បាត់ដំបងៈ ជនសង្ស័យស្រីប្រុស៤នាក់ ត្រូវសមត្ថកិច្ចចាប់ខ្លួនភ្លាមៗ ដោយសង្ស័យពាក់ព័ន្ធនឹងករណីបាត់កាបូប ដែលមានលុយជាង១.០០០ដុល្លារអាមេរិក នៅក្នុងវត្តភ្នំសំពៅ បន្ទាប់ពីទទួលពាក្យបណ្ដឹងពីជនរងគ្រោះ។
សមត្ថកិច្ចឲ្យដឹងថា ក្រោយទទួលពាក្យបណ្តឹងពីជនរងគ្រោះ សមត្ថកិច្ចបានចុះឃាត់ខ្លួនជនសង្ស័យចំនួន៤នាក់ភ្លាមៗ នៅក្នុងសាលាឆាន់វត្តភ្នំសំពៅ នាថ្ងៃទី៩ ខែតុលា ឆ្នាំ២០១៨។ ជនសង្ស័យទាំង៤ មានឈ្មោះ ផល អ៊ីម ភេទស្រី, ឈ្មោះ ហង្ស ណារី ភេទស្រី, ឈ្មោះ ពេជ្រ សុភ័ក្ត្រ និងឈ្មោះ ផល ផា។ ចំណែកជនរងគ្រោះឈ្មោះ ចេង ប៊ុនរ៉ានី ភេទស្រី អាយុ៣១ឆ្នាំ នៅភូមិទួលតាឯក សង្កាត់ទួលតាឯក ក្រុងបាត់ដំបង បានបាត់បង់សម្ភារៈក្នុងកាបូបជាពិសេសគឺលុយជាង១,០០០ដុល្លារ។
ក្រោយការឃាត់ខ្លួន ជនសង្ស័យទាំង៤នាក់ ត្រូវបានក្រុមអន្តរាគមន៍បង្ការបង្ក្រាបបទល្មើស ប្រគល់ឲ្យទៅការិយាល័យជំនាញ នៃស្នងការដ្ឋាននគរបាលខេត្ត ដើម្បីចាត់ការតាមនីតិវិធី៕