header ads

Sponsor

អាម៉ាប៉ាប៉ាញ៉ូស

ប៉ៃលិនៈ នាព្រឹកព្រលឹមថ្ងៃទី៤ ខែកញ្ញានេះ មានហេតុការណ៍ដ៏រន្ធត់ ដោយសារដាច់ខ្សែរ៉តសំណង់ដ៏ស្កឹមស្កៃ នៃអគារកាស៊ីណូ Diamond Crown នៅខេត្តប៉ៃលិន បានឆក់យកជីវិតកម្មករ៣នាក់ភ្លាមៗ និងម្នាក់ បានស្លាប់ពេលទៅដល់មន្ទីរពេទ្យ ខណៈជនរងគ្រោះម្នាក់ទៀត កំពុងស្ថិតក្នុងការសង្គ្រោះបន្ទាន់ ដោយមិនទាន់ដឹងលទ្ធផលនៅឡើយ។ នគរបាលបញ្ជាក់ថា សំណង់អគារនេះ ត្រូវបានបិទដំណើរការសាងសង់បណ្ដោះអាសន្ន ដើម្បីធ្វើការស៊ើបអង្កេត។

ហេតុការណ៍គ្រោះថ្នាក់ការងារដ៏រន្ធត់ខាងលើនេះ បានកើតឡើងនាវេលាម៉ោង៧៖១៥នាទីព្រឹក ថ្ងៃអង្គារ​ ៩រោច​ ខែ​ស្រាពណ៍​ ឆ្នាំច​ សំរឹទ្ធិ​ស័ក​ ព.ស២៥៦២ ត្រូវនឹងថ្ងៃទី៤​ ខែកញ្ញា​ ឆ្នាំ២០១៨ ត្រង់ចំណុចសំណង់អគារកាស៊ីណូ Diamond Crown ស្ថិតក្នុងភូមិផ្សារព្រំ​ ឃុំស្ទឹងកាច់​ ស្រុកសាលាក្រៅ​ ខេត្តប៉ៃលិន។

មន្ត្រីនគរបាលការិយាល័យផ្សព្វផ្សាយអប់រំ នៃស្នងការដ្ឋាននគរបាលខេត្តប៉ៃលិន ព្រិន្ទបាលទោ វ៉ន ដារ៉ា​ ប្រាប់អង្គភាពសារព័ត៌មាន Cam Post មុននេះបន្តិចថា រហូតមកទល់នឹងវេលាម៉ោងជាង១០កន្លះព្រឹកនេះ សមត្ថកិច្ចបានផ្អាកដំណើរការសាងសង់អគារកាស៊ីណូនេះជាបណ្ដោះអាសន្នសិន ដោយទុកលទ្ធភាពឲ្យសមត្ថកិច្ចជំនាញ ធ្វើការស៊ើបអង្កេត។ យ៉ាងណា លោក ដារ៉ា បញ្ជាក់ព័ត៌មានបឋមថា មូលហេតុដែលបណ្ដាលឲ្យដាច់ខ្សែរ៉តនេះ ដោយសារជាងមានការធ្វេសប្រហែស និងផ្ទុកលើសទម្ងន់ផងដែរ។

បើតាមមន្ត្រីនគរបាលរូបនេះ ជនរងគ្រោះចំនួន៣នាក់ បានស្លាប់ភ្លាមៗ នៅកន្លែងកើតហេតុ ក្រោយហេតុការណ៍ដាច់ខ្សែរ៉តធ្លាក់ពីលើសំណង់អគារដ៏ស្កឹមស្កៃរបស់កាស៊ីណូ Diamond Crown ហើយជនរងគ្រោះពីរនាក់ផ្សេងទៀត ត្រូវបានសមត្ថកិច្ចអន្តរាគមន៍ដឹកបញ្ជូនទៅសង្គ្រោះផងដែរ ប៉ុន្តែជាអកុសលជនរងគ្រោះម្នាក់ បានដាច់ខ្យល់ស្លាប់ពេលទៅមន្ទីរពេទ្យ។ ដោយឡែក ជនរងគ្រោះម្នាក់ទៀត កំពុងស្ថិតក្នុងការសង្គ្រោះបន្ទាន់ ដោយមិនទាន់ដឹងថាយ៉ាងណានោះទេ។

ជនរងគ្រោះទាំង៥នាក់ រួមមាន ​ទី១.ឈ្មោះ ផោន កក ភេទប្រុស ​អាយុ​១៩​ឆ្នាំ ទីលំនៅ​ភូមិ​ស្តុកស្តម ឃុំកកោះ ស្រុកសន្ទុក ខេត្តកំពងធំ ស្លាប់នៅកន្លែងកើតហេតុ, ទី២.ឈ្មោះ ពឿ សារី ហៅ បូរី ភេទប្រុស ​អាយុ​២៣​ឆ្នាំ រស់នៅភូមិជីវភាព ឃុំអណ្តូងពោធិ ស្រុកបារាយណ៍ ខេត្តកំពងធំ ស្លាប់នៅកន្លែងកើតហេតុ, ទី៣.ឈ្មោះ ប្រាក់ ឃឿន ភេទប្រុស អាយុ​៣៨​ឆ្នាំ រស់នៅខេត្តបន្ទាយមានជ័យ ស្លាប់នៅកន្លែងកើតហេតុ, ទី៤.ឈ្មោះ លីម វែង ភេទប្រុស អាយុ​១៨​ឆ្នាំ រស់នៅ​ស្រុកសន្ទុក ខេត្តកំពងធំ ស្លាប់ពេលបញ្ជូនដល់មន្ទីរពេទ្យ និងទី៥.ឈ្មោះ ​តន ភេទប្រុស ​អាយុ​៣២​ឆ្នាំ រស់នៅ​ស្រុកកំរៀង ខេត្តបាត់ដំបង់ កំពុងស្ថិតក្នុងការសង្គ្រោះបន្ទាន់នៅឡើយ។

​បច្ចុប្បន្ន​សាកសពជនរងគ្រោះ ត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី​ ក្រោយពីមន្ត្រីជំនាញធ្វើកោសល្យវិច្ចយរួចរាល់។ ចំណែកជនរងគ្រោះរងរបួសធ្ងន់ ក៏ត្រូវបានបញ្ជូនទៅកាន់មន្ទីរពេទ្យបង្អែកខេត្ត ដើម្បីព្យាបាល​ និងសង្គ្រោះបន្ទាន់ផងដែរ៕

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post