ខេត្តព្រះសីហនុ នៅរសៀលថ្ងៃទី៦ ខែកញ្ញា ឆ្នាំ២០១៨ នេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានទទួលជួបគណៈប្រតិភូក្រសួងសន្តិសុខសាធារណៈ របស់ប្រទេសចិន ដឹកនាំដោយ លោក Hu Binchen អគ្គនាយករង នៃអគ្គនាយកដ្ឋានកិច្ចសហប្រតិបត្តិការ អន្តរជាតិ នៃសាធារណរដ្ឋប្រជាមានិតចិន។
គណៈប្រតិភូក្រសួងសន្តិសុខសាធារណៈរបស់ប្រទេសចិនបានមកបំពេញទស្សនកិច្ចផ្លូវការ នៅខេត្តព្រះសីហនុ ព្រមទាំងចូលជួបពិភាក្សាការងារ ជាមួយថ្នាក់ដឹកនាំ នៃគណៈស្នងការនគរបាលខេត្ត។ កិច្ចពិភាក្សាបានផ្តោតការយកចិត្តទុកដាក់ លើការងារសំខាន់ៗ មួយចំនួន ដើម្បីបន្តពង្រឹងកិច្ចសហប្រតិបត្តិការ ជាមួយគ្នា និងបង្កើនការយោគយល់ ផ្លាស់ប្ដូរព័ត៌មាន រវាងនគរបាលខេត្តជាំងស៊ូ (ប្រទេសចិន) និង នគរបាលខេត្តព្រះសីហនុ។
លោកឧត្តមសេនីយ៍ទោ ជួន ណារិន្ទ បានសំដែងនូវការស្វាគមន៍ រីករាយ និងជម្រាបជូនប្រតិភូ អំពីសភាពការណ៍ទូទៅមួយចំនួន ក្នុងខេត្ត ទាំងការងារអភិវឌ្ឍ និងសន្តិសុខជាដើម។
ចំពោះបញ្ហាជនជាតិចិន មកវិនិយោគប្រកបរបររកស៊ី និងធ្វើទេសចរណ៍ នៅខេត្តព្រះសីហនុ លោកឧត្តមសេនីយ៍ទោ បានសង្កាត់ធ្ងន់ថា៖ ថ្នាក់ដឹកនាំ នៃគណៈបញ្ជាការឯកភាពរដ្ឋបាលខេត្តព្រះសីហនុ ក៏ដូចជាគោលនយោបាយ របស់រាជរដ្ឋាភិបាល រដ្ឋធម្មនុញ្ញ នៃព្រះរាជាណាចក្រកម្ពុជា មិនឱ្យមានការរើសអើង ប្រកាន់ពូជសាសន៍ ពណ៌សម្បុរ ឡើយ ជនណាប្រព្រឹត្តខុសច្បាប់ ត្រូវទទួលទោសតាមច្បាប់ដូចៗគ្នា។
ចំណែកឯ លោក Hu Binchen ប្រធានគណៈប្រតិភូ បានកោតសរសើរ ចំពោះការរីកចម្រើន របស់ខេត្តព្រះសីហន និង កោតសរសើរចំពោះកិច្ចខិតខំប្រឹងប្រែងរបស់កងកម្លាំងនគរបាលខេត្តព្រះសីហនុ ក្នុងការការពារថែរក្សាសន្តិសុខសណ្តាប់ធ្នាប់សង្គមកន្លងមកបានល្អប្រសើរ។
លើសពីនេះទៅទៀត លោក Hu Binchen សូមអញ្ជើញថ្នាក់ដឹកនានគរបាលខេត្តព្រះសីហនុ ទៅធ្វើទស្សនកិច្ចនៅខេត្តជាំងស៊ូ ប្រទេសចិន នៅពេលឆាប់ៗខាងមុខនេះ ដើម្បីបន្តកិច្ចសហប្រតិបត្តិការ និង បង្កើនការយោគយល់ ផ្លាស់ប្ដូរចែករំលែកបទពិសោធន៍ទៅវិញទៅមកផងដែរ។