Monday, September 10, 2018

លោក វន់ ពៅ ចូលតុលាការទាំងព្រឹក ធ្វើជាសាក្សីក្នុងរឿងក្កីលោក កឹម សុខា

អាម៉ាប៉ាប៉ាញ៉ូស

ភ្នំពេញៈ ប្រធាន​សមាគម​សេដ្ឋកិច្ច​ក្រៅ​ប្រព័ន្ធ​ IDEA លោក វន់ ពៅ បានមកដក់សាលាដំបូងរាជធានីភ្នំពេញទាំងព្រឹកតែម្ដង នាថ្ងៃទី១០ កញ្ញា ឆ្នាំ២០១៨ តាមដីកាកោះហៅរបស់លោក​ គី​ ឫទ្ធី​ ចៅក្រម​ស៊ើបសួរ​សាលាដំបូង​រាជធានី​ភ្នំពេញ​ ក្នុង​នាម​ជា​សាក្សី​ ពាក់ព័ន្ធ​សំណុំរឿង​លោក ​កឹម​ សុខា​ ​ប្រធាន​អតីត​គណបក្ស​សង្គ្រោះ​ជាតិ​។

នគរបាលគោលដៅការពារតុលាការបានត្រួតពិនិត្យដីកាកោះហៅ និងអត្តសញ្ញាណប័ណ្ណមុនពេលអនុញ្ញាត​ឲ្យ​លោក វន់ ពៅ ចូលទៅបន្ទប់ចៅក្រមស៊ើបសួរ។

រហូត​មក​ដល់ថ្ងៃ​ទី​៣​ ខែ​កញ្ញា​ ​ឆ្នាំ ២០១៨​ លោក ​កឹម​ សុខា​ ​ប្រធាន​អតីត​គណបក្ស​សង្គ្រោះ​ជាតិ​ ត្រូវ​បាន​ឃុំ​ខ្លួន​ក្នុង​ពន្ធនាគារ​រយៈពេល​១ឆ្នាំ​គត់​ ពាក់ព័ន្ធ​បទ​ក្បត់ជាតិ​ លួច​ទាក់ទង​ជា​សម្ងាត់​ជាមួយ​អាមេរិក​ ដើម្បី​ផ្តួល​រាជរដ្ឋាភិបាល​ស្រប​ច្បាប់​នៃ​ព្រះរាជាណាចក្រ​កម្ពុជា​។

លោក ​កឹម​ សុខា​ ត្រូវ​បាន​ឃុំ​ខ្លួន​ដាក់​ពន្ធនាគារ​នៅ​ថ្ងៃទី​៣​ ខែ​កញ្ញា​ ឆ្នាំ​២០១៧​ ដោយ​ចោទប្រកាន់​ពី​បទធ្វើ​សន្ទិ​ដ្ឋិ​ភាព​ជាមួយ​បរទេស តាម​មាត្រា៤៤៣ នៃ​ក្រមព្រហ្មទណ្ឌ​។

យោងតាមក្រមព្រហ្មទណ្ឌ បទធ្វើ​សន្ទិ​ដ្ឋិ​ភាព​ជាមួយ​បរទេស គឺជា​អំពើ​ត្រូវរ៉ូវ​គ្នា​ដោយ​សម្ងាត់​ជាមួយ​រដ្ឋ​បរទេស ឬ​ភ្នាក់ងារ​បរទេស ដើម្បី​បង្កើតឱ្យមាន​អំពើ​ប្រទូស្ត​រ៉ា​យ ឬ​ឱ្យមាន​អំពើ​ឈ្លានពាន​ប្រឆាំងនឹង​ព្រះរាជាណាចក្រ​កម្ពុជា​។ បទល្មើស​នេះ ត្រូវ​ជាប់ពន្ធនាគារ​ពី១៥ឆ្នាំ​ដល់៣០​ឆ្នាំ​។

ទោះបី​ជា​មាន​ការ​ស្នើសុំ​នៅ​ក្រៅឃុំ​ជា​ច្រើន​លើក​ច្រើន​សារ​ តែ​ទីបំផុត​តុលាការ​គ្រប់​ជាន់​ថ្នាក់​ បាន​បដិសេធ​សំណើ​នេះជា​បន្តបន្ទាប់​ ដោយ​អះអាង​ថា​ ការ​អនុញ្ញាត​ឱ្យ​លោក ​កឹម​ សុខា​ នៅ​ក្រៅ​ឃុំ​ គឺ​អាច​ប៉ះពាល់​នីតិវិធី​ ទន្ទឹម​ដែល​មេធាវី​មិន​យល់​បែប​នេះ​ក៏ដោយ​។

ព្រឹត្តិការណ៍​ចុងក្រោយ​ ដែល​អ្នក​នយោបាយ​ និង​បុគ្គល​សំខាន់ៗ​មួយ​ចំនួន​ ត្រូវ​បាន​តុលាការ​ដោះលែង​ជា​បន្តបន្ទាប់​ ដែល​អ្នក​ខ្លះ​ត្រូវ​បាន​ដោះលែង​តាម​សំណើ​របស់​នាយករដ្ឋមន្ត្រី​ក្តី​ នោះ​ មជ្ឈដ្ឋាន​ជា​ច្រើន​យល់​ថា​ លោក ​កឹម​ សុខា​ អាច​នឹង​ត្រូវ​ដោះលែង​ដែរ​។

ប៉ុន្តែ​ទី​បំផុត​ លោក​ គី​ ឫទ្ធី​ ចៅក្រម​ស៊ើបសួរ​សាលាដំបូង​រាជធានី​ភ្នំពេញ​ កាលពី​រសៀល​ថ្ងៃ​ទី​៣០​ ខែ​សីហា​ ​ឆ្នាំ​២០១៨​ សម្រេច​បន្ត​ឃុំ​ខ្លួន​លោក​កឹម​ សុខា​ ក្នុង​ពន្ធនាគារ​ដដែល​ដោយ​មិន​អនុញ្ញាត​ឱ្យ​នៅ​ក្រៅ​ឃុំ​បណ្តោះអាសន្ន​ទេ។

បន្ទាប់មកចៅក្រមស៊ើបសួរបានចេញដីកាកោះហៅសាក្សីសំខាន់ម្នាក់ទៀត គឺលោក វន់ ពៅ ប្រធានសមាគមសេដ្ឋកិច្ចក្រៅប្រព័ន្ធឲ្យ​ចូលតុលាការ ដើម្បីឆ្លើយបំភ្លឺជាសាក្សីនៅក្នុងរឿងក្ដីលោក កឹម សុខា នាព្រឹកថ្ងៃទី ១០កញ្ញា ឆ្នាំ២០១៨នេះ៕

@Amapapa.News

Feature Ads