Saturday, October 27, 2018

រថយន្តថៅកែភោជនីយដ្ឋាន សេវេនប្រាយ ឃីង័ ថយក្រោយមិនប្រយ័ត្ន បុកយុវជនម្នាក់ ស្លាប់មួយរំពេច

អាម៉ាប៉ាប៉ាញ៉ូស

ភ្នំពេញៈ បុគ្គលិកម្នាក់ ដែលធ្វើការនៅភោជនីយដ្ឋាន​ សេវេនប្រាយ​ ឃីន័​ បានយកសោររថយន្តរបស់ថៅកែ មកបើក​ថយក្រោយ​ ស្រាប់តែជាន់ហ្គែបន្ថែម បណ្តាលឲ្យបុកទៅយុវជនម្នាក់ យ៉ាងពេញទំហឹង​ ស្លាប់ភ្លាមៗនៅនឹងកើតហេតុ កាលពីវេលាម៉ោង១១៖១៥នាទីព្រឹក​ ថ្ងៃទី២៧​ ខែតុលា​ ឆ្នាំ​២០១៨​ ស្ថិតនៅតាមបណ្តោយផ្លូវ១០៨​ មុខភោជនីយដ្ឋាន​ សេវេនប្រាយ​ ឃីន័​ ក្នុងសង្កាត់វត្តភ្នំ​ ខណ្ឌដូនពេញ​ រាជធានីភ្នំពេញ​។

សមត្ថកិច្ចបានឲ្យដឹងថា សពបុរសរងគ្រោះខាងលើមានឈ្មោះ​ ច័ន្ទ​ មេសារ​ អាយុ​២០ឆ្នាំ​ មុខរបរ កម្មករសំណង់​ ស្នាក់នៅផ្ទះជួល​ ម្តុំទឹកថ្លា​ ខណ្ឌសែនសុខ​ និងមានស្រុកកំណើតនៅភូមិក្រាំងក្រូច​ ឃុំ​ស្គុះ​ ស្រុកសំរោងទង​ ខេត្តកំពង់ស្ពឺ​។ ចំណែកឯអ្នកបង្ក មិនត្រូវបានស្គាល់អត្តសញ្ញាណនៅឡើយទេ។

ប្រភពព័ត៌មានពីសាក្សីនៅនឹងកន្លែងកើតហេតុ​ បានប្រាប់ឲ្យដឹងថា​ មុនកើតហេតុ​ គេបានឃើញបុរសម្នាក់​ ដែលជាបុគ្គលិកធ្វើការនៅភោជនីយដ្ឋាន​ សេវេនប្រាយ​ ឃីន័​ បានឡើងទៅបើករថយន្តរបស់ថៅកែរបស់ខ្លួន​ ខណៈពេលនោះ​ ស្រាប់តែបុគ្គលិករូបនេះ​ បានថយរថយន្តមកក្រោយយ៉ាងលឿន​ បណ្តាលឲ្យបុកម៉ូតូរងគ្រោះយ៉ាងពេញទំហឹង បណ្តាលឲ្យស្លាប់បាត់បង់ជីវិតភ្លាមៗនៅនឹងកន្លែងកើតហេតុ។ ក្រោយពីបង្កហេតុ​ បុគ្គលិកខាងលើ បានរត់គេចខ្លួនបាត់ស្រមោល​ ដោយបន្សុល់ទុកតែរថយន្តរបស់ថៅកែហាងនៅនឹងកន្លែង។

ក្រោយកើតហេតុ​ សមត្ថកិច្ចមូលដ្ឋានបានចុះមកដល់​ បានទាក់ទងហៅសមត្ថកិច្ចជំនាញផ្នែកចរាចរណ៍ជើងគោក​ នៃស្នងការដ្ឋាននគរបាលរាជធានីភ្នំពេញ​ ដើម្បីធ្វើការវាស់វែងយករថយន្តបង្ក​ និងម៉ូតូរងគ្រោះទៅរក្សាទុក​ រង់ចាំដោះស្រាយគ្នាតាមផ្លូវច្បាប់។ ចំណែកឯសាកសពជនរងគ្រោះខាងលើ​ ត្រូវសមត្ថកិច្ចធ្វើកំណត់ហេតុ ប្រគល់ជូនទៅក្រុមគ្រួសារដឹកយកទៅធ្វើបុណ្យតាមប្រពៃណីនៅឯស្រុកកំណើត៕

@Amapapa.News

Feature Ads