បន្ទាយមានជ័យៈ មន្ត្រីខណ្ឌរដ្ឋបាលព្រៃឈើខេត្តបន្ទាយមានជ័យ សហការជាមួយយោធាយោធភូមិភាគទី៥ ដឹកនាំដោយលោក ជា ផល្លឺ បានសហការបង្ក្រាប ហើយក៏ត្រូវដោះលែងរថយន្តដឹកឈើធ្នង់មួយគឿង ដែលមានផ្ទុកឈើប្រមាណ៦ទៅ៧ម៉ែត្រគូប យ៉ាងតក់ក្រហល់បំផុត បន្ទាប់ពីកងរាជអាវុធហត្ថ ក៏ដូចអភិបាលរងខេត្ត បានចេញមុខអន្តរាគមន៍ ដោយសំអាងថា ឈើទាំងនេះ គឺព្រះសង្ឃគង់នៅវត្តហ្លួង ស្រុកមង្គលបុរី ទិញ និងដឹកយកទៅធ្វើសាលាឆាន់នោះទេ ។
ភ្នាក់ងារអង្គភាពសារព័ត៌មាន Cam Post ប្រចាំខេត្តបន្ទាយមានជ័យ រាយការណ៍ឲ្យដឹងថា ការចាប់រថយន្តដឹកឈើខាងលើនេះ កើតឡើងកាលពីវេលាម៉ោង៨និង៥០នាទី យប់ថ្ងៃទី២៩ ខែតុលា ឆ្នាំ២០១៨ ស្ថិតនៅចំណុចនឹងមុខខណ្ឌរដ្ឋបាលព្រៃឈើខេត្តតែម្តង ខណៈកំពុងធ្វើដំណើរលោតឆ័ត្រ ទិសដៅពីជើងមកត្បូង មកដល់មុខខណ្ឌរដ្ឋបាលព្រៃឈើ ។
បើតាមភ្នាក់ងាររបស់យើង ឈើទាំងនេះ គឺឈ្មួញដឹកតាមរថយន្តកូរ៉េ ត្រូវបានលោក អ៊ុំ មេត្រី អភិបាលរងខេត្តបន្ទាយមានជ័យ និងមន្ត្រីកងរាជអាវុធហត្ថ ជួយអន្តរាគមន៍ឲ្យដោះលែង បន្ទាប់ពីខាងរដ្ឋបាលព្រៃឈើ សហការជាមួយខាងយោធាយោធភូមិភាគទី៥ ចាប់បានមួយដង្ហើមចង្រិតនោះ ។
មន្ត្រីរដ្ឋបាលព្រៃឈើ បាននិយាយថា ខណៈឃាត់រថយន្ត និងឈើ ដែលមានចំណុះប្រហែល៦ទៅ៧ម៉ែត្រគូបនេះរួចហើយ ក៏បានសួរនាំអំពីរឿងលិខិតស្នាមដឹកឈើពីសំណាក់ក្រុមអ្នកដឹកឈើទាំងនោះ ហើយត្រូវគេឆ្លើយថា លិខិតសុំអនុញ្ញាត គឺបានដាក់ទៅផ្នែកពាក់ព័ន្ធផងដែរ ប៉ុន្តែមិនទាន់មានការបោះត្រាស៊ីញ៉េនៅឡើយទេ ដោយសារតែដាក់លិខិតសុំ ចំថ្ងៃឈប់សម្រាក គ្មាននរណាគេធ្វើការ។ ម្ល៉ោះហើយ មានតែលោតឆ័ត្រដឹកឈើជាមុនសិន ចាំរត់ច្បាប់តាមក្រោយ ទើបវាទាន់សភាពការណ៍ ៕
