ស្ទឹងត្រែងៈ កម្លាំងជំនាញ នៃស្នងការដ្ឋាននគរបាលខេត្តស្ទឹងត្រែង សហការជាមួយមន្ទីរប្រឆាំងគ្រឿងញៀនខេត្ត នៅថ្ងៃទី២៩ ខែតុលា ឆ្នាំ២០១៨ បានចាប់ខ្លួនបុរសម្នាក់ ជាមេខ្លោងជួញដូរគ្រឿងញៀនខុសច្បាប់ ដោយដកហូតបានថ្នាំញៀនចំនួន៥កញ្ចប់ធំ។
ប្រតិបត្តិការនេះ បានធ្វើឡើងនៅចំណុចវាលប៉ារា ស្ថិតក្នុងភូមិសំរោង ឃុំស្រែសំបូរ ស្រុកសៀមប៉ាង ខេត្តស្ទឹងត្រែង ដោយឃាត់ខ្លួនជនសង្ស័យម្នាក់ ឈ្មោះ ជួប ឌា ភេទប្រុស អាយុ៣០ឆ្នាំ ជនជាតិខ្មែរ រស់នៅភូមិសំរោង ឃុំស្រែសំបូរ ស្រុកសៀមប៉ាង ខេត្តស្ទឹងត្រែង មុខរបរកសិករ។ វត្ថុតាងដកហូតបាន រួមមាន ថ្នាំញៀនចំនួន៥កញ្ចប់ធំ មិនទាន់ថ្លឹង ប៉ុន្តែទម្ងន់ប្រហែល៥គីឡូក្រាម។
បច្ចុប្បន្នជនសង្ស័យ ព្រមទាំងវត្ថុតាង ត្រូវបានឃុំខ្លួននៅស្នងការដ្ឋាននគរបាលខេត្ត ដើម្បីកសាងសំណុំរឿងចាត់ការតាមនីតិវិធីច្បាប់៕
