ភ្នំពេញៈ យប់កាន់បិណ្ឌ៨ ករណីគ្រោះថ្នាក់ចរាចរណ៍កើតឡើងច្រើនករណី ជាក់ស្ដែងក្រោមតំណក់ភ្លៀងរលឹមស្រិចៗផង គ្រោះថ្នាក់ចរាចរណ៍មួយបានកើតឡើង ដោយជនជាតិម៉ាឡេស៊ី២នាក់ បើករថយន្តម៉ាក TACOMA ប្រដេញគ្នាជាមួយរថយន្ត LAND CRUISER បើកបរដោយជនជាតិជប៉ុន២នាក់ទៀត ក្នុងល្បឿនយ៉ាងលឿន បានវ៉ាជែងគ្នាមិនផុត ក៏ជ្រុលទៅបុកចំបញ្ឆិតពីមុខ បណ្ដាលឲ្យរេចង្កូតទៅបុកតូបយាមរបស់សន្តិសុខ ខ្ទេចអស់ និងបុកបាក់ដើមចំប៉ាអស់១ដើមទៀត បាក់ដាច់ទាំងគល់ រួចបន្តទៅបុកផ្ទប់ជាប់និងបង្គោលភ្លើង បាក់អស់ចំនួន១ដើម និងរងការខូចខាតយ៉ាងដំណំ តែសំណាងល្អមិនបណ្ដាលឲ្យមនុស្សរងរបួសនោះទេ។
ហេតុការណ៍គ្រោះថ្នាក់ចរាចរណ៍ដ៏សាហាវដូចរឿងកុននេះ បានកើតឡើងកាលពី ម៉ោង០៣ ទៀបភ្លឺ ថ្ងៃទី៣ ខែតុលា ឆ្នាំ២០១៨ នៅត្រង់ចំណុចផ្លូវបែកជាបួន ផ្លូវ៦៣ កែងផ្លូវលេខ៤០០ ស្ថិតក្នុងសង្កាត់បឹងកេងកង១ ខណ្ឌចំការមន រាជធានីភ្នំពេញ (ជិតវិទ្យាល័យជាស៊ីមបឹងកេងកង)។
ប្រភពពីសន្តិសុខយាមសណ្ឋាគារទល់មុខកន្លែងកើតហេតុបានប្រាប់ភ្នាក់ងារ CAM POST ថា នៅមុនកើតហេតុ គេឃើញ រថយន្តមួយគ្រឿង ម៉ាក TOYOTA TACOMA ពណ៍ស ពាក់ស្លាកលេខភ្នំពេញ 2AQ-5114 បើកបរដោយជនជាតិម៉ាឡេស៊ី២នាក់ ធ្វើដំណើរពីត្បូងទៅជើង ដោយឃើញបើកប្រដេញគ្នា ជាមួយរថយន្តមួយគ្រឿងទៀត LAND CRUISER ពណ៍ខ្មៅ ពាក់ស្លាកលេខឧត្ដរមានជ័យ 2A-0205 ក្នុងល្បឿនយ៉ាងលឿនដូចគ្នា ខណៈពេលមកដល់ចំណុចកើតហេតុដែលជាផ្លូវបែកជាបួន មិនព្រមបន្ថយល្បឿនទេ រថយន្ត TACOMA បានបន្ថែមល្បឿន ដើម្បីវ៉ាជែងអោយផុត ស្រាប់តែរថយន្ត LAND CRUISER បានបន្ថែមល្បឿនដែរ ហើយរថយន្តទាំងពីរគ្រឿងរេចង្កូតមកអែបក្បែរគ្នា ហើយរថយន្ត LAND CRUISER ក៏បានបុករថយន្ត TACOMA ប៉ះបញ្ឆិតចំខាងមុខ បណ្ដាលឲ្យរថយន្ត LAND CRUISER ទាញចង្កូតមកវិញជ្រុល ឡើងទៅលើចិញ្ចើមផ្លូវ បុករះតូបយាមរបស់សន្តិសុខ ខ្ទេចអស់ទាំងស្រុង និងបុកដើមចំប៉ា បាក់ដាច់ត្រឹមគល់ អស់១ដើមរួចរថយន្តមិនទាន់អស់ល្បឿន បន្តទៅបុកផ្ទប់បង្គោលភ្លើងថ្ម ពេញទំហឹង បណ្ដាលឲ្យបាក់បង្គោលភ្លើងចំនួន១ដើម ចំណែកឯរថយន្តបោកជាប់នឹងបង្គោលភ្លើងអែបទៅជាប់របងផ្ទះវីឡា រងការខូចខាតយ៉ាងដំណំ និងបែកកញ្ចក់ខាងមុខចំហៀងខាងស្ដាំ និងខ្ទាតកម្ទេចកំទីបាក់បែក របាត់របាយពេញផ្លូវ ចំណែកឯរថយន្ត TACOMA ខ្ទាតវិលក្បាលត្រលប់ក្រោយ១ជុំ រងការខូចខាតខាងមុខចំហៀងខាងស្ដាំយ៉ាងដំណំផងដែរតែសំណាងល្អមិនបណ្ដាលឲ្យមនុស្សរងរបួសនោះទេ ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើត រាយការណ៍ប្រាប់សមត្ថកិច្ចជំនាញ ចុះមកធ្វើការវាស់វែង រួចស្ទូចយករថយន្តទាំង២គ្រឿង ទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយ សងថ្លៃខូចខាតទ្រព្យសម្បត្តិរដ្ឋ តាមផ្លូវច្បាប់៕
