Thursday, September 20, 2018

ម្ចាស់ហាង Jasmine នៅឆ្នេរអូរឈើទាល មិនបង់លុយសេវាសំរាម អស់រយៈពេលជាងកន្លះឆ្នាំ

អាម៉ាប៉ាប៉ាញ៉ូស

ព្រះសីហនុៈ ក្រុមហ៊ុនទទួលសិទ្ធិប្រមូលសំរាមផ្តាច់មុខ ប្រចាំក្រុងព្រះសីហនុ បានចោទម្ចាស់ហាង Jasmine មានទីតាំងនៅឆ្នេរអូរឈើទាល ដែលមានថៅកែជាជនបរទេសថា បានគេចវេសមិនព្រមបង់ថ្លៃសេវាប្រមូលសំរាម អស់រយៈពេលចំនួន៩ខែកន្លងមកហើយ។

បុគ្គលិកតំណាងក្រុមហ៊ុនសំរាមឈ្មោះ ខេ អែស ដាប់បិលយូ អ៊ឹម (KSWM) បានឲ្យដឹងថា ដោយសារតែម្ចាស់ហាងខាងលើ មិនព្រមបង់ថ្លៃសេវាប្រមូលសំរាមប្រចាំខែចំនួន៩ខែមកនេះ ទើបនៅរសៀលថ្ងៃទី១៩ ខែកញ្ញា ឆ្នាំ២០១៨ ក្រុមការងារចម្រុះ រួមមាន មន្ត្រីរដ្ឋបាលក្រុងព្រះសីហនុ មន្ត្រីមន្ទីរបរិស្ថាន និងតំណាងក្រុមហ៊ុនសំរាម បានចុះផ្ទាល់ដល់ហាង Jasmine មានទីតាំងនៅជាប់ផែទូកទេសចរណ៍ឆ្នេរអូរឈើទាល តាមបណ្តោយផ្លូវ៥០២ ស្ថិតក្នុងភូមិ៤ សង្កាត់៤ ក្រុងព្រះសីហនុ ខេត្តព្រះសីហនុ។

តំណាងក្រុមហ៊ុនសំរាម បន្តថា គោលបំណងចុះជួបម្ចាស់ហាងខាងលើ ដើម្បីសម្របសម្រួលឲ្យម្ចាស់ទីតាំង ឬម្ចាស់ហាងខាងលើ បង់ថ្លៃសេវាប្រមូលសំរាម ដែលម្ចាស់ទីតាំងនេះ មិនបានបង់អស់រយៈពេល៩ខែកន្លងមកហើយ គិតរហូតដល់ថ្ងៃទី១៩ ខែកញ្ញា ឆ្នាំ២០១៨នេះ។

ផ្តើមពីបញ្ហានេះ តំណាងក្រុមហ៊ុនប្រមូលសំរាម KSWM បានបញ្ជាក់ថា មូលហេតុ ដែលម្ចាស់ទីតាំងខាងលើ មិនព្រមបង់ថ្លៃសេវាប្រមូលសំរាម ដោយសារតែការចរចាររវាងក្រុមហ៊ុនជាមួយម្ចាស់ហាង Jasmine ដែលមានថៅកែជាជនជាតិតួគីខាងលើ មិនឯកភាពគ្នា លើតម្លៃសេវាប្រចាំខែ នៃការប្រមូលសំរាម ដែលក្រុមហ៊ុនប្រមូលសំរាមទាមទារ ឬតម្រូវឲ្យបង់នោះ។

យ៉ាងនេះក្តី ភ្នាក់ងារអង្គភាពសារព័ត៌មាន Cam Post ប្រចាំខេត្តព្រះសីហនុ មិនទាន់មានប្រភពទាក់ទងម្ចាស់ហាង Jasmine ដើម្បីស្នើសុំការបំភ្លឺជុំវិញបញ្ហាមិនបង់ថ្លៃសេវាប្រមូលសំរាមខាងលើបានទេ នៅព្រឹកថ្ងៃទី២០ ខែកញ្ញានេះ។ ដោយឡែក លទ្ធផលនៃការសម្របសម្រួលរបស់អាជ្ញាធរ ជាមួយម្ចាស់ហាង Jasmine ក៏មិនទាន់ដឹងថា ត្រូវរ៉ូវគ្នាហើយ ឬយ៉ាងណានោះទេ៕

@Amapapa.News

Feature Ads