រដ្ឋបាលរាជធានីភ្នំពេញ បានប្រាប់សាធារណជន ក្រុមហ៊ុន អាជីវកម្មដ្ឋាន និងប្រជាពលរដ្ឋដែលរស់នៅ និងធ្វើដំណើរតាមបណ្តាយផ្លូវដួង ងៀប ចាប់ពីផ្លូវលេខ២០០៤ ដល់ផ្លូវចោមចៅ(វេងស្រេង) ស្ថិតក្នុងខណ្ឌសែនសុខ រាជធានីភ្នំពេញ ត្រូវផ្អាកធ្វើចរាចរណ៍លើផ្លូវនេះ រយៈពេល១ខែ ដើម្បីឲ្យអាជ្ញាធរដាក់ប្រព័ន្ធលូរំដោះទឹកភ្លៀងក្នុងរដូវវស្សាដែលជន់លិច។ នេះបើយោងតាមសេចក្តីជូនដំណឹងរបស់រដ្ឋបាលរាជធានីភ្នំពេញចុះពីថ្ងៃទី១ ខែតុលា ឆ្នាំ២០១៨។
ការផ្អាកធ្វើចរាចរណ៍លើផ្លូវនេះ ត្រូវអនុវត្តន៍ចាប់ពីថ្ងៃជូនដំណឹងនេះ រហូតដល់ការដ្ឋានត្រូវបញ្ចប់ ក្នុងរយៈពេល៣០ថ្ងៃ។
យោងតាមសេចក្តីជូនដំណឹងដដែលបានឱ្យដឹងថា៖ សាលារាជធានីភ្នំពេញ នឹងដាក់លូប្រអប់មេកាត់ទទឹងលើផ្លូវ ដួង ងៀប ទំហំមុខកាត់២,៥ម៉ែត្រ x ២,៥ម៉ែត្រ ចំនួន៣ជួរ ដោយភ្ជាប់ជាមួយប្រឡាយបារាំង ដើម្បីរំដោះទឹកចេញពីតំបន់ខាងកើត និងត្បូង អាកាសយានដ្ឋានអន្តរជាតិភ្នំពេញ ពិសេសតំបន់សឡា ផ្លូវ២០០៤។
ជាមួយគ្នានេះ អាជ្ញាធរ ក៏បានអំពាវនាវដល់អ្នកដំណើរលើផ្លូវនេះ ត្រូវធ្វើចរាចរណ៍លើផ្លូវផ្សេង ដើម្បីបញ្ចៀសការកកស្ទះ និងជួបបញ្ហាផ្សេងៗ ដែលអាចកើតឡើងជាយថាហេតុ។
សាលារាជធានីភ្នំពេញបានស្នើឱ្យស្នងការដ្ឋាននគរបាលរាជធានីភ្នំពេញ បញ្ជាការដ្ឋាន កងរាជអាវុធហត្ថរាជធានីភ្នំពេញ រដ្ឋបាលខណ្ឌសែនសុខ និងមន្ទីរសាធារណការនិងដឹកជញ្ជូនរាជធានីភ្នំពេញ សហការអនុវត្ត និងសម្រួលសណ្តាប់ធ្នាប់ចរាចរណ៍តាមកំណាត់ផ្លូងខាងលើ ដើម្បីបញ្ចៀសនូវការស្ទះចរាចរណ៍ និងបញ្ហាផ្សេងៗដែលកើតឡើងជាយថាហេតុ។