ភ្នំពេញៈ បុរសម្នាក់ ខណៈមិនស្រួលខ្លួនបានទៅកន្លែងម៉ាស្សាកោសជប់ ដោយមានលុយ ៣០០ដុល្លារ ជាងពេលឲ្យនារីម៉ាស្សាធ្វើសរសៃរួចរាល់ចេញមកវិញ ដកកាបូបមើលលុយសុទ្ធតែលុយដុល្លារខ្មោច ទើបរត់ទៅប្តឹងសមត្ថកិច្ចឲ្យជួយអន្តរាគមន៍ ។
ហេតុការណ៍នេះបានកើតឡងកាលពីវេលាម៉ោង១២និង៣០នាទី ថ្ងៃទី៣០ ខែកញ្ញា ឆ្នាំ២០១៨ នៅហាងម៉ាស្សាកោសជប់មួយកន្លែង តាមបណ្តោយផ្លូវលេខ៥៩៨ ស្ថិតក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
ជនងគ្រោះសុំមិនបញ្ចេញឈ្មោះ ស្នាក់នៅសង្កាត់កាកាបទី១ ខណ្ឌពោធិ៍សែនជ័យ បានបាត់លុយចំនួន៣០០ដុល្លារ ដោយបានមកវិញ ចំនួន៣០០ដុល្លារដែរ ប៉ុន្តែជាលុយសែនខ្មោច ។
តាមជនរងគ្រោះបានឲ្យដឹងថា មុនពេលកើតហេតុ រូបគាត់បានចូលទៅឲ្យនារីម៉ាស្សាខាងលើ ធ្វើសរសៃដើម្បីឲ្យស្រួលខ្លួន ក្នុងតម្លៃ១០.០០០រៀល ។ ពេលនោះនារីខាងលើបានឲ្យរូបគាត់ដោះសំលៀកបំពាក់ចេញ ហើយយកទៅទុកនៅលើទូក្បែរមាត់ទ្វាររួចនាងបានឲ្យរួបគាត់ដេកផ្កាប់មុខដើម្បីធ្វើសរសៃ ។
ជនរងគ្រោះបានបន្តទៀតថា ពេលធ្វើសរសៃរួច រូបគាត់ក៏ដកលុយឲ្យថ្លៃម៉ាស្សាហើយចេញមកវិញ ។
ក្រោយមក ក៏ដកលុយទិញទឹកផឹក ស្រាប់តែមើលលុយសុទ្ធតែលុយសែនខ្មោច ទើបដឹងថា ក្រុមនារីទាំងនោះបានបន្លំយកលុយអស់ ទើបរត់ទៅប្តឹងនគរបាលរដ្ឋបាលបឹងកក់ទី២ដើម្បីអន្តរាគមន៍ ។ ក្រោយពីលូចលុយបាត់ហើយក្រុមទាំងនោះបាននាំគ្នាបិទទ្វារគេចខ្លួនបាត់អស់ ។
បើតាមការបញ្ជាក់ពីអ្នកជិតខាងទីតាំងខាងលើ តែងតែធ្វើសកម្មភាពបែបនេះ ជាញឹកញាប់ហើយគេចខ្លួនពីរទៅបីថ្ងៃទើបមកវិញ តែសមត្ថកិច្ចនៅតែមិនអាចបង្ក្រាបក្រុមទាំងនោះបាន ។
មហាជនចាំមើលលើកនេះ តើសមត្ថកិច្ច នឹងមានចំណាត់ការយ៉ាងណាចំពោះទីតាំងខាងលើនេះ៕