ការបើកសម័យប្រជុំរដ្ឋសភាលើកដំបូងរបស់កម្ពុជាអាណត្តិទី៦ នៅថ្ងៃទី៥ ខែកញ្ញា ឆ្នាំ២០១៨ សភាជាតិកម្ពុជាបានបើកប្រជុំសភានីតិកាលទី៦ ក្រោមព្រះរាជាធិបតីភាពដ៏ខ្ពង់ខ្ពស់របស់ព្រះករុណាព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។
ការប្រជុំលើកដំបូងនេះ មានការចូលរួមពីតំណាងទូតចិន និងប្រទេសមួយចំនួនទៀត ប៉ុន្តែមិនមានវត្តមាននៃតំណាងអង្គទូតរបស់ប្រទេសកាន់លទ្ធិប្រជាធិបតេយ្យធំៗ មកចូលរួមតាមការអញ្ជើញរបស់សភាកម្ពុជាឡើយ។ អវត្តមាននៃតំណាងប្រទេសកាន់លទ្ធិប្រជាធិបតេយ្យក្នុងការប្រជុំសភាលើកដំបូងនៅអាណត្តិនេះ គឺពួកគេភាគច្រើនមិនបញ្ជាក់ពីមូលហេតុឡើយ ខណៈរដ្ឋសភាកម្ពុជាត្រូវកាន់កាប់ដោយគណបក្សតែមួយ គឺគណបក្សប្រជាជនកម្ពុជា។
ឯកឧត្តម ឡេង ប៉េងឡុង អគ្គលេខាធិការរដ្ឋសភា បានបញ្ជាក់ថា រដ្ឋសភាកម្ពុជា បានអញ្ជើញតំណាងស្ថានទូតទាំងអស់ចំនួន៣១ប្រទេសប្រចាំកម្ពុជាឱ្យមកចូលរួមការប្រជុំរដ្ឋសភាលើកដំបូង។ ប៉ុន្តែតំណាងប្រទេសលោកខាងលិច ចំនួន៩មិនបានចូលរួមទេ តំណាងទូតដែលមិនចូលគឺ អាមេរិក កាណាដា បារាំង អង់គ្លេស អាឡឺម៉ង់ អូស្រ្តាលី ស៊ុយអែត ប៊ុលហ្គារី និងទូតសហភាពអ៊ឺរ៉ុប។
អគ្គលេខាធិការរដ្ឋសភា បានសំដែងការសោកស្តាយចំពោះអវត្តមាននៃតំណាងស្ថានទូត និងតំណាងអង្គការអន្តរជាតិធំៗខាងលោកសេរី ដែលមិនមកចូលរួមសង្កេតការណ៍ពេលបើកសម័យប្រជុំសភាលើកដំបូងរបស់កម្ពុជា នៅ ថ្ងៃនេះ។
ក៏ប៉ុន្តែ ឯកឧត្តម ឡេង ប៉េងឡុង បានអះអាងថា ប្រទេសលោកខាងលិច វាយតម្លៃមិនត្រឹមត្រូវចំពោះសភាពការណ៍នៅកម្ពុជា ទើបមិនមកចូលរួមការបើកសម័យប្រជុំសភាលើកដំបូង តាមការអញ្ជើញរបស់រដ្ឋសភាកម្ពុជា។
សហភាពអ៊ឺរ៉ុប មានសមាជិកចំនួន២៨ប្រទេស ដែលសុទ្ធសឹងជាប្រទេសកាន់លទ្ធិប្រជាធិបតេយ្យ។ តែជាមួយគ្នានោះ តំណាងទូតចិនបានចូលរួម ខណៈស្ថានទូតជប៉ុនគ្រាន់តែបញ្ជូនតំណាងបេសកកម្មរបស់ខ្លួនចូលរួម ជំនួសឲ្យឯកអគ្គរាជទូតជប៉ុនប្រចាំកម្ពុជា។ នេះជាការគូសបញ្ជាក់របស់លោក ឡេង ប៉េងឡុង។
ដោយឡែក ក្រៅពីតំណាងអង្គទូត ក៏មានអង្គការអន្តរជាតិចំនួន១១ត្រូវបានអញ្ជើញផងដែរ ប៉ុន្តែអ្នកមកចូលរួមបានតែចំនួន៥អង្គការប៉ុណ្ណោះ។ អង្គការទាំង៥នោះ មានដូចជា UNDP UNFPA UNICEF WHO និង អង្គការខុនរ៉ាត់អាដេណៅអ័ររបស់អាឡឺម៉ង់ ប៉ុន្តែស្ថាប័នរូបិយវត្ថុអន្តរជាតិ (IMF) និងធនាគារពិភាពលោក (World Bank) ជាដើមមិនបានចូលរួមទេ។
សូមរំលឹកថា ប្រទេសប្រជាធិបតេយ្យលោកខាងលិច ដូចជា សហភាពអ៊ឺរ៉ុប កាណាដា អូស្រ្តាលី បារាំង អង់គ្លេស អាមេរិក ជាដើម សុទ្ធតែបានចេញសេចក្តីថ្លែងការណ៍ថាការបោះឆ្នោតនៅកម្ពុជាថ្ងៃទី២៩ កក្កដា មិនអាចជឿទុកចិត្តបាន។
