Sunday, October 14, 2018

លោក សុខ ឥសាន ៖ ក្រុមប្រឆាំងប្រកាន់រើសអើង សិទ្ធិសេរីភាព នយោបាយ និងការបញ្ចេញមតិ

អាម៉ាប៉ាប៉ាញ៉ូស

ភ្នំពេញៈ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថា ក្រុមប្រឆាំងបានប្រកាន់រើសអើង សិទ្ធិសេរីភាព នយោបាយ និងការបញ្ចេញមតិ សម្រាប់ជាតិសាសន៍ខ្លួន។

លោក សុខ ឥសាន បានបញ្ជាក់ប្រាប់ឲ្យដឹងនៅថ្ងៃទី១៤ តុលា យ៉ាងដូច្នេះថា កន្លងទៅពួកអគតិមួយចំនួនបាននិយាយវាយប្រហារមកលើកម្ពុជាថា មានការរឹតត្បិតខាងសិទ្ធិសេរីភាពខាងនយោបាយ និងការបញ្ចេញមតិ​ ។ ប៉ុន្តែបើគេសង្កេតមើលលើសភាពការណ៍ជាក់ស្តែងនៅក្នុងប្រទេស​សរអាថ្មីៗនេះ​ គេនឹងឃើញថា នៅប្រទេសមហាអំណាចមួយនេះ ពោរពេញទៅដោយការរើសអើងខាងសិទ្ធិសេរីភាពខាងនយោបាយ និងការបញ្ចេញមតិ​។

លោកគូសបញ្ជាក់ថា "នៅក្នុងចំណោមជនជាតិខ្មែរ ដែលបានមករស់នៅក្នុងសរអារាប់សិបឆ្នាំហើយ​ ក៏មានការរើសអើងនយោបាយ និងការបញ្ចេញមតិ តួយ៉ាងជាក់ស្តែង​ នោះពួកក្រុមជនជាតិខ្មែរ ដែលប្រឆាំងនឹងរាជរដ្ឋាភិបាលកម្ពុជា​ បែរទៅរើសអើងជាមួយនឹងបងប្អូនខ្មែរ ដែលគាំទ្ររាជរដ្ឋាភិបាលកម្ពុជា​ ដោយនាំគ្នាជេរប្រមាថអ្នកគាំទ្ររាជរដ្ឋាភិបាល ហើយសុទ្ធតែគំរាមកំហែងថា នឹងថតរូប​កត់ឈ្មោះទុកឲ្យរបបក្រុងវ៉ាស៊ិងតោនចាប់បញ្ជូ​នត្រឡប់ទៅប្រទេសកម្ពុជាវិញ​។

លោកបន្តថា តើនេះឬ ​ជាចរិតជនរស់នៅប្រទេសដែលហៅថា ប្រទេសស៊ីវីឡៃនោះ​? នេះគឺជាការរើសអើងខាងនយោបាយ និងរំលោភសិទ្ធិខាងកងការបញ្ចេញមតិ​។

លោក សុខ ឥសាន បានសង្កត់ធ្ងន់ថា "គ្រាន់តែប្រកាន់និន្នាកានយោបាយខុសគ្នា​ ជេរប្រមាថគេ​ មើលងាយគេ​ ប្រមាថគេ​ គំរាមកំហែងគេ​។ តើចរិតបែបនេះ ​ជាអ្នកប្រជាធិបតេយ្យឬ​ តាមពិតបើមានចរិតបែបនេះ គឺជាជនបាតផ្សារ ​ដែលជាពាក្យសាមញ្ញ ដែលខ្មែរតែងតែនិយមប្រើ​ "

ទោះបីមានការលើករបស់អ្នកនាំពាក្យបក្សកាន់អំណាចដូច្នេះក្តី លោក យ៉ែម បុញ្ញាឫទ្ធិ អតីតអ្នកនាំពាក្យគណបក្សសង្គ្រោះជាតិ បានលើកឡើងថា កម្លាំងជាតិមួយនឹងធ្លាក់ឱនថយយ៉ាងឆាប់រហ័ស​ នូវពេលជួបប្រទះវិបត្តិសេដ្ឋកិច្ច​ អតិផរណាខ្ពស់​ សង្គមវឹកវរ​ ដែលប្រទេសនីមួយខិតខំដោះស្រាយ​ ចៀសវាងឱ្យខាងតែបាន​ ដើម្បីជាផលប្រយោជន៍ដល់ប្រជាជាតិ​ និងមាតុភូមិ។

លោកបន្តថា កម្លាំងជាតិមួយ ដែល​ចេញពីរាស្ត្រ​ ចេញពីចិត្តដោយគ្មានការបង្ខិតបង្ខំណាមួយ​ ក្នុងការចូលរួម ប្រកបដោយការទទួលខុសត្រូវ​ ចាប់ផ្ដើមពីការលុបបំបាត់វប្បធម៌លាបពណ៌​ មួលបង្កាច់​ ជេរប្រមាថ​ ដែលនាំឱ្យមានការបែកបាក់ដល់សង្គមជាតិយើង​។

លោកក៏បានលើកឡើងថា កម្លាំងជាតិមួយ ដែលចេញពីការផ្សះផ្សាជាតិ​ អហិង្សា​ ខ្មែរតែមួយ​ មិនគុំកួនសងសឹក​ មិនយកខ្មែរណាជាសត្រូវ​  នឹងនាំឱ្យមានស្ថិរភាព​ មានឱកាសរៀបចំសង្គមជាតិ​ ប្រទេសជាតិអាចរីកចម្រើន និងអភិវឌ្ឍន៍ពិតប្រាកដ ហើយនឹងនាំមកនូវសង្គមយុត្តិធម៌​ សង្គមប្រជាធិបតេយ្យ​ សិទ្ធិសេរីភាព...។

សូមជម្រាបថា តាមការសង្កេតក្រុម​ប្រឆាំងបានប្រកាន់និន្នាការនយោបា​យយ៉ាងខ្លាំង ទោះបីបក្សប្រឆាំងថា ប្រកាសមិនយកខ្មែរណាជាសត្រូវក៏ដោយ៕

@Amapapa.News

Feature Ads