កោះកុងៈ មានករណីគ្រោះថ្នាក់ចរាចរណ៍មួយ បានកើតឡើងដោយរថយន្តបុកគ្នា៣គ្រឿង កាលពីម៉ោង៨៖៤០នាទីព្រឹកថ្ងៃទី២៩ ខែតុលា ឆ្នាំ២០១៨ នៅលើផ្លូវ៤៨ ចំណុចគីឡូលេខ១៨ ក្នុងភូមិតាធង ឃុំដងពែង ស្រុកស្រែអំបិល បណ្ដាលបុរសម្នាក់ គៀបស្លាប់ក្នុងរថយន្ត និងស្រ្តីម្នាក់ទៀត រងរបួសធ្ងន់។
សមត្ថកិច្ច បានឲ្យដឹងថា រថយន្តទាំង៣គ្រឿងនោះរួមមាន ៖ រថយន្តម៉ាក ford ពណ៌ត្រេអ៊ី ពាក់ស្លាក ខម 2.6156 និងរថយន្តម៉ាកកូរ៉ូឡា ពាក់ស្លាកលេខ សៀមរាប 2A-0034 និងរថយន្តដឹកដីកូរ៉េ (គមនាគម) ពាក់ស្លាកកោះកុង 3A-0567 ។ គ្រោះថ្នាក់ចរាចរណ៍នេះ បណ្តាលឲ្យបុរសម្នាក់ស្លាប់ និងស្រ្តីម្នាក់ រងរបួសធ្ងន់ អ្នកទាំងពីរជិះក្នុងរថយន្តកូរ៉ូឡា។ ចំណែករថយន្តពីរគ្រឿងទៀត មិនមានរងរបួសឡើយ។
ក្រោយកើតហេតុជនរងគ្រោះ ត្រូវបានបញ្ជូនទៅកាន់មន្ទីរពេទ្យបង្អែកស្រុក។ ចំណែករថយន្តទាំង៣គ្រឿង សមត្ថកិច្ចបានអូសយកមកកាន់អធិការដ្ឋាន ដើម្បីដោះស្រាយពេលក្រោយ។ ដោយឡែកសាកសព សមត្ថកិច្ចទំនាក់ទំនងទៅក្រុមគ្រួសារឲ្យមកទទួលយកទៅធ្វើបុណ្យតាមប្រពៃណី៕
