ភ្នំពេញៈ ជនជាតិប៊ែលហ្ស៊ិកម្នាក់ ព្រោះតែការប្រើប្រាស់ថ្នាំញៀននៅក្នុងបន្ទប់ផ្ទះសំណាក់លើសកម្រិតពេក ទើបបណ្តាលឲ្យគាំងបេះដូងស្លាប់ ទាល់តែធំក្លិនស្អុយ ទើបមានគេដឹងបង្កឲ្យមានការភ្ញាក់ផ្អើល កាលពីវេលាម៉ោង១៖៤៥នាទីរសៀលថ្ងៃអាទិត្យ ៧កើត ខែភទ្របទ ឆ្នាំច សំរិទ្ធិសម័យ ព.ស២៥៦២ ត្រូវថ្ងៃទី១៦ ខែកញ្ញា ឆ្នាំ២០១៨ នៅចំណុចផ្ទះសំណាក់ យីហោ Jasmin .R.s បន្ទប់១០៥ ជាន់ទី២ ផ្ទះលេខ២៧ ផ្លូវ៨១ ភូមិ៧ ក្រុម៤៨ សង្កាត់ផ្សារថ្មីទី២ ខណ្ឌដូនពេញ។
សមត្ថកិច្ច បានឲ្យដឹងថា ជនបរទេស ដែលស្លាប់ព្រោះតែការប្រើប្រាស់ថ្នាំញៀបជ្រុលនោះឈ្មោះ Tom Stefan ភេទប្រុស អាយុ៤៤ឆ្នាំ ជនជាតិ ប៊ែលហ្សីក មុខរបរ ទេសចរណ៍កាន់លិខិតឆ្លងដែនលេខEN291645 ។
តាមការបំភ្លឺពីឈ្មោះ MANPPEET SINGH ភេទប្រុស អាយុ៣០ឆ្នាំ ជនជាតិឥណ្ឌា មុខរបរអ្នកមើលការខុសត្រូវផ្ទះសំណាក់បានប្រាប់សមត្ថកិច្ចថា នៅថ្ងៃទី១២ ខែកញ្ញា ឆ្នាំ២០១៨ ជនរងគ្រោះបានមកជួលបន្ទប់ស្នាក់នៅតែម្នាក់ឯង លុះដល់ថ្ងៃទី១៦ ខែដដែល ដោយជនរងគ្រោះមិនទាន់បង់ថ្លៃបន្ទប់ ក៏គាត់ឡើងទៅគោះទ្វារហៅជនរងគ្រោះតែមិនមានការឆ្លើយតបហើយម្យ៉ាងវិញទៀតបន្ទប់នោះជាប់សោខាងក្នុងមិនមានការឆ្លើយតបនោះ ទើបរាយការណ៍សមត្ថកិច្ចមូលដ្ឋានចុះមកមើល ព្រមទាំងយកកូនសោទៅបើកបន្ទប់មើល ទើបឃើញជនរងគ្រោះរូបនោះអង្គុយស្លាប់ទ្រោបនឹងគ្រែពូក ព្រមទាំងធំក្លិនស្អុយខ្លះទៅហើយ។
ប្រភពព័ត៌មាននៅកន្លែងកើតហេតុ បានឲ្យដឹងថា ក្រោយពីសភាពការណ៍កើតឡើងកម្លាំងជំនាញខណ្ឌនឹងប៉ុស្តិ៍បានចុះដល់នឹងគ្រប់គ្រងកន្លែងកើតហើត ហើយរាយការណ៍ជូនព្រះរាជអាជ្ញា និងការិយាល័យ បច្ចេកទេសវិទ្យាសាស្រ្តនឹងការិល័យព្រហ្មទណ្ឌកំរិតធ្ងន់ ការិយាល័យអន្តោប្រវេសន៍ ដើម្បីបង្កើតគណៈកម្មាធិការធ្វើកោសល្យវិច្ច័យពិនិត្យសាកសព។
ជាលទ្ធិផលតាមការពិនិត្យទឹកនោមការិយាល័យជំនាញបច្ចេកទេសបានបញ្ជាក់ថា សពជនរងគ្រោះមានការប្រីប្រាស់សារធាតុញៀនប្រភេទ (ម៉កហ្វីន) បណ្តាលអោយគាំងបេះដូងស្លាប់។ចំណែកនៅបន្ទប់កើតហេតុមានបន្សល់ទុកថ្នាំ១កញ្ចប់តូច .ទី១-លិខិតឆ្លងដែន១ក្បាលលេខEN២៩១៦៤៥ ទី២ កាតATMចំនួន០៣សន្លឹក ទី៣-ការបូបខោអាវ នឹងខោអាវមួយចំនួន ទី៤- ការបូបលុយ០១មានលុយខ្មែរ៤០០០រៀល។
បច្ចុប្បន្នក្រោយពីពិនិត្យរួចខាងកម្លាំងជំនាញបច្ចេកទេសបានយកសពទៅតម្តល់ទុកនៅមន្ទីរពេទ្យរស្ស៊ី៕
