ព្រះសីហនុៈ ប្រជាពលរដ្ឋក្នុងក្រុងព្រះសីហនុ នៅថ្ងៃទី១៨ ខែកញ្ញា ឆ្នាំ២០១៨នេះ បានសម្ដែងក្ដីព្រួយបារម្ភ ពីពពួកចោរប្រុសស្រី និងក្មេងៗមួយក្រុម តែងតែដើរលួចជាលក្ខណៈគ្រួសារនៅពេលយប់អធ្រាត្រ។
ពលរដ្ឋបានលើកឡើងថា ក្រុមចោរជាលក្ខណៈខាងលើនេះ មានគ្នាចំនួន៥នាក់ ប្រើប្រាស់ម៉ូតូ អូសរ៉ឺម៉ក បាំងស័ង្កសី ហើយមានម៉ូតូ១គ្រឿងទៀតម៉ាក(ស៊ីរ៉ូស)អត់ភ្លើងបំភ្លឺផ្លូវ ជិះគ្នា២នាក់ចាំបិទគូទពីក្រោយ តែងតែចេញធ្វើសកម្មភាពលួចទ្រព្យសម្បត្តិពលរដ្ឋរាល់យប់ ចាប់ពីម៉ោង៣ទៅម៉ោង៤រំលងអធ្រាត ខណៈប្រជាពលរដ្ឋ ក៏ដូចជាសមត្ថកិច្ចកំពុងតែគេងលង់លក់។
ប្រភពពីប្រជាពលរដ្ឋបានឲ្យដឹងទៀតថា ក្រុមចោរខាងលើ ក្រោយធ្វើសកម្មភាពលួចសម្ភារៈ ក៏ដូចជាទ្រព្យសម្បត្តិមានតម្លៃរបស់ប្រជាពលរដ្ឋបានសម្រេចហើយ តែងតែអូសរ៉ឺម៉កជិះចូលច្រកផ្លូវក្រោយផ្សារ(បច្ចុប្បន្នគេហៅថា ផ្លូវក្រោយផ្សារមាន់)។
ជុំវិញបញ្ហាចោរកម្មខាងលើនេះ ប្រជាពលរដ្ឋរស់មូលដ្ឋានខាងលើ សូមសំណូមពរដល់អាជ្ញាធរ សមត្ថកិច្ចពាក់ព័ន្ធទាំងអស់ក្នុងក្រុងព្រះសីហនុ មេត្តាជួយបង្ក្រាប និងទប់ស្កាត់ពពួកក្រុមចោរក្មេងៗប្រុសស្រី លក្ខណៈជាក្រុមខាងលើនេះផង៕
