សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថាគម្រោងបង្កើតខេត្តថ្មីចំនួនពីរ នឹងមិនមាននោះឡើយ។ នេះបើតាមការបញ្ជាក់របស់ សម្តេចអគ្គមហាសេនាបតីតេជោ ហ៊ុន សែន ក្នុងពិធីអបអរសាទរទិវាគ្រូបង្រៀន ០៥ តុលា ក្រោមប្រធានបទ «គុណភាពគ្រូ ជាគុណភាពមូលធនមនុស្ស សម្រាប់ការអភិវឌ្ឍប្រកបដោយចីរភាព» ដែលប្រារព្ធធ្វើឡើងនៅវិទ្យាស្ថានជាតិអប់រំ នៅព្រឹកថ្ងៃសុក្រ ១១រោច ខែភទ្របទ ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី៥ ខែតុលា ឆ្នាំ២០១៨។
សូមរំលឹកថា សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃបានស្នើសុំបង្កើតខេត្តថ្មីចំនួន២ដោយបំបែកចេញពីខេត្ដកណ្ដាល និងចន្លោះខេត្តមណ្ឌលគិរី-រតនគិរី ដើម្បីលើកកម្ពស់ប្រសិទ្ធភាពនៃការគ្រប់គ្រងរដ្ឋបាល និងថែរក្សាសន្ដិសុខសណ្ដាប់ធ្នាប់សាធារណៈ បង្កើនប្រសិទ្ធភាពនៃការគ្រប់គ្រង និងអភិវឌ្ឍន៍។
សម្តេចក្រឡាហោម ស្នើសុំគោលការណ៍ពីនាយករដ្ឋមន្រ្តីដើម្បីសិក្សាលទ្ធភាពរៀបចំបង្កើតខេត្តថ្មីចំនួន២ ចេញកាលពីថ្ងៃទី២៧ ខែសីហាឆ្នាំ២០១៨ បញ្ជាក់ថា ខេត្តថ្មីទាំងពីរនេះ ខេត្តមួយត្រូវកាត់ចេញពីខេត្ដកណ្ដាល និងខេត្តមួយទៀត ត្រូវកាត់ចេញពីស្រុកកោះញែកនៃខេត្តមណ្ឌលគិរី និងស្រុកលំផាត់នៃខេត្តរតនគិរី។