កំពង់ធំៈ រថយន្តហ៊ីយិនដាយមួយគ្រឿង អ្នកបើកបរងងុយដេក បើកលឿន បានបុករះម៉ូតូ និងរទេះក្របី បណ្តាលមនុស្សស្លាប់ និងរងបួសធ្ងន់៤នាក់ ។
ហេតុការណ៍គ្រោះថ្នាក់ចរាចរណខាងលើនេះ បានកើតឡើងនៅវេលាម៉ោង៦និង២០នាទី ព្រឹកថ្ងៃពុធ ៨កើត ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៧ ខែតុលា ឆ្នាំ២០១៨ នៅលើកំណាត់ផ្លូវជាតិលេខ០៦ ចំនុចភូមិស្ពានគ្រង ឃុំចំណារក្រោម ស្រុកស្ទោង ខេត្តកំពង់ធំ។
សមត្ថកិច្ច បានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយរថយន្ត បុកម៉ូតូ ហើយរថយន្តបន្តទៅបុករទេះក្របី ក្នុងទិសដៅស្របពីជើងទៅត្បូង បណ្តាលឲ្យមនុស្សស្រីស្លាប់២នាក់និងរបួសធ្ងន់២នាក់។
សមត្ថកិច្ច បានបន្តឲ្យដឹងថា រថយន្តបង្កម៉ាកហ៊ីហិនដាយ(ផ្លូវបី) ពណ៌ស ពាក់ស្លាកលេខព្រះសីហនុ 3A.7250 បើកបរដោយឈ្មោះ រឿន វណ្ណេត ភេទប្រុស អាយុ២៦ឆ្នាំ រស់នៅភូមិចុងកៅស៊ូ ឃុំស្លក្រាម ក្រុងសៀមរាម ខេត្តសៀមរាប បានជាមួយម៉ូតូម៉ាកហុងដាC.125 ពណ៌ខ្មៅ គ្មានស្លាកលេខ បើកបរដោយឈ្មោះ ពុធ ធីតា ភេទស្រី អាយុ១៨ឆ្នាំ នៅភូមិឃុំកើតហេតុខាងលើ(របួសធ្ងន់) និងអ្នករួមដំណើរឈ្មោះ ហ៊ាន តន ភេទស្រី អាយុ៧៤ឆ្នាំ រស់នៅភូមិ ឃុំកើតហេតុខាងលើ(ស្លាប់នៅកន្លែងកើតហេតុ) ហើយរថយន្តបានជ្រុលទៅបុករទេះក្របី បើកបរដោយឈ្មោះ កង ញន ភេទប្រុស អាយុ៦១ឆ្នាំ រស់នៅភូមិ ឃុំកើតហេតុខាងលើ(របួសធ្ងន់) និងអ្នករួមដំណើរឈ្មោះ ហ៊ីង លី ភេទស្រី អាយុ៦៤ឆ្នាំ រស់នៅភូមិ ឃុំកើតហេតុខាងលើ (ស្លាប់នៅមណ្ឌលសុខភាពបង្អែកស្ទោង)។
សមត្ថកិច្ចបញ្ជាក់ថា មូលហេតុជាបឋមបង្កឡើងដោយអ្នកបើកបររថយន្ត បើកបរក្នុងស្ថានភាពងងុយគេង ហើយមានល្បឿនលឿន និងមិនប្រកាន់គន្លងស្តាំរបស់ខ្លួន ទើបចូលទៅបុកក្នុងគន្លងម៉ូតូ និងរទេះក្របី។
ក្រោយកើតហេតុ សមត្ថកិច្ចបានឃាត់ខ្លួនអ្នកបើកបររថយន្តបង្ក រួមទាំងវត្ថុតាងទៅអធិការដ្ឋាននគរបាលស្រុកស្ទោង ដើម្បីចាត់វិធានការតាមផ្លូវច្បាប់។ ចំណែកសាកសព សមត្ថកិច្ចបានធ្វើការប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕