គណៈប្រតិភូសភាកម្ពុជា ដែលដឹកនាំដោយលោកជំទាវ ឃួន សុដារី អនុប្រធានទី២នៃរដ្ឋសភាជាតិ កំពុងតែចូលរួមកិច្ចប្រជុំក្រុមប្រឹក្សាភិបាលលើកទី២០៣ និងមហាសន្និបាតលើកទី១៣៩ នៅទីក្រុងហ្សឺណែវ ប្រទេសស្វីស ដែលមានសមាជិកចូលរួមចំនួន១៣៥ប្រទេស មានប្រធានសភាចំនួន៥០ និងអនុប្រធានសភាចំនួន៤០ រួមទាំង សមាជិក សមាជិកា សភាចំនួន៧០០នាក់ ក្នុងនាមជាសមាជិកសភាវ័យក្មេងចំនួន២០% និង៣៣% សមាជិកសភាជាស្រ្តី។ ស្របពេលជាមួយគ្នានេះ លោក សម រង្ស៊ី អតីតប្រធានអតីតគណបក្សប្រឆាំងនៅកម្ពុជា ក៏ត្រូវបានប្រធានសហភាពអន្តរសភា (IPU) អញ្ជើញឱ្យចូលរួមផងដែរ។
ឯកឧត្តម ឡេង ប៉េងឡុង អគ្គលេខាធិការរដ្ឋសភាជាតិបានអះអាងថាគណៈប្រតិភូសភាកម្ពុជានឹងតវ៉ាចំពោះការអញ្ជើញលោក សម រង្ស៊ី។
ឯកឧត្តម ឡេង ប៉េងឡុង អ្នកនាំពាក្យរដ្ឋសភាជាតិ បានអះអាងថា អញ្ជើញលោក សម រង្ស៊ី ឱ្យចូលរួមកិច្ចប្រជុំលើកទី១៣៩ របស់IPU នៅទីក្រុងហ្សឺណែវ ប្រទេសស្វីស របស់ប្រធានសហភាពអន្តរសភា គឺជារឿងខុសច្បាប់។ ឯក ឧត្តម ឡេង ប៉េងឡុង ចាត់ទុកលោក សម រង្ស៊ី ថាជាទណ្ឌិត និងមិនមែនជាតំណាងរាស្ត្រទៀតឡើយ។
សូមបញ្ជាក់ថា កិច្ចប្រជុំក្រុមប្រឹក្សាភិបាលលើកទី២០៣ ផ្តោតទៅលើការពិនិត្យសមាជិកភាព ពិនិត្យស្ថានភាពហិរញ្ញវត្ថុ របាយការណ៍អំពីសកម្មភាពប្រធាន និងអគ្គលេខាធិការ IPU ដែលបានសម្រេចរយៈពេល១ឆ្នាំរបស់អង្គការនេះ របាយការណ៍នៃកិច្ចប្រជុំដែលIPUបានរៀបចំ អំពីផែនការយុទ្ធសាស្រ្តIPU ២០១៧-២០២១ អំពីការរៀបចំកិច្ចប្រជុំនាពេលខាងមុខ ជាដើម។
ក្រោយបញ្ចប់ការបោះឆ្នោតជ្រើសរើសរបៀបវារៈរួចមក មហាសន្និបាតលើកទី១៣៩របស់សហភាពអន្តរសភា នឹងពិភាក្សាលើប្រធានបទស្តីពី "ភាពជាថ្នាក់ដឹកនាំសភាក្នុងការជំរុញសន្តិភាព និងការអភិវឌ្ឍន៍ក្នុងយុគ្គសម័យនៃនវានុវត្តន៍ និងការផ្លាស់ប្តូរតាមបែបបច្ចេកវិទ្យា”។
