ភ្នំពេញៈ រថយន្ត Mazda ស៊េរីទំនើបមួយគ្រឿង បើកបរដោយយុវតីរូបស្រស់ស្អាតម្នាក់ ទំនងស្រវឹងផង ក្នុងល្បឿនយ៉ាងលឿន បានរេចង្កូតទៅបុកក្បាលនាគកណ្ដាលទ្រូងផ្លូវយ៉ាងពេញទំហឹង។ ដោយរថយន្តមិនទាន់អស់ល្បឿន ក៏ជ្រុលទៅមុខប្រហែល២០ម៉ែត្រទៀត ទើបឈប់ទៅមុខលែងរួច បណ្តាលឲ្យរថយន្តរងការខូចខាតផ្នែកខាងមុខយ៉ាងដំណំ និងទ្រូងផ្លូវបានខ្ទាតបាក់អស់១កង់ តែសំណាងល្អមិនបណ្ដាលឲ្យមនុស្សរងរបួសឡើយ។
គ្រោះថ្នាក់ចរាចរណ៍នេះ បានកើតឡើងនៅវេលាម៉ោង១២រំលងអធ្រាត្រឈានចូលថ្ងៃសៅរ៍ ទី៨ ខែកញ្ញា ឆ្នាំ២០១៨ ស្ថិតនៅតាមបណ្តោយផ្លូវជាតិ៥៩៨ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។
សាក្សីនៅក្បែរកន្លែងកើតហេតុ បានឲ្យដឹងថា នៅមុនពេលកើតហេតុ គាត់បានឃើញរថយន្តមួយគ្រឿងម៉ាក Mazda ស៊េរីទំនើប ពណ៌ខ្មៅ ពាក់ស្លាកលេខ ភ្នំពេញ 2AQ-7173 បើកបរដោយយុវតីរូបស្រស់ស្អាតម្នាក់ មើលទៅទំនងស្រវឹងស្រាផង បានធ្វើដំណើរតាមបណ្តោយផ្លូវ៥៩៨ ទិសដៅពីត្បូងទៅជើងក្នុងល្បឿនលឿន។ លុះមកដល់ចំណុចកើតហេតុ មិនដឹងថា អ្នកបើកបររវល់ធ្វើអ្វីនោះទេ ស្រាប់តែរថយន្តរេចង្កូតជ្រុលទៅបុកក្បាលនាគថ្មកណ្ដាលទ្រូងផ្លូវពេញទំហឹងតែម្ដង បណ្តាលឲ្យរថយន្តរងការខូចខាតផ្នែកខាងមុខយ៉ាងដំណំ ហើយរថយន្តមិនទាន់អស់ល្បឿនបានបន្តដំណើរទៅមុខប្រហែល២០ម៉ែត្រទៀត ទើបឈប់ ព្រោះបើកទៅមុខលែងរួច។ ចំណែកទ្រូងផ្លូវបានខ្ទាតចេញពីផ្លូវបាក់អស់ចំនួន១កង់ តែសំណាងល្អមិនបណ្ដាលឲ្យនារីរូបស្រស់ខាងលើរងរបួសអ្វីឡើយ។
សាក្សីបន្ថែមទៀតថា ភ្លាមៗនោះ យុវតីរូបស្រស់ ដែលជាអ្នកបើករថយន្តបង្កបានប្រមូលសុម្ភារៈ និងរបស់មានតម្លៃទុកក្នុងកាបូប រួចប្រញាប់ប្រញាល់ចុះពីរថយន្ត រួចហៅរ៉ឺម៉កកង់បីជិះចេញពីកន្លែងកើតហេតុបាត់ទៅ។
ក្រោយពេលកើតហេតុ សមត្ថកិច្ចមូលដ្ឋានបានចុះដល់កន្លែងកើតហេតុ និងទាក់ទងសមត្ថកិច្ចជំនាញ ចុះមកធ្វើការវាស់វែងស្ទូចយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយសងការខូចខាតទ្រព្យសម្បត្តិរដ្ឋទៅតាមនីតិវិធីច្បាប់៕
