ទឹកបឹងព្រែកទប់ លែងជាប្រភពផ្គត់ផ្គង់ទឹកស្អាតសម្រាប់អ្នកក្រុងព្រះសីហនុ ប្រើប្រាស់ទៀតហើយ ដោយសារតែ ថ្មីៗនេះរាជរដ្ឋាភិបាល បានផ្តល់សិទ្ធិជូនក្រុមហ៊ុនឯកជន ដោយកាត់ផ្ទៃបឹងមួយចំណែកសម្រាប់ធ្វើការអភិវឌ្ឍ និងមួយភាគធំទៀតសម្រាប់កែលម្អឱ្យទៅជាសួនរមនីយដ្ឋានទេសចរណ៍។ នេះបើយោងតាមហ្វេសប៊ុករបស់រដ្ឋបាលខេត្តព្រះសីហនុ ផ្សព្វផ្សាយនៅថ្ងៃទី១៨ ខែតុលា ឆ្នាំ២០១៨ នេះ។
តាមប្រភពដដែលបានបន្តទៀតថា៖ នៅក្នុងគម្រោងដែលបានគ្រោងទុក ក៍មានសាងសង់នូវផ្លូវកាត់ដើម្បីបញ្ជៀសចរាចរណ៍ ព្រមទាំងមានការរៀបចំតុបតែងលម្អដោយភ្លើងពណ៌ផងដែរ ។ ការរៀបចំកែលម្អផ្ទៃបឹងនេះ នឹងត្រូវធ្វើឡើងប្រកបដោយលក្ខណៈបច្ចេកទេសខ្ពស់ ព្រមទាំងឱ្យក្លាយទៅជារមនីយ៍ដ្ឋានទេសចរណ៍ កម្សាន្តដែលមានភាពទាក់ទាញសម្រាប់ភ្ញៀវទេសចរជាតិ និងអន្តរជាតិមកទស្សនាកម្សាន្ត។
ចំពោះប្រភពទឹកស្អាត ដែលត្រូវផ្គត់ឱ្យការប្រើប្រាស់របស់ប្រជាពលរដ្ឋនៅទូទាំងខេត្តព្រះសីហនុ ត្រូវបានយកចេញពីអាងស្តុកទឹកតំបន់ក្បាលឆាយ ដែលជាប្រភពទឹកធម្មជាតិ មានវិសាលភាពផ្គត់ផ្គង់លើការប្រើប្រាស់គ្មានការព្រួយបារម្មណ៍ ជំនួសបឹងព្រែកទប់ ដែលពីមួយឆ្នាំ ទៅមួយឆ្នាំបានគោករាក់ និងបាត់បង់គុណភាព។
សូមរំលឹកថា រាជរដ្ឋាភិបាលកម្ពុជាតាមរយៈក្រសួងបរិស្ថាន បានសម្រេចកាត់ដីទំហំ១១,៥០ ហិកតា (១១ហិកតា និង៥០អា) ចេញពីតំបន់អភិរក្សទឹកសាបព្រែកទប់ ដែលមានទីតាំងនៅក្នុងក្រុងព្រះសីហនុ ខេត្តព្រះសីហនុ កាលពីថ្ងៃទី២៣ ខែកុម្ភៈ ឆ្នាំ២០១៨ ការកាត់ដីនេះធ្វើឱ្យតំបន់អភិរក្សទឹកសាបព្រែកទប់ នៅសល់ដីតែ ៤,៨០ ហិកតាប៉ុណ្ណោះ។
សូមបញ្ជាក់ថា កាលពីឆ្នាំ២០១៦ តំបន់អភិរក្សទឹកសាបព្រែកទប់ ត្រូវបានរាជរដ្ឋាភិបាលកម្ពុជាដាក់បញ្ចូលជាតំបន់អភិរក្ស ដែលមានផ្ទៃដីសរុប ១៦,៣០ហិកតា។