គណៈប្រតិភូកម្ពុជាដែលមានសមាជិកចំនួន៥រូប មកពីគណបក្សប្រជាជនកម្ពុជាបានទៅចូលរួមកិច្ចប្រជុំភាពជាដៃគូនៃសភាអាស៊ី-អឺរ៉ុបលើកទី១០ ដែលធ្វើឡើងនៅក្នុងទីក្រុងប្រ៊ុចសែល ប្រទេសបែលហ្ស៊ិក ដែលបានប្រព្រឹត្តទៅកាលពីថ្ងៃទី២៧-២៨ ខែកញ្ញា កន្លងទៅដែលផ្តោតលើបញ្ហាប្រឈមផ្នែកបរិស្ថាន សម្រាប់តំបន់អាស៊ី និងអឺរ៉ុប។
នៅទីនោះមានភាពចម្រូងចម្រាសបានកើតឡើងនៅពេលដែលលោកស្រី មួរ សុខហួរ អតីតអនុប្រធានអតីតគណបក្សសង្គ្រោះជាតិ ដែលបានទៅសម្តែងការគួរសមជាមួយឯកឧត្តម ឈាង វុន។ ភាពចម្រូងចម្រាសនោះគឺ ឯកឧត្តម ឈាង វុន បានបណ្ដេញលោកស្រី មូរ សុខហួរ ចេញពីសាលប្រជុំសភាអឺរ៉ុប។ ភ្លាមៗនោះ លោកស្រី មួរ សុខហួរ បានធ្វើការផ្សាយផ្ទាល់តាមរយៈគេហទំព័រហ្វេសប៊ុក លោកស្រីបានសម្តែងការសោកស្ដាយ និងចោទថាជាចរិតរបស់មនុស្សមិនស្របច្បាប់។
លោកស្រី មួរ សុខហួរ បានថ្លែងពីក្នុងសាលប្រជុំសភាអឺរ៉ុបថាលោកស្រីមានការសោកស្ដាយណាស់ ដោយលោកស្រីបានទៅជម្រាបសួរគណៈប្រតិភូនៃប្រទេសកម្ពុជា ខ្ញុំជម្រាបសួរឯកឧត្តម ឈាង វុន ក្នុងនាមជាខ្មែរដូចគ្នា។
លោកស្រីសង្កត់ធ្ងន់ថា លោក ឈាង វុន បានប្រើភាសា និងឥរិយាបថមិនសមរម្យ នៅពេលលោកស្រីព្យាយាមទៅសម្តែងការគួរសមក្នុងនាមជាខ្មែរដូចគ្នាដែលជួបគ្នានៅឯក្រៅប្រទេស។
ឯកឧត្តម ឈាង វុន សង្កត់ធ្ងន់ថា តាមពិតគាត់(លោកស្រី សុខហួរ) ចង់មកបន្លំខ្លួនអង្គុយអាសនៈកម្ពុជា គាត់ឱ្យគេជូនមកដល់ខ្ញុំសួរគាត់ថា គាត់មកធ្វើអី? គាត់បែរជាថា គាត់មកសម្តែងការគួរសមជាមួយខ្ញុំ ខ្ញុំថា ខ្ញុំអត់ទទួលទេ។
កាលពីថ្ងៃទី០៣ ខែតុលា គេហទំព័រទំព័រហ្វេសប៊ុករបស់រដ្ឋសភាកម្ពុជា បានបង្ហោះវីដេអូឃ្លីបមួយទាក់ទងដំណើរទស្សនកិច្ចរបស់គណៈប្រតិភូកម្ពុជា ដោយក្នុងនោះឯកឧត្តម ឈាង វុន បានថ្លែងថាគណៈប្រតិភូកម្ពុជាបានទទួលស្វាគមន៍ពីសភានៃប្រទេសអឺរ៉ុបដែលចូលតាមច្រកទ្វារធំហើយលោកចាត់ទុកដំណើរទស្សនកិច្ចនេះថាជាជោគជ័យរបស់សភាកម្ពុជា និងជាជោគជ័យរបស់ពលរដ្ឋកម្ពុជាទាំងអស់ដែរ។
ឯកឧត្តម ឈាង វុន បានបញ្ជាក់យ៉ាងច្បាស់ថា៖ ប្រទេសនៅលើសកលលោកតាមរយៈសភាអាស៊ី-អឺរ៉ុបនេះបញ្ជាក់ថាកម្ពុជាយើងកំពុងតែដើរនៅលើផ្លូវត្រូវ។ យើងមានមោទនភាពដែលអង្គការសហប្រជាជាតិបានវាយតម្លៃលើប្រទេស ៣៨ ដែលរំលោភសិទ្ធិមនុស្ស ប៉ុន្តែក្នុងនោះគ្មានព្រះរាជាណាចក្រកម្ពុជាទេ។
ឯកឧត្តម ឈាង វុន បានទទួលស្គាល់ថា ឯកឧត្តមពិតជាបានបណ្ដេញលោកស្រី សុខហួរ ចេញមែនដោយសារតែប្រតិភូរបស់ឯកឧត្តមគឺជាតំណាងស្របច្បាប់តែ១គត់របស់កម្ពុជាដែលត្រូវបានគេអញ្ជើញឱ្យចូលរួមក្នុងកិច្ចប្រជុំនេះ។
នេះជាវីដេអូរបស់លោកស្រី សុខហួរ សម្តែងការសោកស្តាយចំពោះកាយវិការនិងពាក្យសម្តី ឯកឧត្តម ឈាង វុន៖
វីដេអូរបស់រដ្ឋសភាកម្ពុជា បង្ហាញពីលទ្ធផលកិច្ចប្រជុំភាពជាដៃគូនៃសភាអាស៊ី-អឺរ៉ុបលើកទី១០៖