្រក់។
