រាជរដ្ឋាភិបាលកម្ពុជាតាមរយៈក្រសួងបរិស្ថាន បានសម្រេចកាត់ដីទំហំ១១,៥០ ហិកតា (១១ហិកតា និង៥០អា) ចេញពីតំបន់អភិរក្សទឹកសាបព្រែកទប់ ដែលមានទីតាំងនៅក្នុងក្រុងព្រះសីហនុ ខេត្តព្រះសីហនុ។ នេះបើតាមអនុក្រឹត្យលេខ ២៣ អនក្រ.បក ចុះថ្ងៃទី២៣ ខែកុម្ភៈ ឆ្នាំ២០១៨ ប៉ុន្តែទើបត្រូវបានផ្សព្វផ្សាយនាពេលថ្មីៗនេះ។ ការកាត់ដីនេះ ធ្វើឱ្យតំបន់អភិរក្សទឹកសាបព្រែកទប់ នៅសល់ដីតែ ៤,៨០ ហិកតាប៉ុណ្ណោះ។
សូមបញ្ជាក់ថា តំបន់អភិរក្សទឹកសាបព្រែកទប់ ត្រូវបានរាជរដ្ឋាភិបាលកម្ពុជាដាក់បញ្ចូលជាតំបន់អភិរក្ស កាលពីឆ្នាំ២០១៦ ដែលមានផ្ទៃដីសរុប ១៦,៣០ហិកតា។ យោងតាមអនុក្រឹត្យលេខ ១៨៧ អនក្រ.បក ចុះថ្ងៃទី១៣ ខែកញ្ញា ឆ្នាំ២០១៦។
ការដាក់តំបន់អភិរក្សទឹកសាបព្រែកទប់នេះ គឺដើម្បីធានាកិច្ចគាំពារបរិស្ថាន ការអភិរក្សជីវៈចម្រុះ និងការប្រើប្រាស់ធនធានធម្មជាតិប្រកបដោយនិរន្តរភាព។
បច្ចុប្បន្ននេះ បឹងព្រែកទប់ កំពុងតែរងការគំរាមកំហែងនៃការចាក់ដីចូលបឹង រំលោភយកដី។ ទាក់ទងនឹងបញ្ហានេះលោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកនៃ ឧត្តមក្រុមប្រឹក្សាពិគ្រោះ និងផ្តល់យោបល់ បានប្រកាសប្រឆាំងដាច់អហង្ការចំពោះការចាក់ដីលុបបឹងព្រែកទប់។