ឯកឧត្តម គង់ ភោគ អតីតអនុរដ្ឋលេខាធិការនៃទីស្តីការគណៈរដ្ឋមន្ត្រី បានស្បថចូលកាន់តំណែងជាអគ្គលេខាធិការរងអាស៊ាន កាលពីថ្ងៃទី១២ ខែតុលា ឆ្នាំ២០១៨ នៅទីស្នាក់ការអាស៊ានដែលមានមូលដ្ឋាននៅទីក្រុងហ្សាការតា ប្រទេសឥណ្ឌូណេស៊ី។ យោងតាមគេហទំព័រហ្វេសប៊ុកផ្លូវការរបស់សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន ចុះថ្ងៃទី១៦ ខែតុលា ឆ្នាំ២០១៨ នេះ។
សម្រាប់តំណែងជាអគ្គលេខាធិការរងអាស៊ាន នេះ ឯកឧត្តម គង់ ភោគ ទទួលបន្ទុកសហគមន៍សង្គម-វប្បធម៌ អាស៊ាន (ASCC) ដែលមានអាណត្តិ៣ឆ្នាំ ពីឆ្នាំ២០១៨ ដល់ឆ្នាំ២០២១។
តាមប្រភពដដែលបានឱ្យដឹងថា៖ ឯកឧត្តម គង់ ភោគ នឹងជួយដល់អគ្គលេខាធិការអាស៊ាន ដោយដឹកនាំការអនុវត្តតាមផែនការមេនៃកិច្ចការសហគមន៍សង្គម-វប្បធម៌ (ASCC) ហើយនឹងដឹកនាំនាយកដ្ឋានសហគមន៍សង្គម-វប្បធម៌នៃលេខាធិការដ្ឋានអាស៊ានផងដែរ។
សូមបញ្ជាក់ថា ឯកឧត្តមបណ្ឌិត គង់ ភោគ ត្រូវចូលកាន់តំណែងជំនួសលោក Vongthep Arthakaivalvatee។
គួររំលឹកថា ឯកឧត្តម គង់ ភោគ បានបញ្ចប់ថ្នាក់បណ្ឌិតផ្នែកវិទ្យាសាស្ត្រនយោបាយ និងទំនាក់ទំនងអន្តរជាតិ ពីសាកលវិទ្យាល័យ Warwick ប្រទេសអង់គ្លេស ហើយគាត់ក៏បានបញ្ចប់ថ្នាក់បរិញ្ញាបត្រផ្នែកគោលនយោបាយសាធារណៈនៅសាកលវិទ្យាល័យ Australian National ផង។
មុននឹងចូលកាន់តំណែងអគ្គលេខាធិការរងអាស៊ាននេះ ឯកឧត្តម គង់ ភោគ ធ្លាប់បម្រើការងារជាអនុរដ្ឋលេខាធិការទីស្តីការគណៈរដ្ឋមន្ត្រី និងបំពេញការងារលើគោលនយោបាយការបរទេស នៅក្នុងការិយាល័យរបស់នាយករដ្ឋមន្ត្រីនៃព្រះរាជាណាចក្រកម្ពុជាផងដែរ។
ឯកឧត្តម គង់ ភោគ ក៏ធ្លាប់ជានាយកវិទ្យាស្ថានកម្ពុជាសម្រាប់ការសិក្សាយុទ្ធសាស្ត្រ ដែលបង្កើតឡើងកាលពី២០១៤ ជាបណ្តាញនៃអ្នកទទួលអាហារូបករណ៍កម្ពុជានិងបរទេស ដែលហៅថាក្រុមសិក្សាយុទ្ធសាស្ត្រកម្ពុជា ដែលផ្ដល់ដំណោះស្រាយគោលនយោបាយ ដោយមិនប្រកាន់បក្សពួក និងផ្អែកទៅលើភស្តុតាង។
ម្យ៉ាងវិញទៀត ឯកឧត្តម គង់ ភោគ បានសរសេរ និងផ្សព្វផ្សាយសៀវភៅពីគោលនយោបាយការបរទេស គោលនយោបាយការពារ នយោបាយជាតិ និងពាណិជ្ជកម្មអន្តរជាតិ។