ភ្នំពេញៈ នារីជនជាតិចិនរូបស្រស់ម្នាក់ បានបើករថយន្តស៊េរីទំនើប Mazda ក្នុងល្បឿនយ៉ាងលឿនទៅបុកជាមួយរថយន្តស៊េរីទំនើប Range Rover ចំពេញទំហឹង ហើយរេចង្កូតវិលទៅបោកផ្ទប់នឹងគល់ឈើ បណ្តាលឲ្យរងការខូចខាតខ្ទេចស្ទើទាំងស្រុង និងរថយន្ត Mazda ខូចខាតផ្នែកខាងមុខយ៉ាងដំណំ តែសំណាងល្អគ្មានមនុស្សរងរបួស។
ហេតុការណ៍គ្រោះថ្នាក់ចរាចរណ៍ដ៏សាហាវដូចរឿងកុននេះ បានកើតឡើងកាលពីវេលាម៉ោង១០៖៣០នាទី យប់ថ្ងៃទី១០ ខែកញ្ញា ឆ្នាំ២០១៨នេះ នៅត្រង់ចំណុចផ្លូវបែកជាបួន ផ្លូវ៣៣៧ កែងផ្លូវ៥២៨ ស្ថិតក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ។
សាក្សីដែលឃើញហេតុការណ៍ បានឲ្យដឹងថា នៅមុនពេលកើតហេតុ គេឃើញរថយន្តស៊េរីទំនើបមួយគ្រឿងម៉ាក Range Rover ពណ៌ស ពាក់ស្លាកលេខ ភ្នំពេញ 2AP-7736 បើកបរដោយបុរសម្នាក់ ធ្វើដំណើរតាមបណ្ដយផ្លូវ៣៣៧ ទិសដៅពីជើងទៅត្បូងក្នុងល្បឿនយ៉ាងលឿន។ លុះធ្វើដំណើរមកដល់វេលាកើតហេតុ ដែលជាផ្លូវបែកជាបួនផងនោះ ស្រាប់តែមានរថយន្តស៊េរីទំនើបមួយគ្រឿងម៉ាក Mazda ពណ៌ក្រហម ពាក់ស្លាកលេខ ភ្នំពេញ 2AM-1118 បើកបរដោយនារីរូបស្រស់ជនជាតិចិនម្នាក់ ធ្វើដំណើរពីកើតទៅលិច តាមបណ្ដោយ៥២៨ ក្នុងល្បឿនលឿនដោយខ្វះការប្រុងប្រយ័ត្ន បានទៅបុកចំពាក់កណ្ដាលរថយន្ត Range Rover លាន់ដូចរន្ទះ ហើយរថយន្តវិលទៅបោកផ្ទប់នឹងគល់ឈើចំផ្នែកខាងក្រោយពេញទំហឹងទៀត បណ្តាលឲ្យរថយន្ត Range Rover រងការខូចខាតខ្ទេចយ៉ាងដំណំ និងផ្ទុះពោងសុវត្ថិភាពក្នុងរថយន្តទាំងអស់។ ចំណែកឯរថយន្ត Mazda បានរងការខូចខាតផ្នែកខាងមុខយ៉ាងដំណំ តែពិតជាសំណាងល្អ មិនបណ្ដាលឲ្យមនុស្សរងរបួសនោះទេ។
ភ្លាមៗ បន្ទាប់ពីកើតហេតុ គេឃើញនារីរូបស្រស់ជនជាតិចិន ដែលជាអ្នកបើកបររថយន្ត Mazda ទាក់ទងហៅជនជាតិចិនដូចគ្នា ឲ្យចុះមកជួយដោះស្រាយនៅកន្លែងកើតហេតុ ដោយភាគីរថយន្តទាំងសងខាង បានស្រុះស្រួលបញ្ចប់រឿងគ្រោះថ្នាក់ខាងលើ ដោយរថយន្តមកស្ទូចយករថយន្តទៅជួសជុលរៀងៗខ្លួន៕
