ព្រៃវែងៈ បុរសម្នាក់ ដើរឆ្លងកាត់ផ្លូវមិនបានមើលមុខមើលក្រោយ ត្រូវរថយន្តធុនធំបុកពេញទំហឹង បណ្ដាលឲ្យស្លាប់ភ្លាមៗនៅមុខហាងរបស់ខ្លួន។
គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង៦៖១០នាទីព្រឹកថ្ងៃទី១៦ ខែតុលា ឆ្នាំ២០១៨ នៅចំណុចមុខហាង ម៉ែក្មេក ហេងហេង ភូមិស្វាយអន្ទរទី១ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង។
ជនរងគ្រោះឈ្មោះ ឆាយ ផានិត ភេទប្រុស អាយុ៣០ឆ្នាំ មុខរបរ លក់ដូរនៅអាហារដ្ឋានខាងលើ មានស្រុកកំណើតនៅភូមិកណ្តាច់ ឃុំចុងអំពិល ស្រុកកញ្ច្រៀច ខេត្តព្រៃវែង បច្ចុប្បន្ននៅភូមិស្វាយអន្ទរទី១ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង។
អ្នកឃើញហេតុការណ៍បានឲ្យដឹងថា មុនពេលកើតហេតុជនរងគ្រោះដើរពីលិចទៅកើតឆ្លងកាត់ទទឹងថ្នល់ ដើរមិនទាន់ផុតផង ស្រាប់តែរថយន្តម៉ាកហ៊ីយ៉ាន់ដាយ ពណ៌ស ស្លាកលេខកំពង់ធំ 3A.0988 ចំណុះ១០តោន បើកបរពីជើងទៅត្បូង បានបុកជនរងគ្រោះពេញទំហឹង បណ្តាលឲ្យស្លាប់នៅកន្លែងកើតហេតុ បន្ទាប់មកអ្នកបើកបររថយន្តបើកទ្វារចុះគេចខ្លួនបាត់។
ក្រោយកើតហេតុសាកសពសមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។ រថយន្តអូសយកមករក្សារទុកនៅប៉ុស្តិ៍រដ្ឋបាលស្វាយអន្ទរ រង់ចាំការដោះស្រាយពេលក្រោយ៕