ភ្នំពេញៈ មុននេះបន្តិច មានផ្សែងខ្មួលខ្មាញ់ បានហុយចេញពីឃ្លាំងមួយកន្លែង បង្កឱ្យភ្ញាក់ផ្អើលទាំងអាជ្ញាធរខណ្ឌដូនពេញ និងរថយន្តពន្លត់អគ្គិភ័យរបស់ស្នងការរាជធានីភ្នំពេញ២គ្រឿង ចេញអន្តរាគមន៍ភ្លាមៗ តែផ្សែងដែលហុយចេញពីឃ្លាំងនោះ គឺគ្រាន់តែជាផ្សែង ដែលកម្មករបាញ់មូសតែប៉ុណ្ណោះ គឺមិនមានអគ្គិភ័យឆាបឆេះនោះទេ។
ហេតុការណ៍នេះ បានកើតឡើងនៅវេលាម៉ោង១១និង៥០នាទីថ្ងៃទី១៤ ខែតុលា ឆ្នាំ២០១៨ នៅតាមបណ្តោយផ្លូវលេខ១៣២ ទល់មុខខាងកើតវត្តនាគវ័ន្ត ដែលស្ថិតសង្កាត់ស្រះចក ខណ្ឌដូនពេញ រាជធានីភ្នំពេញ។
ប្រភពព័ត៌មានប្រជាពលរដ្ឋពីកន្លែងកើតហេតុ បានឱ្យដឹងថា មុនពេលកើតហេតុ ទីតាំងឃ្លាំងខាងលើ មានកម្មករសំណង់កំពុងជុសជួល លុះមួយសន្ទុះក្រោយមក ស្រាប់តែឃើញមានផ្សែងខ្មួលខ្មាញ់ចេញពីឃ្លាំងខាងលើយ៉ាងច្រើន ហើយប្រជាពលរដ្ឋមានការភិតភ័យ ខ្លាចក្រែងមានអគ្គិភ័យឆាបឆេះ ទើបរាយការណ៍ទៅសមត្ថកិច្ច ដើម្បីចុះមកអន្តគមន៍តែម្តង ហើយក៏មានរថយន្តពន្លត់អគ្គិភ័យរបស់ស្នងការរាជធានីភ្នំពេញមកចំនួន២គ្រឿង ទៅដល់កន្លែងកើតហេតុ ទម្លាក់ទុយោ ដើម្បីធ្វើការអន្តរាគមន៍ហើយ ស្រាប់តែដាច់ផ្ងារ ព្រោះម្ចាស់ឃ្លាំងហៅគេមកបាញ់ថ្នាំមុសសោះ។
ក្រោយដឹងពីការពិតហើយ សមត្ថកិច្ចបានហៅម្ចាស់ទីតាំងខាងលើ ដើម្បីណែនាំធ្វើការអប់រំ កុំឱ្យមានហេតុការណ៍នេះម្តងទៀត៕
