Saturday, October 27, 2018

សម្តេច ស​ ខេង​ បញ្ជាឲ្យ​បិទច្រករបៀងអូរបីជាន់ទាំងស្រុង​ រដ្ឋបាលខេត្តបន្ទាយមានជ័យ បានត្រឹមជូនដំណឹង​មិនអនុវត្តន៍

អាម៉ាប៉ាប៉ាញ៉ូស

បន្ទាយមានជ័យៈ សម្តេចក្រឡា​ហោម​ ស​ ខេង​ ឧបនាយករដ្ឋមន្ត្រី​ រដ្ឋមន្ត្រីក្រសួងមហាផ្ទៃ បានដាក់បទបញ្ជាឲ្យ​រដ្ឋបាលខេត្តបន្ទាយមានជ័យ បញ្ឈប់ និងបិទទាំងស្រុងច្រករបៀងអូរបីជាន់ ដែលស្ថិតនៅឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ បទបញ្ជានេះ ត្រូវបានរដ្ឋបាលខេត្តបន្ទាយមានជ័យ​ លោក​ សួន​ បវរ​ បានចេញលិខិតជូនដំណឹងមួយទៅតាមបណ្តាអង្គភាពពាក់ពន្ធ័ចូលរួមអនុវត្តន៍បទបញ្ជានេះ។

សូមបញ្ជាក់ថា​ ច្រកបៀងអូរបីជាន់ក្រោមការដឹកនាំរបស់លោកឧត្តមសេនីយ៍ត្រី​ ឃួន​ ជឿន​ មេបញ្ជាការកងការពារព្រំដែន៥០៣​ ត្រូវបានបិទទាំងស្រុង​ រាល់ទំនិញសព្វសារពើពីប្រទេសថៃ ក៏លែងមានការនាំចូលដូចសព្វមួយដង។

ប៉ុន្តែអ្វីដែលគួរឲ្យ​ភ្ញាក់ផ្អើលនោះ គឺ​ច្រករបៀងអូរបីជាន់នេះ បានបើកដំណើរការឡើងវិញក្រោយ​ពីបិទត្រឹមតែមួយដង្ហើមចង្រឹត​។ ការបើកដំណើរច្រកនេះ បានធ្វើឲ្យ​មានមតិរិះគន់បានលើកឡើងថា បទបញ្ជាសម្តេចក្រឡាហោម​ ស​ ខេង​ គ្មានអំណាច និងប្រសិទ្ធភាពគ្រប់ដណ្តប់លើរដ្ឋបាលខេត្តបន្ទាយមានជ័យនោះទេ​ ឲ្យ​បិទម៉េចបានបើកច្រករបៀងមួយនេះ ជាប្រភពសេដ្ឋកិច្ចដ៏ធំសម្រាប់ថ្នាក់ដឹកនាំអង្គភាពពាក់ពន្ធ័ រួមនឹងរដ្ឋបាលខេត្តផងដែរ។

ប្រភពដែលអាចជឿទុកចិត្ត​ បានឲ្យ​ដឹងថា ច្រករបៀងអូរបីជាន់ ក្រោយពីបើកដំណើរការវិញគេឃើញមានទំនិញគេចពន្ធគ្រប់ប្រភេទពីប្រទេសថៃ ត្រូវបាននាំចូល​ រួមទាំង​ គោ​ ក្របី​ ជ្រូក​ មាន់​ ទា​ ផងដែរ។ ​ការបើកឲ្យ​មានការនាំចូលទាំងនេះ គឺប៉ះពាល់យ៉ាងធ្ងន់ដល់ចំណូលពន្ធរដ្ឋ​ ប៉ះពាល់ដល់ជីវភាពពលរដ្ឋអ្នកចិញ្ចឹម​ បំផ្លាញហេដ្ឋារចនាសម្ពន្ធ័ផ្លូវថ្នល់​ ដូច្នេះគួរតែអាជ្ញាធរនិងអង្គភាពពាក់ពន្ធ័ពិនិត្យឡើងវិញ និងចូលរួមអនុវត្តបទបញ្ជាសម្តេចក្រឡាហោម ឲ្យ​មានប្រសិទ្ធភាព៕

@Amapapa.News

Feature Ads