ភ្នំពេញៈ អាជ្ញាធរបានដុតកម្ទេចចោលទូហ្គេមបៀរ ថ្មី ចាស់ សរុប៥៦ទូ ដែលបង្ក្រាបបាននាពេលកន្លងមក បន្ទាប់ពីមានការឯកភាព ។
ប្រភពពីការិយាល័យនគរបាលព្រហ្មទណ្ឌកម្រិតស្រាលបានឲ្យដឹងថា ដោយមានការអនុញ្ញាតពី លោក ឧត្តមសេនីយ៍ឯក អគ្គស្នងការរង និងជាស្នងការនគរបាលរាជធានីភ្នំពេញ លោកឧត្តមសេនីយ៍ត្រីស្នងការរង ទទួលផែនការងារព្រហ្មទណ្ឌ និងមានការឯកភាព ពីលោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ការិយាល័យនគរបាលព្រហ្មទណ្ឌកំរិតស្រាល នៅថ្ងៃទី ១២ ខែ តុលា ឆ្នាំ ២០១៨ វេលាម៉ោង ១៣ និង ៥០ នាទី បានដុតកម្ទេច ទូហ្គេមបាញ់ត្រី និងទូហ្គេមបៀរ សរុបចំនួន ៥៦ ទូ ។
ប្រភពបន្តថា ទូហ្គេមទាំងនេះ ត្រូវបានសមត្ថកិច្ចបង្រ្កាបបាននាពេលកន្លងមក ហើយទើបតែសម្រេចដុតបំផ្លាញចោលនៅចំណុចដីឡូតិ៍គ្មានលេខមួយកន្លែង ស្ថិតនៅសង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ៕