គណៈកម្មាធិការគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ដែលមានឯកឧត្តម ជា សុផារ៉ា ជាប្រធាន បានចេញសេចក្តីណែនាំ និងវិធានការស្តីពីការរៀបចំអាងប្រព្រឹត្តកម្មទឹកកខ្វក់ អាងបង្គន់អនាម័យ និងប្រពន្ធលូ សម្រាប់រាល់សំណង់អគារលំនៅឋាន ពាណិជ្ជកម្ម សេវាកម្ម សណ្ឋាគារ ភោជនីយដ្ឋាន និងរោងចក្រ ដែលមានស្រាប់ និង/ឬគម្រោងសាងសង់ថ្មី នៅខេត្តព្រះសីហនុ។ យោងតាមលិខិតចុះថ្ងៃទី១៨ ខែកញ្ញា។
លិខិតដែលបញ្ជូនទៅអភិបាលខេត្តព្រះសីហនុ មានសេចក្តីថា៖ សំណង់អគារលំនៅឋាន និងពាណិជ្ជកម្មទាំងអស់នៅខេត្តព្រះសីហនុ ត្រូវរៀបចំប្រព័ន្ធលូ និងអាងប្រព្រឹត្តកម្មទឹកកខ្វក់ឱ្យបានត្រឹមត្រូវ បើមិនដូច្នោះទេសំណង់ទាំងនោះនឹងត្រូវផ្អាកការសាងសង់ ឬផ្អាកដំណើរការអាជីវកម្មបណ្ដោះអាសន្ន។
លិខិតដដែលបន្តថា៖ រាល់សំណង់អគារលំនៅឋាន ពាណិជ្ជកម្ម សេវាកម្ម សណ្ឋាគារ ភោជនីយដ្ឋាន និងរោងចក្រ ដែលមានស្រាប់ ឬគម្រោងសាងសង់ថ្មី ត្រូវរៀបចំឱ្យមានអាងប្រព្រឹត្តកម្មទឹកកខ្វក់ អាងបង្គន់អនាម័យ និងប្រព័ន្ធលូ ក្នុងទីតាំងដីឡូត៍រៀងៗខ្លួនជាមុន ស្របតាមមុខងារប្រើប្រាស់អគារ និងបទដ្ឋានបច្ចេកទេសសំណង់ និងបរិស្ថានល្អ។ រួចហើយសំណង់ទាំងនោះត្រូវរៀបចំប្រព័ន្ធលូតភ្ជាប់ទឹកកខ្វក់ដែលចម្រោះរួចនេះ ចូលទៅប្រព័ន្ធលូសាធារណៈរបស់ខេត្ត ដែលហូរតភ្ជាប់ទៅស្ថានីយប្រព្រឹត្តកម្មទឹកកខ្វក់របស់ខេត្តព្រះសីហនុ។
គួរបញ្ជាក់ផងដែរថា ពេលថ្មីៗនេះ ឆ្នេរសមុទ្រនៅខេត្តព្រះសីហនុ បានរងការប៉ះពាល់ពីករណីធំៗចំនួនពីរ គឺករណីទី១ ក្រុមហ៊ុនរបស់យាយភូ បានចាក់ដីលុបឆ្នេរព្រែកត្រែង។ និងករណីទី២ ទឹកសមុទ្រមួយផ្នែកបានប្រែជាល្អក់ ដោយអ្នកនាំពាក្យក្រសួងបរិស្ថានប្រាប់ថាព្រោះទឹកភ្លៀវបានហូរយកអាចម៍ដីរបស់ការដ្ឋានសំណង់ចូលសមុទ្រ។
ដោយអនុវត្តតាមបទបញ្ជាដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន កាលពីថ្ងៃទី១៨ ខែកញ្ញា ឆ្នាំ២០១៨ ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ អញ្ជើញចុះត្រួតពិនិត្យសកម្មភាពចាក់ដីរំលោភចូលឆ្នេរសមុទ្រ នៅចំណុចឆ្នេរព្រែកត្រែង ស្ថិតនៅភូមិ៤ សង្កាត់អូរត្រេះ ស្រុកស្ទឹងហាវ ខេត្តព្រះសីហនុ ដើម្បីឱ្យកាយយកដីដែលបានចាក់បំពេញចេញវិញ និងរក្សាឆ្នេរធម្មជាតិដូចដើម។
