ភ្នំពេញៈ កាលពីយប់មិញនេះ ភ្ញៀវខ្លះចូលរួម Birthday ភ្ញៀវខ្លះកំពុងសេដ ភ្ញៀវខ្លះជួបជុំមិត្តភក្តិ ភ្ញៀវខ្លះមកគាំទ្រក្រុម KlapYa Hand ខណៈកំពុងរាំសប្បាយតាមចង្វាក់ភ្លេង ភ្លេចខ្លួន ស្រាប់តែមានអណ្ដាតភ្លើងឆាបឆេះឡើង ផ្អើលភ័យស្លន់ស្លោនាំគ្នារត់ចែកជើងគ្នា បង្កការភ្ញាក់ផ្អើលពេញ ក្លឹប Epic ។
អគ្គិភ័យបង្កការភ្ញាក់ផ្អើលរត់ចែកជើងគ្នានេះ បានឆាបឆេះឡើងកាលពីយប់រំលងអធ្រាត្រ ឈានចូលថ្ងៃអាទិត្យ ថ្ងៃទី១៦ ខែកញ្ញា ឆ្នាំ២០១៨នេះ នៅក្លឹប Epic ស្ថិតតាមបណ្ដោយផ្លូវរដ្ឋសភា ក្រុម១១៣ ភូមិ១៥ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
យុវតីម្នាក់សុំមិនបញ្ចេញឈ្មោះ ដែលបានចូលរាំលេងជាមួយមិត្តភក្តិបានរៀបរាប់ប្រាប់ភ្នាក់ងារ CAM POST បានឲ្យដឹងថា មុនពេលកើតហេតុ រូបគេ និងមិត្តភក្តិបាននាំគ្នាចូលទៅរាំលេង និងទស្សនាក្រុម KlapYa Hand បន្ទាប់មកពួកគេ ក៏បានរាំលេងកម្សាន្តតាមចង្វាក់ភ្លេង យ៉ាងសប្បាយរីករាយ ស្រាប់តែផ្អើលថាមានភ្លើងឆាបឆេះឡើង តែមិនដឹងថា មូលហេតុអ្វីនោះទេ គឺគ្រាន់ឃើញអណ្ដាតភ្លើងឆេះចេញពីលើពិដាន ទើបភ័យស្លន់ស្លោ នាំគ្នារត់ចែកជើងគ្នាសំរុកចេញទៅក្រៅសិន បង្កការភ្ញាក់ផ្អើលដល់ក្រុមសន្តិសុខជួយយកបំពង់ពន្លត់អគ្គិភ័យ មកជួយអន្តរាគមន៍បាញ់ពន្លត់រលត់វិញភ្លាមៗផងដែរ។
ក្រោយកើតហេតុដោយសារតែភ្ញៀវខ្លះគាត់មានអារម្មណ៍ភ័យស្លន់ស្លោពេក ទើបបង្កការភ្ញាក់ផ្អើល នាំគ្នាសំរុករត់ចេញទៅក្រៅ តែមិនបណ្ដាលឲ្យមានអ្នកណាមានរបួសអ្វីនោះទេ៕
