ភ្នំពេញៈ របាំងថ្មពុះចែកទ្រូងផ្លូវ៥កង់ បានបាក់ខ្ទាតរបាត់របាយពេញផ្លូវ ដោយសាររថយន្តធុនធំមួយគ្រឿងដឹកអង្ករ លើសទម្ងន់ បើកឡើងស្ពានអាកាសក្បាលថ្នល់មិនរួច ហើយដាច់ហ្វ្រាំង រអិលថយក្រោយវិញបុករបាំងថ្ម ប៉ុន្តែពិតជាសំណាងល្អ មិនបណ្តាលឲ្យនរណារម្នាក់រងរបួសនោះទេ។
ឧបទ្ទវហេតុគ្រោះថ្នាក់ចរាចរណ៍នេះ បានកើតឡើងនៅវេលាម៉ោង១១៖៣០នាទីយប់ ថ្ងៃព្រហស្បតិ៍ត ទី១៨ ខែតុលា ឆ្នាំ២០១៨ នៅលើស្ពានអាកាសក្បាលថ្នល់(ខាងត្បូង) ស្ថិតក្នុងភូមិព្រែកតានូ១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ (មុខគ្លីនិកសម្ភពក្បាលថ្នល់) ។
សាក្សីឃើញហេតុការណ៍ផ្ទាល់ បានរៀបរាប់ប្រាប់ឲ្យភ្នាក់ងារ CAM POST ដឹងថា មុនពេលកើតហេតុ គាត់ឃើញរថយន្តដឹកទំនិញធុនធំមួយគ្រឿង មិនស្គាល់ម៉ាក ពាក់ស្លាកលេខព្រះសីហនុ 3A-0882 បានធ្វើដំណើរតាមផ្លូវជាតិលេខ២ ពីត្បូងមកជើង លុះមកដល់ចំណុចកើតហេតុ រថយន្តបានបន្ថែមល្បឿនឡើងស្ពានអាកាសក្បាលថ្នល់ ខណៈដែលកំពុងឡើងជិតដល់ពាក់កណ្តាលស្ពានហើយ បែរជាបើកឡើងលែងរួច ព្រោះរថយន្តដឹកលើសទម្ងន់ ហើយស្រាប់តែដាច់ហ្វ្រាង រអិលថយចុះមកក្រោមវិញ ស្របពេលដែលមានរថយន្តធុនតូចមួយគ្រឿងទៀត កំពុងបើកមកពីក្រោយ ដល់គល់ស្ពានហើយ ចំណែកគន្លងផ្លូវម្ខាងទៀតស្ងាត់មិនទាន់មានអ្នកបើកឆ្លងកាត់ទេ ទើបតៃកុងរថយន្តធុនធំនោះ មានស្មារតីច្បាស់លាស់ក្នុងការសម្រេចចិត្តភ្លាមៗ កាច់ចង្កូតវិលរថយន្តទៅបុករបាំងថ្មពុះចែកទ្រូងផ្លូវលើស្ពានអាកាសក្បាលថ្នល់ បណ្ដាលឱ្យបាក់ខ្ទេចអស់ចំនួន៥ផ្ទាំង ហើយនេះពិតជាសំណាងហើយ ដែលរថយន្តកល់ជាប់របាំងថ្ម លែងរអិលចុះទៀត និងមិនគ្រោះថ្នាក់ដល់មនុស្សណាម្នាក់នោះទេ។ ចំណកតៃកុងរថយន្តឃើញសភាពខូចខាតច្រើនពេក ក៏បានគេចខ្លួនបាត់ពីកន្លែងកើតហេតុមុនសមត្ថកិច្ចចុះមកដល់។
ក្រោយកើតហេតុសមត្ថកិច្ចមូលដ្ឋានប៉ុស្តិ៍នគរបាលចាក់អង្រែលើ បានរាយការណ៍ប្រាប់សមត្ថកិច្ចផ្នែកចរាចរណ៍ខណ្ឌចុះមក និងរាយការណ៍ប្រាប់សមត្ថកិច្ចជំនាញចុះមកធ្វើការវាស់វែង និងបិតផ្លូវម្ខាងមិនឲ្យធ្វើចរាចរណ៍ជាង៤ម៉ោង ដើម្បីយករថយន្តស្ទូចមានទំហំធំមកស្ទូចទើបបាន ព្រោះរថយន្តបង្កហេតុមានផ្ទុកអង្កររាប់តោនទៀត ហើយស្ទូចដាក់លើរថយន្តកុងតឺន័រ រួចដឹកយកទៅរក្សាទុក នៅការិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ ដើម្បីរង់ចាំធ្វើការដោះស្រាយលើការខូចខាតសម្បត្តិរដ្ឋតាមផ្លូវច្បាប់៕
