កណ្ដាលៈ មនុស្សស្រី៣នាក់ បានរងរបួសធ្ងន់ស្រាល ក្រោយពីជួបករណីគ្រោះថ្នាក់ចរាចរណ៍រវាងរថយន្តនិងម៉ូតូបុកគ្នា កាលពីវេលាម៉ោង២និង១០នាទីថ្ងៃអាទិត្យ ៧កើត ខែភទ្របទ ឆ្នាំច សំរឹទ្ធិស័ក ពុទ្ធសករាជ ២៥៦២ ត្រូវនឹងថ្ងៃទី១៦ ខែកញ្ញា ឆ្នាំ២០១៨ នៅចំណុចខាងមុខមន្ទីរកាកបាទក្រហមខេត្តកណ្ដាលផ្លូវជាតិ២១ ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្ដាល។
អ្នកឃើញហេតុការណ៍ បានឲ្យដឹងថា មុនពេលកើតហេតុ គេឃើញម៉ូតូមួយគ្រឿងម៉ាកSUZUKI LETS ពណ៌សពាក់ស្លាកលេខ កណ្ដាល 1S-9014 (គ្មានមួកសុវត្ថិភាព និងគ្មានកញ្ចក់) បើកបរនារីម្នាក់ នឹងមានឌុបនារី២នាក់នៅពីក្រោយ ធ្វើដំណើរក្នុងទិសដៅពីជើងទៅត្បូង រួចបត់ឆ្វេងក៏បានបុកជាមួយរថយន្តមួយគ្រឿងម៉ាក LEXUS RX300 ពណ៌ទឹកមាស ពាក់ស្លាកលេខភ្នំពេញ 2P-9858 ធ្វើដំណើរក្នុងទិសដៅពីត្បូងទៅជើង អ្នកបើកបរឈ្មោះ ZHENG JIANZONG អាយុ៣៥ឆ្នាំ(ជនជាតិចិន) នៅភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្ដាល បណ្ដាលឲ្យភាគីខាងម៉ូតូរបួសធ្ងន់ស្រាល៣នាក់។
សមត្ថកិច្ច បានឲ្យដឹងថា ជនរងគ្រោះឈ្មោះ ផាត សុខកែន ភេទស្រី អាយុ២៧ឆ្នាំនៅ ភូមិព្រែករាំងសង្កាត់កំពង់សំណាញ់ ក្រុងតាខ្មៅ ខេត្តកណ្ដាល(របួសធ្ងន់ត្រូវបានបងប្អូនដឹកយក ទៅសង្គ្រោះនៅមន្ទីរពេទ្យជ័យជំនះ)( អ្នកបើកបរម៉ូតូ) និងអ្នករួមដំណើរ២នាក់ទៀត ១.ឈ្មោះយឹម ស្រីរ័ត្ន ភេទស្រី អាយុ២៩ឆ្នាំ នៅភូមិ១ ឃុំស្វាយរលំ ស្រុកស្អាង ខេត្តកណ្ដាល (រងរបួសធ្ងន់ត្រូវបានបងប្អូនដឹកយកទៅសង្គ្រោះនៅមន្ទីរពេទ្យកែវ សាន្ត) ២.ឈ្មោះឡាយ ស្រីគា ភេទស្រី អាយុ១៩ឆ្នាំ នៅភូមិ១ ឃុំស្វាយរលំ ស្រុកស្អាង ខេត្តកណ្ដាល (រងរបួសស្រាល ត្រូវបានបងប្អូនដឹកយកទៅសង្គ្រោះនៅមន្ទីរពេទ្យកែវ សាន្ត)។
សមត្ថកិច្ចបញ្ជាក់ថា គ្រោះថ្នាក់ចរាចរណ៍នេះ មូលហេតុមកពីអ្នកបើកបរម៉ូតូម៉ាកSUZUKI LETS បត់ឆ្វេងខ្វះការប្រុងប្រយ័ត្ន គាប់ជូនអ្នកបើកបររថយន្ត LEXUS ក្នុងល្បឿនលឿនខ្វះការប្រុងប្រយ័ត្នផងនោះ ទើបឲ្យបង្កគ្រោះថ្នាក់បែបនេះ។
ក្រោយកើតហេតុ រថយន្ត និងម៉ូតូ សមត្ថកិច្ចបានយកមករក្សាទុកបណ្ដោះអាសន្ននៅអធិការដ្ឋាន ដើម្បីចាត់ការតាមនិតិវិធី៕
