ភ្នំពេញៈ កម្លាំងក្រុមការងាររៀបចំសណ្ដាប់ធ្នាប់ខណ្ឌមានជ័យ សហការជាមួយសង្កាត់ស្ទឹងមានជ័យ៣ បានចុះរៀបចំសណ្ដាប់ធ្នាប់នៅតាមសងខាងផ្លូវវេងស្រេង បន្ទាប់ពីអប់រំណែនាំធ្វើកិច្ចសន្យារាប់សិបដងរួចមកហើយ នៅតែរឹងរូសមកដាក់លក់អីវ៉ាន់ និងសម្ភារផ្សេងៗ តាមចិញ្ចើមផ្លូវ មិនទុកចិញ្ចើមថ្នល់ សម្រាប់អ្នកថ្មើរជើងដើរ នៅលើចិញ្ចើមថ្នល់បែបអនាធិបតេយ្យដដែលៗទៀត ទើបកម្លាំងបានចុះអនុវត្តវិធានការក្ដៅ ចុះរឹបអូសសម្ភារ យកមកសាលាខណ្ឌមានជ័យតែម្ដង ព្រោះប៉ះពាល់ការធ្វើចរាចរដល់អ្នកដំណើរ នៅតាមបណ្ដោយផ្លូវវេងស្រេងនេះ យ៉ាងខ្លាំងផងដែរ។
ចាប់ពីថ្ងៃនេះតទៅ ចំពោះបងប្អូនអាជីវករណាដែលនៅតែបង្កការយកទីតាំងខាងលើនេះ ដាក់លក់ដូរបែបអនាធិបតេយ្យ បាត់បង់សណ្តាប់ធ្នាប់សាធារណៈ អនាម័យ បរិស្ថាន និងសោភ័ណភាពទីក្រុង នឹងមានវិធានការតាមផ្លូវច្បាប់ ដែលពួកគាត់ពីមុនប្រឈម នឹងផ្លូវច្បាប់ចំនួនពីរគឺ៖ ១.ខុសច្បាប់ភូមិបាល ២.ខុសច្បាប់ចរាចរណ៍ផ្លូវគោក ដែលពួកគាត់កំពុងតែល្មើសដូចសព្វថ្ងៃនេះ។
ការចុះធ្វើសណ្ដាប់ធ្នាប់នេះ ដោយទទួលបានបញ្ជាផ្ទាល់ពីលោក ពេជ្រ កែវមុនី អភិបាលខណ្ឌមានជ័យ និងលោក ឡុង ង៉ែត អភិបាលរងទទួលបន្ទុក សន្តិសុខ សណ្ដាប់ធ្នាប់សាធារណៈ នៅថ្ងៃទី១៩ ខែតុលា ឆ្នាំ២០១៨ បានចាត់តាំងឲ្យលោក ស៊ុំ រិទ្ធី មន្ត្រីសាលាខណ្ឌ និងលោក ជា ណារិន អនុប្រធានការិយាល័យផែនការ និងអភិវឌ្ឍន៍ខណ្ឌ និងលោក ឡេង ច័ន្ទភត្រា ប្រធានសន្តិសុខសណ្ដាប់ធ្នាប់ខណ្ឌ សហការគ្នាអនុវត្តបទបញ្ជា និងដឹកនាំកម្លាំងសណ្ដាប់ធ្នាប់ខណ្ឌ សហការជាមួយកម្លាំងសង្កាត់ស្ទឹងមានជ័យ៣ កម្លាំងនគរបាលប៉ុស្តិ៍ស្ទឹងមានជ័យ៣ និងក្រុមប្រឹក្សាសង្កាត់ មេភូមិ បានបញ្ឍប់ទីតាំងលក់ដូរបែបអនាធិបតេយ្យ រំលោភយកចិញ្ចើមថ្នល់ប៉ះពាល់សណ្តាប់ធ្នាប់សាធារណៈ អនាម័យ បរិស្ថាន និងសោភ័ណភាព ទីក្រុងយើងយ៉ាងខ្លាំង ព្រោះកន្លងមកអ្នកលក់ដូរទាំងនោះ មិនបានចូលរួមសហការជាមួយ អាជ្ញាធរឡើយ ពួកគាត់តែងចាត់ទុកចិញ្ចើមផ្លូវនៅតាមបណ្ដោយផ្លូវវេងស្រេង សង្កាត់ស្ទឹងមានជ័យ៣ ធ្វើជាទីផ្សារប្រជុំជនមួយ ដែលពួកគាត់តែងតែបង្កការកកស្ទះចរាចរណ៍តាមផ្លូវ លក់ដូរគ្មានសណ្តាប់ធ្នាប់ រំលោភយកចិញ្ចើមផ្លូវ ឬចំណីថ្នល់ធ្វើជាកម្មសិទ្ធិលក់សម្ភារផ្តាច់មុខដូចជា ៖ ត្រី សាច់ បន្លែ ខោ អាវ។ល។ ពិសេសបង្កភាពខ្វះអនាម័យ ចោលសំរាម បន្សល់ទុកកាកសំណល់ ស្អុយមកលើផ្លូវជាតិជារៀងរាល់ថ្ងៃ៕